1 Azeharomoete.

Pemume'u Tupàn Tuweharupi Wiko Ma'e ikatu haw nehe,

Ta'e ikatuahy a'e xe, ta'e ipuruamutar katu haw nupaw pixik kwaw a'e nehe xe.

2 Mo upuner hemiapo kwer ikatuahy ma'e imume'u haw rehe wà.

Mo upuner ikatu haw imume'u katu haw rehe wà.

3 Hurywete teko wà, aze wiko tuwe ikatu 'ym ma'e iapo 'ymar romo wà.

Hurywete ikatu ma'e tuweharupi iapo har wà.

4 Nema'enukwaw herehe nehe, o Tupàn Tuweharupi Wiko Ma'e,

Neremiaihu wanehe neze'egatu imono mehe nehe.

Wapyro mehe hepyro pe nehe no.

5 Tuwe aexak neremiaihu waneko katu mehe ihe wà nehe.

Tuwe herurywete neremiruze'eg wainuinuromo wanurywete mehe ihe nehe.

Hurywete a'e wà, ta'e neremiaihu romo wanekon wà xe.

6 Uruzapo ikatu 'ym ma'e ureipy wazàwe ure.

Na'urekatu kwaw. Ureaiw ure.

7 Ezit ywy rehe wiko mehe ureipy nukwaw kwaw Tupàn hemiapo kwer ikatuahy ma'e wà.

Kwarahy nànàn wexak kar wamutar katu haw wanupe.

Heharaz ipuruamutar katu haw wi wà.

Yryhupiràg huwake wiko mehe upytu'u Tupàn Ikàg Wera'u Ma'e ize'eg heruzar ire wà.

8 Nezewe rehe we wexak kar ukàgaw uhua'u ma'e wanupe.

Upyro a'e wà, ta'e umume'u wapyro àwàm wanupe a'e 'ym mehe a'e xe.

9 Uze'eg Tupàn Tuweharupi Wiko Ma'e. A'e rupi Yryhupiràg uxinig a'e.

Wahaw teko yryhu wà.

Nuzawy kwaw ywy uxinig ma'e wanupe.

10 Upyro wemiaihu wà, wanehe iakatuwawahy 'ym ma'e wapo wi wà.

Upyro waàmàtyry'ymar wanuwi wà.

11 'Y umim waàmàtyry'ymar wà.

Ni pitài nuzenuhem kwaw wà. Umàno paw rupi wà.

12 Na'e hemiaihu uzeruzar Tupàn hemimume'u kwer rehe wà.

Umuzàg zegar haw ikatu haw rehe har wà.

13 Nan kwehe tete heharaz Tupàn hemiapo kwer wi wà.

Uzapo ma'e oho ize'eg henoz 'ym pà wà.

14 Ywyxiguhu rehe wanemimutar uzeapo wanuwihaw romo.

Wagaw Tupàn wà.

15 A'e rupi omono wanemimutar wanupe.

Omono kar amo ma'eahy haw iaiw ma'e wanupe no.

16 A'e pe wanàpuzràn wanenaw rehe

Hewyrowyroahy Moizez rehe wà.

Hewyrowyroahy Àràw rehe wà, Tupàn Tuweharupi Wiko Ma'e hemiruze'eg ikatu ma'e rehe wà no.

17 Na'e uzepe'a ywy Nàtà imukun pà kury.

Umukun Àmiràw no. Umukun iànàm wà no.

18 Tupàn umuezyw tata wanemiruze'eg wanehe.

Wapy a'e teko ikatu 'ym ma'e wà.

19 Xinaz ywytyr rehe umupyràn Izaew itazu or wà, tapi'aka'yr hagaw paw iapo pà wà.

Umuwete katu a'e or imupyràn pyrer tupàn ua'u romo iapo pyrer wà.

20 Weityk Tupàn ikàgaw ipuràg eteahy haw wà. Umuwete katu ma'ea'yr ka'api'i i'u har hagapaw wà.

21 Heharaz Tupàn zanepyro har wi wà.

Heharaz Ezit ywy rehe hemiapo kwer ikatuahy ma'e wi wà.

22 Azeharomoete uzapo ikatuahy ma'e a'e pe.

Azeharomoete uzapo purumupytuhegatu kar haw Yryhupiràg pe no.

23 Wikwahy Tupàn Izaew wanupe. Uze'eg nezewe. — Amumaw putar Izaew paw ihe wà nehe, i'i.

Hemiruze'eg hemixak kwer Moizez uze'eg oho henataromo kury.

— Ezuka zo ne wà nehe, i'i izupe. A'e rupi nuzuka kwaw wà.

24 A'e re amo 'ar mehe

Naheixe wer kwaw Kànàà ywy ikatuahy ma'e rehe wà,

Ta'e nuzeruzar kwaw Tupàn hemimume'u kwer rehe wà xe.

25 Upyta wàpuzràn pupe wà. Uzypyrog uze'eg zemueteahy pà wà.

Na'ipurenu wer kwaw Tupàn Tuweharupi Wiko Ma'e rehe wà.

26 Na'e Tupàn Tuweharupi Wiko Ma'e umume'u tuwe ma'e wanupe kury.

— Pemàno putar ywyxiguhu rehe nehe, i'i wanupe.

27 — Amuhàmuhàz putar pezuapyapyr teko herehe uzeruzar 'ym ma'e wainuinuromo ihe wà nehe, i'i wanupe.

— Amumàno kar putar amo ae ywy rehe ihe wà nehe, i'i wanupe.

28 Na'e Tupàn hemiaihu uzemono'og wà Peor ywytyr rehe wà kury,

Tupàn ua'u Ma'aw her ma'e imuwete katu pà wà kury.

Uzuka kar ma'ea'yr tupàn a'ua'u wikuwe 'ym ma'e wanupe wà. A'e re u'u wano'o kwer wà.

29 A'e ma'e iapo haw hexak mehe wikwahy Tupàn.

A'e rupi umur kar ma'eahy haw iaiw ma'e wanupe.

30 Pinez uzepyk ikatu 'ym ma'e iapo arer rehe a'e.

A'e mehe upytu'u ma'eahy haw.

31 — Ikatu Pinez, i'i Tupàn izupe.

— Ikatu Pinez, i'i putar teko paw tuweharupi wà nehe.

32 A'e re oho ytyzuzàmaw Merima her ma'e pe wà.

Umuikwahy kar wi teko Tupàn wà.

Uzepyk Tupàn Moizez rehe teko wakatu 'ymaw hekuzaromo kury.

33 Umuikwahy kar tuwe teko Moizez wà.

A'e rupi umume'u iro haw a'e.

34 Nuzuka kwaw Tupàn rehe uzeruzar 'ym ma'e

Tupàn Tuweharupi Wiko Ma'e ze'eg rupi wà.

35 Wiko oho wainuinuromo wà. Uzerekoreko wanehewehewe wà.

Uzapo iaiw ma'e wanemiapo zàwenugar wà.

36 Tupàn hemiaihu umuwete katu tupàn a'ua'u wà.

A'e rupi Tupàn uzuka wà.

37 Uzuka kar wa'yr tupàn a'ua'u wanenataromo wà.

Uzuka kar wazyr wanenataromo wà no.

38 Uzuka kwarer ikatu 'ym ma'e iapo pixik 'ymar kuzàtài ikatu ma'e wanehe we wà.

Wa'yr wazyr uzuka tupàn a'ua'u

Kànàà ywy rehe har wazar wanupe wà.

A'e rupi ywy uzeapo iaiw ma'e romo Tupàn henataromo a'e, ta'e kwarer wanuwykwer kuzàtài wanuwykwer heta hehe a'e xe.

39 A'e ma'e iapo mehe uzemuaiw kar Tupàn henataromo wà.

Upytu'u Tupàn heruzar ire wà.

40 Na'e Tupàn Tuweharupi Wiko Ma'e wikwahy wemiaihu wanupe kury.

Iroahy tuwe izupe wà.

41 A'e rupi weityk uzeruzar 'ym ma'e wapo pe wamono pà wà kury.

Uzeruzar 'ym ma'e wiko wazar romo wà kury.

42 Waàmàtyry'ymar upuraraw kar ma'erahy wanupe wà.

Uzapo Izaew a'e teko wanemiapo putar haw tuweharupi wà kury.

43 Tupàn upyro tetea'u zepe wemiaihu wà.

Nezewe rehe we nuweruzar kwaw uzar wà.

Tuweharupi wixe wera'u ikatu 'ymaw pupe wà.

44 Nezewe rehe we aze wenoz upytywà haw Tupàn pe wà, wenu waze'eg a'e.

Uzewyr wanupe aze upuraraw ma'erahy wà.

45 Ima'enukwaw wemimume'u kwer rehe, ta'e hemiaihu romo wanekon a'e wà xe.

Uzewyr uze'eg awer wi, ta'e uzamutar katu a'e wà xe.

46 Tupàn uma'ereko wazar wapy'a pe a'e.

A'e rupi wazar upuhareko wemipyhyk kwer a'e wà.

47 O Tupàn Tuweharupi Wiko Ma'e urezar, urepyro pe nehe.

Uremunyryk kar pe urereraha nerehe uzeruzar 'ym ma'e wamyter wi nehe.

Urereraha pe, urereruzewyr pà ureywy pe nehe.

Nezewe mehe urumume'u putar neremiapo ikatu haw newe nehe.

Urerurywete haw rupi urumume'u putar nerer ikatu ma'e ikatu haw nehe.

48 Ximume'u Tupàn Tuweharupi Wiko Ma'e Izaew wazar ikatu haw nehe.

Pemume'u Tupàn Tuweharupi Wiko Ma'e ikatu haw ko 'ar rehe nehe. Pemume'u Tupàn Tuweharupi Wiko Ma'e ikatu haw tuweharupi nehe no.

Tuwe teko ywy nànànar uze'eg nezewe wà nehe. — Azeharomoete, tuwe i'i wà nehe.

Pemume'u Tupàn Tuweharupi Wiko Ma'e ikatu haw nehe.