1 Pemume'u Tupàn Tuweharupi Wiko Ma'e ikatu haw nehe.

Pemume'u Tuweharupi Wiko Ma'e ikatu haw nehe,

Hemiruze'eg wà,

2 Hàpuz me wiko ma'e wà.

Zanezar hàpuzuhu pupe wiko ma'e wà.

3 Pemume'u Tuweharupi Wiko Ma'e ikatu haw nehe, ta'e ikatu a'e xe.

Pemuzàg zegar haw her ikatu haw rehe nehe, ta'e uzapo ikatu ma'e wemiruze'eg wanupe a'e xe.

4 Tupàn Tuweharupi Wiko Ma'e wexak Zako kwehe mehe a'e, wemiruze'eg romo imuigo kar pà a'e.

Wexaexak teko Izaew wemiaihu romo wemiamutar katu romo wamuigo kar pà wà.

5 Akwaw Tupàn Tuweharupi Wiko Ma'e uhua'u haw ihe.

Zanezar wiko amogwer tupàn wa'aromo upaw rupi a'e.

6 Tupàn Tuweharupi Wiko Ma'e uzapo wemimutar ywak rehe a'e,

Ywy rehe a'e no,

Yryhu pupe a'e, yryhu ohoete ma'e pupe a'e no.

7 Werur ywàkun ywy iahykaw wi.

Umuàgà'ym iweraw paw àmànuhu pe ywytuhu pe.

Umuhem kar ywytu imonokatu haw wi no.

8 A'e ae uzuka Ezit ywy rehe har wana'yr ipy paw a'e wà.

Awa wana'yr ipy uzuka wà. Ma'ea'yr wana'yr ipy uzuka wà no.

9 Uzapo purumupytuhegatu kar haw a'e pe.

Uzapo ma'e hemixak pyr 'ym a'e pe no, tuwihawete rehe uzepyk pà, hemiruze'eg wanehe uzepyk pà no.

10 Tupàn Tuweharupi Wiko Ma'e umumaw teko amo ae ywy rehe har tetea'u wà.

Uzuka tuwihawete ikàg ma'e wà no.

11 Uzuka Xeom Amohe ywy rehe har wanuwihawete a'e.

Uzuka Og Màxà izuapyapyr wanuwihawete a'e no.

Uzuka Kànàà ywy rehe har wanuwihawete paw a'e wà no.

12 A'e tuwihawete waywy a'e, Tupàn omono wemiaihu Izaew wanupe a'e.

Izaew wiko putar izar romo wà nehe.

13 O Tupàn Tuweharupi Wiko Ma'e, teko paw ukwaw putar Tupàn romo nereko haw a'e wà nehe.

Teko kwarahy ur ma'e ràm nànàn ima'enukwaw putar nerehe wà nehe no.

14 Tupàn Tuweharupi Wiko Ma'e uzekaiw putar teko Izaew wanehe a'e wà nehe.

Upuhareko putar wemiruze'eg wà nehe no.

15 Tupàn amo ae ywy rehe har wazar a'e wà, teko uma'e itaxig parat a'e wà, wanagapaw romo waapo pà a'e wà. Wiko itazu or iapo pyrer romo a'e wà no.

Awa uzapo opo pupe wà.

16 Heta wazuru wanupe. Nuze'eg kwaw wà.

Heta waneha wanupe. Nuexak kwaw ma'e wà.

17 Heta wapyakwar wanupe. Nuenu kwaw ma'e wà.

Nupuner kwaw upytuhemaw rehe wà.

18 A'e tupàn a'ua'u iapo arer a'e wà nehe,

Wanehe uzeruzar ma'e a'e wà nehe no, tuwe wiko wemiapo kwer zàwegatete wà nehe.

19 Pemume'u Tupàn Tuweharupi Wiko Ma'e ikatu haw nehe, teko Izaew izuapyapyr wà.

Xaxeto Tupàn henataromo har wà, pemume'u Tuweharupi Wiko Ma'e ikatu haw nehe.

20 Erewi izuapyapyr wà, pemume'u Tupàn Tuweharupi Wiko Ma'e ikatu haw nehe.

Izuwi ukyze ma'e paw wà, pemume'u ikatu haw nehe.

21 Pemume'u Tuweharupi Wiko Ma'e ikatu haw Xiàw ywytyr rehe nehe.

Pemume'u ikatu haw heko haw pe Zeruzarez tawhu pe nehe.

Pemume'u Tupàn Tuweharupi Wiko Ma'e ikatu haw nehe.