1 Waŋganymirrinydja waluyu maṉḏa nhina gupa‐waŋa * MosesMawtjitjnha, nhanukalaynha wal'ŋu yapa'mirriŋuyu † MiriamMiriyamdhu ga wäwa'mirriŋuyu ‡ AaronYärundhu, maṉḏa nhina waŋa ŋarrtjun ŋanya Mawtjitjnha, liŋgu maṉḏa yaka ḏukṯuk miyalkku ŋuriki nhanukalaŋuwu, ŋunhi ŋayi Mawtjitjthu märraŋala mulkurunha miyalknha, wiripuŋuwuynha wäŋawuynha. 2 Bitjanna maṉḏa nhina waŋanharamirrinydja gam'. “Nhä ŋayi dhuwala Mawtjitjtja? . . . yindina buŋgawa? . . . ŋayipi waŋgany marŋgi dhärukku Garraywunydja? Ŋitjalaŋgala muka wiripunydja ŋayi ŋuli Garray waŋi.”

3 Mawtjitjthunydja ŋäkula warray maṉḏanha, yurru yakana ŋula ŋayi waŋana buku‐ruŋiyinmaraŋalanydja, liŋgu buku‐ruŋinyamiriwnha ŋayinydja ŋunhi yolŋu Mawtjitjtja, biyapulnha wal'ŋu gurrum'thunaramirri. 4-5 Bala ŋayinydja marrtjinana Garraynydja ŋurikalayi walalaŋgala ḻurrkun'kala, bala waŋana bitjarrana, “Gatjuy, nhuma yurru wäŋgaŋa walala djunuma ya', ŋunhamala Withiyanminyarawuylili Buṉbulili,” bitjarra. Bala yana walalanydja wäŋgaŋalana, ga ŋunhalana ŋayi Garray bunana walalaŋgu maŋanmirrinydja; ŋayi yukurrana djingaryurrunanydja galki dhurrwaraŋura Buṉbuŋura, bala ŋayi waŋana wäthurruna maṉḏaku bitjarrana, “Miriyam ga Yärun, go lili marrtjiya maṉḏa ŋarrakala.” Bala maṉḏanydja marrtjina withiyarana Garraynhana.

6 Ga ŋayinydja Garraynydja waŋanana maṉḏanha bitjarrana, “Ŋäka maṉḏa ŋi! Ŋunhi ŋarra ŋuli wiripuŋuwalanydja yolŋuwala waŋi marrtji, ga maḻŋ'maranhamirri ŋarra ŋuli bukaway'kurru, ga mel‐yurthi ŋayi ŋuli ŋarranha yana. 7-8 Yurru Mawtjitjtja wiriputhirri warray yukurra, ganaŋ'thun warray, liŋgu bukmak nhä malanha ŋarrakuway nhanukalana ŋorra yukurra goŋŋura; nhanukalanydja ŋarra ŋuli Mawtjitjkalanydja waŋa dhunupa warray wal'ŋu, ga liŋguna ŋayi rumbal ŋarranha nhäŋalana. Nhumanydja bini ŋunhi barrarinyana bitjanarawu ŋarrtjunarawu nhanŋu, liŋgu ŋayinydja ŋunhi ŋarralaynha wal'ŋu yolŋu.”

9 Yo, Garraynydja ŋunhi wirrkina ŋaramurrthina maṉḏaku, bala ŋayi gonha'yurrunana. 10 Ga ŋunhi ŋayi maŋandja bena‐wala winya'yurrunana, bala biyapulnydja walala nhäŋala Miriyamnhanydja rirrikthunarana, rumbalnydja marrtjina gaywaraŋu'thinana be nhäyuna rerriyu, burrpuy'mirriyinana marrtjina. 11-12 Nhäŋalanydja maṉḏa ŋanya, djunuma waŋanana ŋayi Yärundja Mawtjitjkalana, “Buku‐djulŋi, yaka ŋinyalanha dhä‐ḏir'yurra. Ŋilinyuway yana yätjthinanydja; yätj mirithirri ŋilinyu bitjarrayinydja djäma. Ma' buku‐djulŋi, baḏarraŋ'kuŋana ŋanya.”

13 Bala dhunupa Mawtjitjtja wäthurruna Garraywuna, “Garray gay', baḏarraŋ'kuŋa ŋanya go,” bitjarra.

14 Yurru ŋayi Garraynydja waŋana Mawtjitjkala bitjarra. “Yätj dhuwali ŋayi djäma; yarrkthun ŋayi yurru dhiyaŋunydja‐wala dhipuŋuru nhumalaŋgalanydja, ŋunhamala dhawaṯthun ŋayi yurru warraŋullili wäŋalili, ga ŋunhala bili ŋayi yurru nhina yukurra gäna, yana liŋgu ga waŋgany rulu ga märrma' bäythinyara walu boŋguŋu djuḻkthunmaraŋu, yurruna ŋayi boŋguŋu roŋiyinydja lili baḏarraŋ'nha.”

15 Djuy'‐way Miriyamnhanydja dhawaṯmaraŋalana ŋuliŋurunydja wäŋaŋuru, ga walalanydja ŋunhi § IsraelYitjuralpuyŋunydja yolŋu'‐yulŋu yukurrana mukthurruna yana nhinana, galkurruna yukurrana nhanŋu Miriyamgu; yakana walala giṯthurruna ŋuliŋuru wäŋaŋurunydja, yana liŋgu ga roŋiyina ŋayi Miriyam liŋguna baḏarraŋ'nha.

16 Bala ŋuliŋurunydja dhurrwaraŋuru walala giṯthurrunana, marrtjinana‐wala yukurrana ga‐ga‐ga‐ga‐a‐a, ga ŋunhaŋga yana ŋanhdharkka wäŋa ŋupara, ga nhäyika wäŋaŋura ŋunhala * ParanBarrandja dhuṯ‐gay' nhinanana walala, wäŋaraŋala ŋunhilinydja, galkina yana ŋurikina wäŋawu ŋunhi Garrayyu dhawu'mirriyaŋala walalaŋgu.