1 O Tupàn Tuweharupi Wiko Ma'e, uruenoz iteko ihe. Ezur na'arewahy hepytywà pà nehe.

Herenu pe newe heze'eg mehe hepytywà àwàm henoz mehe nehe.

2 Einu heze'eg nehe. Tuwe nuzawy kwaw yhyk hyàkwegatu ma'e newe nehe.

Aupir hepo nerenataromo newe heze'eg mehe. Tuwe nuzawy kwaw ma'e newe imono pyr karuketea'i mehe har newe nehe.

3 O Tupàn Tuweharupi Wiko Ma'e, eiko hezuru izar romo nehe.

Emume'u kar zo ikatu 'ym ma'e ihewe nehe.

4 Ema'ereko hepy'a pe nehe, nezewe mehe nahepurapo wer kwaw ikatu 'ym ma'e rehe nehe.

Aze ata teko iaiw ma'e wanupi nehe, ezapo kar zo ikatu 'ym ma'e ihewe nehe.

Hemunyryk kar pe wakatu 'ymaw wi nehe.

Hemono kar zo pe wapynykawhu pe nehe.

5 Aze amo Tupàn heruzar har umume'u heremiapo kwer ikatu 'ym ma'e ihewe nehe, aze uzepyk herehe nehe, ikatu putar ihewe nehe.

Nezewe wiko mo hemyrypar ài ihewe.

Aze iaiw ma'e umume'u heremiapo kwer ikatuahy ma'e wà nehe, na'ikatu kwaw ihewe wà nehe.

Tuweharupi aze'eg Tupàn pe imuzepyk kar pà iaiw ma'e wanehe ihe.

6 Amo 'ar mehe zauxiapekwer weityk putar wanuwihaw ita iaiha ma'e wi wà nehe.

A'e 'ar mehe teko ukwaw putar heze'eg awer ikatu haw wà. Azeharomoete heze'eg awer.

7 Teko omowomowok zepe'aw imonohonohok pà wà.

Nezewegatete zauxiapekwer umuhàmuhàz putar a'e tuwihaw wakàgwer wà nehe no, watym àwàm huwake wà nehe no.

8 Tupàn Tuweharupi Wiko Ma'e hezar, azeruzar wiwi nerehe.

Aekar hepyro àwàm iteko no.

Hemumàno kar zo pe nehe.

9 Hepyro pe kyhapari imuzaiko pyrer hepyhyk àwàm wi nehe.

Hemunyryk pe puruzuka haw ikatu 'ym ma'e wanuwi nehe no.

10 Tuwe ikatu 'ym ma'e u'ar wemiapo kwer puruzuka haw zàwenugar pupe wà nehe.

Tuwe ahem a'e wi hemàno 'ym pà nehe.