1 Tupàn Tuweharupi Wiko Ma'e wiko tuwihawete romo a'e.

Nerurywete nehe, ywy. Penurywete nehe, yrypypo'o yryhu rehe har wà.

2 Heta ywàkun izywyr. Ipytunahy huwake.

Umuigo kar wemiruze'eg imunar 'ym ma'e romo hemu'em 'ym ma'e romo wà. Upureruze'eg ukatu haw rupi.

3 Amo tata oho henataromo a'e.

Wapy iàmàtyry'ymar izywyr har oho iko wà.

4 Hemiapo kwer àmàn iweraw paw uhyape katu ywy nànàn.

Ywy wexak iweraw paw. A'e rupi uryryryryz.

5 Ywytyr typyràn iraity ài Tupàn Tuweharupi Wiko Ma'e henataromo wà,

Ywy paw izar henataromo wà.

6 Ywak umume'u ikatu haw.

Teko ywy nànànar wexak ikàgaw ipuràg eteahy haw rehe we wà.

7 Tupàn a'ua'u wanagapaw wamuwete har imaranugar wà.

Uzar tupàn a'ua'u wanagapaw wanehe uze'egatu ma'e imaranugar wà.

Amogwer tupàn paw uzeamumew Tupàn Tuweharupi Wiko Ma'e henataromo wà.

8 Teko Zeruzarez tawhu pe har hurywete wà.

Teko tawhu Zuta ywy rehe har pe har hurywete wà no,

Ta'e eremume'u katu teko wanemiapo kwer ne xe, o Tupàn Tuweharupi Wiko Ma'e.

9 O Tupàn Tuweharupi Wiko Ma'e, Ywate Wera'u Har, ereruze'eg teko ywy nànànar wanereko ne wà.

Ereiko amogwer tupàn wa'aromo ne.

10 Tupàn Tuweharupi Wiko Ma'e uzamutar katu ikatu 'ymaw rehe iakatuwawahy 'ym ma'e a'e wà.

Uzekaiw wemiaihu wanehe wamàno haw wi wapyro pà.

Upyro ikatu 'ym ma'e wakàgaw wi wà.

11 Tupàn ikatu haw tatainy zàwenugar uhyape katu imunar 'ym ma'e wanehe, hemu'em 'ym ma'e wanehe.

Turywete haw uhyape katu ikatu ma'e wanape ràm.

12 Amo teko weruzar katu Tupàn a'e wà. Tuwe Tupàn Tuweharupi Wiko Ma'e wiko wanurywete haw romo nehe.

Tuwe teko umume'u Tupàn imonokatu pyrer ikatu haw wà nehe.