1 O Tupàn Tuweharupi Wiko Ma'e, hepyro pe ikatu 'ym ma'e wanuwi nehe.

Hemunyryk kar pe awa upuruzuka ma'e wanuwi nehe.

2 Tuweharupi umume'u ikatu 'ym ma'e wemiapo ràm waiko wà.

Tuweharupi uzàmàtyry'ym kar amo amo wanupe wà.

3 Waapeku nuzawy kwaw mozaiw iapeku.

Waze'eg nuzawy kwaw puruzuka haw mozaiw zuru pe har no.

4 O Tupàn Tuweharupi Wiko Ma'e, hepyro pe teko ikatu 'ym ma'e wakàgaw wi nehe.

Hemunyryk kar pe awa ipuruzukaiw ma'e wanuwi nehe.

Umume'u hereityk àwàm waiko tuweharupi wà.

5 Awa amo wanuwi wiko wera'u ma'e uzapo miar zuka haw zàwenugar hepyhyk pà wà.

Umuzaiko kyhapari herape rupi wà.

Omono hezuka àwàm heho àwàm rupi wà.

6 Aze'eg nezewe Tuweharupi Wiko Ma'e pe. — Ereiko hezar romo ne, a'e izupe.

— O Tuweharupi Wiko Ma'e, einu heze'eg newe hepytywà àwàm henoz mehe nehe.

7 Tupàn Wiko Ma'e hezar, hepyro har ikàg ma'e,

Erezekaiw herehe zeàmàtyry'ymawhu pe hereko mehe ne.

8 O Tupàn Tuweharupi Wiko Ma'e, emono zo wanemimutar ikatu 'ym wanupe nehe.

Emuzeapo kar zo wanemiapo putar haw iaiw ma'e nehe.

9 Hereityk zo pe heàmàtyry'ymar wanupe nehe.

Umume'u iaiw ma'e herehe uzeapo ma'e ràm a'e wà. Tuwe a'e iaiw ma'e u'ar imume'u arer wanehe nehe.

10 Tuwe u'ar tata hàtàpyzgwer wanehe nehe.

Tuwe amo weityk a'e teko 'yzygwar pupe wà nehe.

Tuwe nupuner pixik kwaw a'e wi uhemaw rehe wà nehe.

11 Tuwe hemu'em ma'e nuiko kwaw ikàg ma'e romo wà nehe.

Tuwe ikatu 'ymaw wekar awa ipuruzukaiw ma'e oho wà nehe. Tuwe umumaw a'e awa wà nehe.

12 O Tupàn Tuweharupi Wiko Ma'e, erezekaiw hemetarer 'ym ma'e wanehe ne. Akwaw nezekaiw paw ihe.

Erepytywà ma'e hereko 'ymar ne wà no.

13 Teko nereruzar har a'e wà nehe, umume'u putar nekatu haw a'e wà nehe.

Wiko putar nepyr tuweharupi wà nehe.