1 Tupàn Tuweharupi Wiko Ma'e wiko itahu zàwenugar hemimaw romo a'e. Pemume'u ikatu haw nehe.

Hemuàgà'ym zeàmàtyry'ymawhu pe a'e.

Hemu'e heàmàtyry'ymar waàmàtyry'ymaw rehe.

2 Itahu zàwenugar hemimaw romo hekon a'e. Tàpuz imuàtà pyrer hepyro har romo no.

Hemim ikatu 'ymaw wi. Hemunyryk kar zemunehew paw zàwenugar wi no.

Hemim u'yw wi purumimaw zàwe.

Azeruzar hehe ihe, herehe izekaiw haw rehe ihe.

Omono ywy nànànar hepuner haw iwy pe wà.

3 O Tupàn Tuweharupi Wiko Ma'e. Teko umàno amo 'ar mehe upaw rupi a'e wà. Nuiko kwaw ikàg ma'e romo wà.

Màràzàwe tuwe nema'enukwaw wanehe. Màràzàwe tuwe erezekaiw wanehe.

4 Teko nuzawy kwaw pytuhemaw wà.

Waneko haw nuzawy kwaw ma'e'àg kwerupi ukwaw ma'e wà.

5 O Tuweharupi Wiko Ma'e, ewàpytymawok ywak newezyw pà nehe.

Epokok ywytyruhu wanehe nehe. A'e mehe ywàtàxiner uhem putar wanuwi nehe.

6 Emur kar iweraw paw neàmàtyry'ymar wamuhàmuhàz pà nehe.

Emomor neru'yw wamuzàn kar pà nehe no.

7 Ereiko ywate. Epyho nepo nehe.

Herenuhem pe yryhu ohoete ma'e wi hepyro pà nehe.

Hepyro pe nerehe uzeruzar 'ym ma'e wapuner haw wi nehe,

8 ta'e numume'u pixik kwaw ze'eg azeharomoete har a'e wà xe.

Hemu'em wà. Umume'u mua'u uze'eg wà.

9 Amuzàg putar amo zegar haw ipyahu ma'e newe nehe, o Tupàn.

Amupu putar hewioràwiràn 10 ihàm hereko har nehe, nekatu haw rehe hezegar pà nehe.

10 Ereityk kar waàmàtyry'ymar tuwihawete wanupe ne wà.

Erepyro neremiruze'eg Tawi imàno haw wi no.

11 Hepyro pe heàmàtyry'ymar purupe ma'erahy ipuraraw par wanuwi nehe.

Hemunyryk kar pe nerehe uzeruzar 'ym ma'e wapuner haw wi nehe, ta'e numume'u pixik kwaw ze'eg azeharomoete har a'e wà xe.

Hemu'em wà.

Umume'u mua'u uze'eg wà.

12 Zanera'yr wà nehe, tuwe wiko ma'e itym pyrer ikàg ma'e ài wakwàkwàmo mehe wà nehe.

Tuwe zanerazyr wiko izita ita iapo pyrer

Tàpuzuhu henataromo har ài tàpuzuhu imupuràg eteahy kar har ài wà nehe.

13 Tuwe tàpuz zaneremi'u ràm hyruhu tynehem temi'u tetea'u pupe nehe.

Tuwe zanereimaw zaneko pe har imemymemyr tetea'u wà nehe no.

14 Tuwe tapi'ak uzemueta tetea'u wà nehe.

Tuwe tapi'ak kuzà nuexak kar kwaw umemyr umàno ma'e kwer romo wà nehe.

Tuwe teko naheiheihem kwaw uzemumikahy haw rehe nahu rupi zanereko haw pe wà nehe.

15 Hurywete teko amo ywy rehe har wà, aze wereko a'e ma'e paw wà.

Hurywete amo teko wà, aze wereko Tuweharupi Wiko Ma'e uzar romo wà.