1 O Tupàn Tuweharupi Wiko Ma'e, amume'u nekatu haw newe hepy'a nàn ihe.

Amuzàg zegar haw nekatu haw rehe amogwer tupàn wanenataromo upaw rupi.

2 Apyk hepenàràg rehe neràpuzuhu ikatu ma'e henataromo ihe,

Ta'e heamutar katu pe ne xe, ta'e nahetyryk pixik kwaw pe xe.

Amume'u nerer ikatu haw no,

Ta'e erexak kar nerer ma'e paw wa'aromo ipyta haw ne xe.

Erexak kar neremimume'u ma'e paw wa'aromo ipyta haw ne no.

3 Newe heze'eg mehe erewazar heze'eg ihewe.

Nekàgaw pupe hemukàg kar wera'u no.

4 O Tupàn Tuweharupi Wiko Ma'e, ywy nànànar wanuwihawete paw umume'u putar nekatu haw wà nehe,

Neremiapo ràm imume'u haw henu mehe wà nehe.

5 Ne Tuweharupi Wiko Ma'e ne.

A'e tuwihawete umuzàg putar neremiapo kwer ikatu haw rehe zegar haw wà nehe, ta'e nekàgaw nepuràg eteahy haw uhua'u a'e xe.

6 Ereiko muite ywate ne.

Nezewe rehe we erezekaiw teko ikàg 'ym ma'e wanehe.

Amo wanuwi wiko wera'u ma'e nupuner kwaw newi uzeàmimaw rehe wà.

7 Ikatu 'ym ma'e ihewe izeapo etea'i mehe

Hepyro pe ne.

Nekàgaw hepyro heàmàtyry'ymar herehe wakatuwawahy 'ymaw wi.

Hepyro nepuner haw pupe.

8 Erezapo putar ma'e neremimume'u kwer paw rupi nehe.

O Tupàn Tuweharupi Wiko Ma'e, nepuruamutar haw nupaw pixik kwaw nehe.

Erezypyrog nema'ereko haw iapo pà. Epytu'u zo iapo re nehe.