1 Azeharomoete.

Pemume'u Tupàn Tuweharupi Wiko Ma'e ikatu haw nehe.

Hepy'a pupe tuwe amume'u putar Tupàn Tuweharupi Wiko Ma'e ikatu haw nehe,

Teko Tupàn heruzar har wainuinuromo nehe, teko wazemono'ono'ogaw pe nehe.

2 Ikatuahy hemiapo kwer.

Hemiapo kwer rehe hurywete ma'e ipurukwaw katu wer hehe wà.

3 Heta puràg eteahy haw hemiapo kwer nànàn. Heta uhua'u haw hemiapo kwer nànàn no.

Teko wanupe ikatuahy haw nupaw pixik kwaw nehe.

4 Tupàn Tuweharupi Wiko Ma'e nazanemueharaz kar kwaw wemiapo kwer ikatuahy ma'e wi a'e.

Ikatu a'e. Upurupuhareko katu no.

5 Omono temi'u teko wanupe, aze a'e teko ukyze izuwi wà.

Naheharaz pixik kwaw uze'egaw teko wanehe we wemiapo katu kwer wi nehe.

6 Tupàn Tuweharupi Wiko Ma'e wexak kar ukàgaw teko Izaew wanupe a'e,

Amo ae teko waywy imono pà Izaew wanupe a'e.

7 Tuweharupi uzapo ma'e uze'eg rupi katete, wemiaihu wanuwi upuir 'ym pà.

Zapuner ize'eg nànàn zanezeruzar haw rehe.

8 Nupaw pixik kwaw ize'eg nehe, ta'e azeharomoete a'e xe.

Ikatu a'e no.

9 Tupàn umuhem kar wemiaihu zemunehew paw zàwenugar wi a'e wà.

Uzapokatu uze'egaw upaw 'ym ma'e ràm wanehe we.

Wiko ikatuahy ma'e imonokatu pyrer romo a'e. Upuner a'e no.

10 Aze amo heko wer ma'e kwaw katu har romo nehe, tuwe ukyze Tupàn Tuweharupi Wiko Ma'e wi nehe, amo ma'e iapo 'ym mehe we nehe.

Aze teko weruzar ize'eg wà, Tupàn ukwaw katu kar ma'e a'e teko wanupe.

Tuwe teko umume'u Tupàn Tuweharupi Wiko Ma'e ikatu haw tuweharupi wà nehe.