1 O Tupàn Tuweharupi Wiko Ma'e, herenu pe newe heze'eg mehe nehe.

Ezeapyaka katu hereminoz rehe nehe.

Ewazar heze'eg ihewe nehe, ta'e neretyryk kwaw neremiaihu wanuwi ne xe. Nekatuahy ne.

2 Aiko neremiruze'eg romo ihe. Ezepyk zo herehe heremiapo kwer hekuzaromo nehe.

Xo ne zo nekatu. Naheta kwaw amo ikatu 'ym ma'e iapo 'ymar a'e wà.

3 Heàmàtyry'ymar herekar tuweharupi a'e.

A'e mehe hereityk tuwe a'e.

Hemunehew kar zemunehew paw tatainy hereko 'ymar pupe.

Aiko teko kwehe umàno ma'e kwer wazàwe ihe.

4 A'e rupi apytu'u wewera'i hezeagaw re ihe kury.

Hepy'a ukyze tuwe hemàno àwàm wi.

5 'Ar upaw ma'e kwer wanehe hema'enukwaw.

Hema'enukwaw neremiapo kwer paw wanehe.

Nahereharaz kwaw neremiapo kwer wanuwi.

6 Aupir hepo nerenataromo newe heze'eg mehe.

Aiko ywy uxinig ma'e ài. Uputar tuwe 'y a'e. Nezewegatete uruputar tuwe ihe no.

7 O Tupàn Tuweharupi Wiko Ma'e, ewazar heze'eg ihewe na'arewahy nehe,

Ta'e nàro kwaw ikatu ma'e ihe kury xe.

Ezeàmim zo ihewi nehe.

Nezewe mehe naiko kwaw

Umàno ma'e kwer wapyta haw pe wezyw ma'e wazàwe ihe nehe.

8 Azeruzar nerehe.

Emume'u nepuruamutar katu haw ihewe tuweharupi nehe.

Heze'eg uzeupir newe.

Exak kar herape ràm ihewe nehe.

9 O Tupàn Tuweharupi Wiko Ma'e, hepyro pe heàmàtyry'ymar wanuwi nehe,

Ta'e aexak herehe nezekaiw paw neinuromo ihe xe.

10 Ereiko hezar romo.

Hemu'e pe neremimutar iapo haw rehe nehe.

Tuwe nerekwe ikatu ihewe nehe.

Tuwe hereraha pe ikatu ma'e rupi nehe.

11 Hemuigo kar wiwi neremimume'u kwer rupi nehe, o Tupàn Tuweharupi Wiko Ma'e.

Nekatu ne. A'e rupi hepyro pe ma'erahy heremipuraraw wi nehe.

12 Ezuka heàmàtyry'ymar ne wà nehe, ta'e heamutar katu pe ne xe.

Emumaw herehe ipuruzuka wer ma'e ne wà nehe, ta'e aiko neremiruze'eg romo ihe xe.