97
Godtja biyapulwala wal'ŋu wiripu‐guḻku'walanydja waŋarrwala
97:1–12 (God is greater than all other gods)
1 Yo, Garraynydja dhuwala buŋgawa ŋayi wal'ŋu.
Biyaka goŋmirriyaŋa wokthurrana manaparra nhuma munathany'tja wäŋa,
ga nhumanydja ŋunhi nhuma nhina yukurra gapuŋura ga runu'‐runuŋura, biyaka galŋa‐djulŋithiyana gal'ŋu.
2 Garraynydja yukurra nhina dhika dhapirrk warray wal'ŋu yana ŋayipinydja,
bitjan ŋayi yukurra ŋäkirrmaranhamirrinydja ŋanyapinyay ŋayi ŋuriŋina waŋupini'yuna,
ga nhinanydja ŋayi yukurra ŋunha be‐wala djiwarr'ŋura wal'ŋu,
gämanydja ŋayi marrtji dhuwala wäŋanha munatha'nha goŋdhunydja nhanukalay ŋayi.
3 Nhinanydja ŋayi yukurra ŋunhiliyi dhunupa wal'ŋu yana,
ga ŋuliŋuruyi nhanukala yukurra marrtjinydja gurthana dhawaṯthundja,
nhäranhamaramana yukurra ŋunhi miriŋunhanydja nhanŋuway,
ga yakana ŋula waŋgany walŋanydja.
4-5 Ŋuliŋuruyi nhanukala dhawaṯthun yurru bitjan djaḻka'‐djaḻkarryunna,
ga ṉilŋṉilŋdja ŋunhinydja yurru wärakkumana mulka ŋuriŋi birrka'mirrina wäŋa;
Ŋayi yurru munatha'yunydja wäŋayu nhämana, bala marrmarryunmirrina,
bala barr'‐barryunna yurru buku'‐wukunydja wäŋa, buḻwaŋ'thunna marrtji gumurrŋura nhanukalanydja Garraywalanydja,
ŋunhi ŋayi yukurra nhina ŋunha Garray wal'ŋu ŋayi ŋurruŋu dhiyaku munatha'wu warrpam'ku yana.
6 Bukmakthu ŋuruŋunydja gärakpuyyunydja walalay bitjan ganyu'yu ga ŋaḻindiyu dhika nhäyu ḻakaramana ŋanya yukurra,
ŋunhi ŋayinydja rom dhunupa wal'ŋu yana,
ga bukmakthu buku‐ḻiw'marama wäŋaŋuru miṯtjiyunydja yukurra nhämana ŋunhi dhapirrktja dhikanydja ŋanyanydja djarraṯawun'.
7 Yo, ŋunhinydja walala ŋunhi walala yukurra buku‐ŋal'yun wiripuŋuwu waŋarrwu ga ŋula nhäku maḏayin'kunydja, walalanydja yurru goramirriyirrina,
liŋgu birrka'mirri waŋarr malanha yurru buku‐nyilŋ'thun nhanŋuwaynha yana waŋganyguna Garraywuna.
8 Yo, yolŋu walala ŋunhi * JerusalemDjurutjalambuy wäŋawuy yukurra mirithirrina yana ŋayaŋu‐djulŋithirrina,
goŋmirriyirrina yukurra nhina ḻiw'marama ŋunhi wäŋakurru,
liŋgu nhenydja God yukurra djäma dhunupa warray dhika wal'ŋu.
9 Nhenydja dhuwala ganydjarr‐ḏumurru wal'ŋu God yana, wäŋa‐nininyŋu,
ga nhepi yukurra ŋayathama dhuwala wäŋanha munatha'nhanydja ḻiw'marama yana.
Nhenydja biyapul wal'ŋu djuḻkmarama yukurra yana bukmaknhanydja ŋunhinydja ŋunhi walala ŋuli yolŋu'‐yulŋuyu waŋarr‐ḻakarama yukurra.
10 Yo Garray, nhenydja yukurra märr‐ŋamathirri warray ŋurikinydja yolŋu'‐yulŋuwu ŋunhi walala yukurra ŋuyulkthirri nyinyaŋdhun yätjku;
Nhepi ŋuli gunganhamirriyamanydja walŋakumanydja walalanha, ŋunhi nhuŋuwaynydja gal'ŋu yolŋu'‐yulŋunha,
märrama nhe ŋuli dhawaṯmarama walalanha ŋuliŋurunydja goŋŋuru yätjkalanydja.
11 Nhe ŋuli djarraṯawun'kumana dhukarrnydja ŋuriki rom‐waŋganymirriwunydja ŋayaŋu‐dhunupamirriwunydja yolŋu'‐yulŋuwu,
märr yurru walala nhina ŋayaŋu‐djulŋithirrina, goŋmirriyirrina dhikana wal'ŋu.
12 Yo, biyaka galŋa‐djulŋithiya wirrki wal'ŋu yana nhumanydja ŋunhi ŋayaŋu‐dhunupamirrinydja.
Ŋayaŋu‐djulŋithiya yana Garraywalanydja,
ga buku‐wurrpala wekaŋa nhanŋu,
liŋgu ŋayinydja ŋunhi gäna wal'ŋu, ḏarrtjalk yana ŋayi Garray.