1 Azeharomoete.

Pemume'u Tupàn Tuweharupi Wiko Ma'e ikatu haw nehe.

Hurywete Tupàn wi ukyze ma'e wà. Aze Tupàn ze'eg heruzar haw ikatu amo teko wanupe, hurywete a'e teko wà.

2 Awa ikatu ma'e ta'yr ikàg putar ywy rehe wà nehe.

Tupàn omono putar uze'egatu izuapyapyr wanupe nehe.

3 Uhyk ma'e hàpuz me. Uhyk hemetarer izupe no.

Tuweharupi ikatu a'e.

4 Tatainy uhyape katu ipytun mehe.

Nezewegatete teko ikatu ma'e ukwaw kar ikatu ma'e iapo haw amo teko wanupe wà no, ikatuahy ma'e wanupe wà, purupuhareko ma'e wanupe wà no, imunar 'ym ma'e hemu'em 'ym ma'e wanupe wà no.

5 Aze amo upuhareko amogwer wà, aze omono ma'e imekuzar pyr wanupe, hurywete putar a'e nehe.

Aze uma'eme'eg imunar 'ym pà, aze uma'eme'eg kar hemu'em 'ym pà, hurywete a'e.

6 Ikatu ma'e nuzewyr kwaw hemetarer 'ym ma'e romo weko awer pe wà.

Teko ima'enukwaw putar her tuweharupi wà nehe.

7 Nukyze kwaw ikatu 'ym ma'e imume'u haw henu haw wi a'e.

Izeruzar haw ikàg a'e, ta'e uzeruzar Tupàn Tuweharupi Wiko Ma'e rehe a'e xe.

8 Nuzemumikahy kwaw. Nukyze kwaw.

Ukwaw katu wàmàtyry'ymar waneityk àwàm.

9 Omono e ma'e hemetarer 'ym ma'e wanupe.

Ikatu haw upyta putar tuweharupi nehe.

Upuner a'e. Teko paw umuwete wà.

10 Ikatu 'ym ma'e wexak heko haw wà. Wikwahy hexak mehe wà.

Ume'e hehe iakatuwawahy 'ym pà wà. A'e re uzemumaw wà.

Ikatu 'ym ma'e wàro e ikatu ma'e uzeapo ma'e ràm wà.