1 Pemume'u Tupàn Tuweharupi Wiko Ma'e ikatu haw nehe, ta'e ikatuahy a'e xe.

Ipuruamutar katu haw nupaw pixik kwaw nehe.

2 Tuwe hemipyro kwer paw

Umume'u Tuweharupi Wiko Ma'e ikatu haw wà nehe.

Upyro waàmàtyry'ymar wapo wanuwi a'e wà.

3 Pemur kar amo teko waywy wi a'e.

Kwarahy heixe haw awyze har wi pemur kar. Kwarahy hemaw awyze har wi pemur kar. Kwarahy hemaw wi pemur kar. Kwarahy heixe haw wi pemur kar no.

4 Amo peipy wata e oho waiko ywyxiguhu rehe wà.

Nuexak kwaw tawhu weko àwàm wà.

5 Ima'uhez wà. Iziwez wà no.

Upytu'u ikatu ma'e hàro re wà.

6 Ma'erahy ipuraraw mehe uhapukaz upytywà àwàm henoz pà wà.

Tupàn Tuweharupi Wiko Ma'e upyro ma'erahy wi wà.

7 Weruata pe ikatu ma'e rupi wà.

Weraha tawhu ikatu ma'e pe wà, waneko àwàm me wà.

8 — Nepuruamutar katu haw ikatu, tuwe i'i Tupàn Tuweharupi Wiko Ma'e pe wà.

Tuwe umume'u hemiapo kwer ikatuahy ma'e wà nehe. Uzapo a'e ma'e wanupe a'e.

9 Omono 'y iziwez ma'e wanupe.

Omono ikatu ma'e ima'uhez ma'e wanupe.

10 Amo wiko ipytunaw rehe wà. Wiko ipytunahy haw rehe wà.

Upuraraw ma'erahy waiko wà. Amo wàpixi a'e teko kyhàhàmtàtà pupe wà,

11 Ta'e upytu'u Tupàn Ywate Wera'u Har ze'eg heruzar ire a'e wà xe.

Upytu'u ipurumu'e haw rehe uzekaiw ire wà no.

12 Ikene'o uma'ereko haw ipuhuz katu ma'e rehe wà.

U'ar oho waiko wà. Ni amo nupytywà kwaw wà.

13 Ma'erahy ipuraraw mehe uhapukaz upytywà àwàm henoz pà wà.

Tupàn Tuweharupi Wiko Ma'e upyro ma'erahy wi wà.

14 Upyro wamàno àwàm ipytunahy haw zàwenugar wi wà.

Omonohonohok kyhàhàmtàtà waàpixipixi haw no, ipegegwera'i romo no.

15 Tuwe umume'u Tupàn Tuweharupi Wiko Ma'e ipuruamutar katu haw ikatu haw izupe nehe.

Tuwe umume'u hemiapo kwer ikatu haw nehe no. Uzapo a'e ma'e wanupe a'e.

16 Weityk uken itazu morog iapo pyrer a'e.

Uzukazuka itaper ipegegwer romo no.

17 Amo ima'eahy a'e wà,

Ta'e uzapo ikatu 'ym ma'e a'e wà xe.

Upuraraw ma'erahy ta'e iaiw a'e wà xe.

18 Ihuhuk wer temi'u hexak mehe wà.

Umàno tària'i wà.

19 Ma'erahy ipuraraw mehe uhapukaz upytywà àwàm henoz pà wà.

Tupàn Tuweharupi Wiko Ma'e upyro ma'erahy wi wà.

20 Umukatu uze'eg rupi wà.

Upyro wamàno haw wi wà.

21 Tuwe umume'u Tupàn Tuweharupi Wiko Ma'e ipuruamutar haw ikatu haw izupe wà nehe.

Tuwe umume'u hemiapo kwer ikatuahy ma'e wà nehe no.

22 Tuwe uzuka ma'ea'yr Tupàn henataromo wà nehe, hemiapo kwer ikatu haw imume'u pà izupe wà nehe.

Tuwe umuzàg zegar haw purumurywete kar haw izupe wà nehe no.

Tuwe umume'u hemiapo kwer upaw rupi wà nehe.

23 Amo wata oho yryhu rehe kanuhu pupe wà.

Omono'og wemetarer yryhu rehe uma'ereko pà wà.

24 Wexak Tupàn Tuweharupi Wiko Ma'e hemiapo kwer wà.

Wexak hemiapo kwer ikatuahy ma'e yryhu rehe iapo pyrer wà.

25 Uze'eg Tupàn a'e.

Na'e ywytu uzypyrog ur pà a'e kury.

Umuhua'u ykotok kury.

26 Na'e ykotok upir katu kanuhu wà.

A'e re kanuhu wezyw katu oho 'y iwy pe wà no.

Awa ukyze tuwe

A'e ikatu 'ymaw inuromo wà.

27 Uzepyapi oho waiko wata pà uka'u ma'e ài wà.

Ukwaw katu yryhu rehe uma'ereko haw wà. Nezewe rehe we umàno tària'i wà.

28 A'e rupi ma'erahy ipuraraw mehe uhapukaz upytywà àwàm henoz pà wà.

A'e rupi Tupàn Tuweharupi Wiko Ma'e upyro a'e ma'erahy wi wà.

29 Umupytu'u kar ykotok ire.

Upytu'u ykotok wànog ire.

30 Hurywete a'e awa wà, ta'e upytu'u ykotok ire xe.

Nezewe Tupàn weraha waho àwàm me wà.

31 Tuwe umume'u Tupàn Tuweharupi Wiko Ma'e ikatu haw wà nehe, ipuruamutar katu haw ikatu haw wà nehe.

Tuwe umume'u hemiapo kwer ikatuahy ma'e wà nehe. Uzapo a'e ma'e wanupe a'e.

32 Teko wazemono'og mehe pemume'u Tupàn uhua'u haw nehe.

Pemume'u ikatu haw tuwihaw wazemono'og mehe nehe.

33 Uzapo Tupàn yrykawhu ywyxiguhu romo a'e.

Ytyzuzàmaw uzapo ywy uxinig ma'e romo no.

34 Uzapo ywy katu ywy xa heta tetea'u ma'e romo no,

Ta'e iaiw a'e pe wiko ma'e a'e wà xe.

35 Uzapo ywyxiguhu ypawhu romo.

Ywy uxinig ma'e kwer rehe uzapo ytyzuzàmaw no.

36 Umuigo kar teko ima'uhez tetea'u ma'e a'e pe wà.

A'e teko uzapo tawhu wà. Wiko a'e pe wà.

37 Uzutym ma'eà'yz ko pe wà. Uzapo uwà tyw a'e pe wà no.

Hezuz katu a'e ma'eà'yz wà. Teko opo'o i'a kwer tetea'u wà.

38 Tupàn omono uze'egatu wemiaihu wanehe a'e.

Wa'yr tetea'u umuzàg wà.

Numumaw kar pixik kwaw tapi'ak a'e pe wà.

39 Zauxiapekwer amo ywy rehe har ur a'e pe wà. Weityk Tupàn hemiaihu wà, ma'e hereko 'ymar romo wamuigo kar pà wà. Upuraraw ma'erahy wà.

Uzemumikahy wà. Ipuhuz katu wanupe.

40 Tuwihaw Tupàn hemiaihu waneityk arer wà, iro Tupàn pe wà. Wexak kar Tupàn wikwahy haw wanupe kury.

Umuata e kar a'e tuwihaw waneraha ywyxiguhu teko heta 'ymaw rehe wà.

41 Upyro ma'e hereko 'ymar wanemipuraraw wi wà.

Umueta tetea'u kar wana'yr wà, wanazyr wà no. Heta tetea'u àràpuhàràn imono'og pyrer ài wà.

42 Teko ikatu ma'e wexak a'e ma'e wà. Hurywete hexak mehe wà.

Tupàn umupytu'u kar teko ikatu 'ym ma'e paw waze'eg ire wà.

43 Aze ma'e kwaw katu har romo ereiko nehe, nema'enukwaw katu ko ma'e rehe nehe.

Ezeagaw Tupàn Tuweharupi Wiko Ma'e ipuruamutar katu haw ikwaw pà nehe.