1 O Tupàn Tuweharupi Wiko Ma'e, ereme'e herehe. Hekwaw pe ne.

2 Erekwaw heremiapo upaw rupi.

Muite ereiko ihewi. Nezewe rehe we erekwaw hema'enukwaw paw upaw rupi.

3 Herexak pe herereko hema'ereko mehe.

Herexak pe hepytu'u mehe no.

Erekwaw heremiapo.

4 Heze'eg 'ym mehe we

Erekwaw heremimume'u ràm.

5 Ereiko heywyr upaw rupi.

Hepyro pe ikatu 'ymaw wi nekàgaw pupe.

6 Màràzàwe tuwe hekwaw katu pe nezewe. Nakwaw kwaw ihe.

Nema'ekwaw paw uhua'u a'e. Napuner kwaw ikwaw paw rehe ihe.

7 Ma'e pe apuner heho haw rehe nerekwe wi hehem pà nehe.

Aze hehem wer neruwa wi nehe, ma'e pe àzàn putar nehe.

8 Aze azeupir ywak rehe nehe, ereiko putar a'e pe nehe.

Aze awezyw umàno ma'e kwer wapyta haw pe nehe, ereiko putar a'e pe nehe no.

9 Aze awewe kwarahy ihemaw kutyr nehe,

Aze azapo hereko haw muite xe wi kwarahy heixe haw kutyr nehe,

10 nezewe rehe we nepo hereraha putar nehe.

Nezewe rehe we hepytywà pe a'e pe nehe.

11 — Pytunaw, hemim pe nehe, apuner mo he'e haw rehe izupe.

— Tatainy heywyr har, eiko pytunahy haw romo nehe, apuner mo he'e haw rehe izupe.

12 Herexak putar pe nezewe rehe we nehe, ta'e ipytunaw na'ipytun kwaw newe xe.

Erexak katu ma'e pyhaw no.

Nuzawy kwaw 'aromo neremixak a'e.

Tatainy a'e, ipytunaw a'e no, uzuawygatu newe wà.

13 Erezapo heretekwer rehe har paw.

Heapo hehy hie pe hereko mehe we.

14 Amume'u nekatu haw ihe, ta'e heapo awer xiroxirogatu a'e xe.

Neremiapo kwer ikatuahy upaw rupi.

Akwaw katu ko ma'e ihe.

15 Herexak pe hekàgwer izeapoapo mehe we ne.

Herexak pe hehy hie pe heapoapo mehe we no.

Teko naherexak kwaw a'e pe heapo mehe wà.

16 Herexak pe hezexak kar 'ym mehe we ne.

He'ar ihewe neremimume'u kwer paw

Eremuapyk nepape rehe ne wà.

A'e 'ar nuhem kwaw imume'u mehe wà rihi.

17 O Tupàn, heta tetea'u nema'enukwaw paw wà.

Zawaiw katu nema'enukwaw paw ikwaw paw urewe.

18 Aze mo apapar ihe wà, waneta haw uhua'u wera'u mo ywyxig waneta haw wi wà.

Azypyrog mo wapapar pà. Apapar wiwi mo aha iteko no.

Nezewe rehe we napuner iwer mo a'e paw wapapar haw rehe.

19 O Tupàn, aze mo eremumaw ikatu 'ym ma'e ne wà, herurywete mo ihe.

Aze mo awa ipuruzukaiw ma'e utyryk ihewi wà, herurywete mo ihe.

20 Uze'eg zemueteahy nerehe wà.

Iaiw ma'e umume'u nerer rehe uze'eg mehe wà.

21 O Tupàn Tuweharupi Wiko Ma'e, naheakatuwawahy kwaw tuwe nerehe iakatuwawahy 'ym ma'e wanehe ihe.

Neàmàtyry'ymar iroahy ihewe wà.

22 Naheakatuwawahy kwaw wanehe. Naheakatuwawahy kwaw wanehe azeharomoete.

Wiko heàmàtyry'ymar romo wà.

23 O Tupàn, eme'e herehe nehe. Ekwaw hepy'a nehe.

Heragaw pe hema'enukwaw paw ikwaw pà nehe.

24 Ekar ikatu 'ym ma'e iapo haw herehe nehe.

Hereraha pe nehe, tuweharupi hereko àwàm piar rupi nehe.