3
Paulo ina nuwonúwana
da Korinta idi livisi manuna
da Korinta idi livisi manuna
1 Tuwo moitamo, segowo, boi taiyao takaaiyaka go, yau geya itoboineguta bei avatulukoimi nakae Baloma Kimaasabaina ina tomotao avatuulukoidi. Go sem guna vatulúkwana nakae neta komi sakava sinapuna ina tomotao avatuulukoimi o nakae neta komi imi numisa Guyau goi memeya nakae avatuulukoimi. 2 Geya itoboinemita bei awoinu kokáika. Tuwo nunu kaka avanimmi, awoinu geya go, ame tuta nakae; nava geya itoboinemita awoinu kokáika.† Ibe 5:12-13; 1Pi 2:2. 3 Moitamo. Komi nava sakava sinapuna ina tomotao. Yaimi goi vakipikipi be aumakimaki sikaaiyaka. Moe sakava sinapuna ina tomotao idi guinuwa nakae ae? Nakae komi tomota kaka nakae kooketoiya ae? 4 Maniyemi kami,
‘Kai Paulo ina boda.’
O maniyemi kami,
‘Kai Apolosi†a Gui 18:24, 19:1; 1Ko 1:12, 3:5,22, 4:6, 16:12; Tai 3:13. ina boda.’
Tutayana nakae kobóbwara, e imi sinapu goi komi sakava tomotaimi ae? Moe pasina tauna geya itoboineguta awoinu avakanimi.†b 1Ko 1:12.
5 E imi tavilei pasina kobágala. Moe nakae kobóbwara go, yau kagu,
‘Apolosi be yau kokilaagasima go, Apolosi avatau? Yau avatau?’
Kai tovaita tauna, e ima talavaita goi konumisa. Ama taiyuwokova ida Tomoya ikawoima bei kapaisewa go, ima paisewayadi to kaguinuwedimo. 6 Nakae yau tobágula,†a Gui 18:4-11. Apolosi bwae ana tosiwo,†b Gui 18:24-28. go sem kina Yaubada tokikakainaki. 7 Tauna yau tobágula be kina Apolosi bwae ana tosiwo giyaiima, go sem Tauyana gagaina moe Yaubada tokikakainaki. 8 E yau tobágula be Apolosi bwae ana tosiwo nuwoma tayamo. E nakonakae kai tamo tamo ima poisógana adi kakainaki, ama taiyuwokova ama vaiwówana bei kababanedi. 9 Moe moitamo. Apolosiyana guna tosavaiyuwo ama taiyuwokova Yaubada ina kitomyao go, komi ina tánuwo be nakae ina vada.
10 Yaubada ina kanuwóiya bogina ivinigu bei itoboinegu Tauyana manuna apaaisewa. Tuwo anuwoiyayana goi yau yówana ana tokatanaki nakae dako tayamo akaudakodako go, yatana, e ituli ta tomotava siyówana. Go komi tamo tamo korugwāusi manakaemi dakoyana yatana goi koyówana. 11 Moitamo ame dakoyana yatana koyōwo. Geya vatau tayaamo itoboine ituli ta dako idako. Dako tayamo ikaaiyaka bogina adako; dakoyana moe Yeisu Guyau. 12 E kita tamo tamo ida yógana ituli ituli dakoyana yatana goi tayówana. Yoganayadi dedevidi moe goura o siriba o gurewa dedevidi; yoganayadi goyogoyoidi moe alova o limou o átava. Tutayana dako yatana tayówana, 13 e kita tamo tamo ida paisewa adi dedevina bei tayagoidi. Moitamo. Tomoya ina Maliyalina goi bei ima ida paisewa ikaiwoduwedi go, nakona dedevidi, nakona goyogoyoidi. Unana ida paisewayadi yeu bei igabukonedi, e itoboineda paisewayadi tamo tamo takinanedi nakonakae. 14 Neta ida paisewayadi nava dedevidi dako yatana sikaaiyaka, e ada vaiwówana bei tababane. 15 Neta ida paisewayadi sigoyo, bei igabusavedi. Ada vaiwówana bei geya tababaneeta. Moitamo ada yava bei tababane go, ada yavayana nakae neta vada igabugabu goi yawoida tasiyae.
16 Manakae? Geya koyagoiyeta kita Yaubada ina Vada Kimaasabaina? Nakae Yaubada Balomaina yaida goi ikaaiyaka?† Rom 8:9, 14:7-8; 1Ko 6:19; 2Ko 6:16; Epe 2:21-22; Ibe 3:6. 17 Avatauwa neta Yaubada ina Vada Kimaasabaina sikaigoyai, Yaubada bei ikaigoyaidi. Bogina koyagoi. Ina Vadayana moe kimaasabaina, e vadayana moe kita.
18 Taabu toinimi kokatuubaūmi kami,
‘Kai ame tuta tonanamsa da poyapoya matadi goi.’
Moe nanamsayana kokalāve go, kotagōna tomota sivayokoimi komi kudukudupatumi bego nanamsa toina kobabane. 19 Guna nuwonúwana ataligei. Da poyapoya adi nanamsayana moe geya basabasainamo Yaubada matana goi. Gínina Kimaasabaina nakae italavaite kana,
‘Tomota maniyedi sinuwonúwana madi nanamsa go,
manudi Yaubada ina síkwana ilave,
e toinidi idi nuwosinapu goi isikoidi.’
Yobi 5:13
20 Aiyuwoina kana,
‘Yauwe tonanamsa bogina iyagoidi
bego idi nuwogauyadi geya basabasaidimo.’
Same 94:11
21 Tauna, tomota manudi taabu kouyawana gagāgasa kami,
‘Kai Paulo ina boda.’
O kami,
‘Kai Apolosi ina boda.’
Kaga liliuna nakae kai moe komi ami dedevina manuna. 22 Nakona yau o Apolosi o Kepasi, kai ami tovaitayao. Poyapoya ana madabokina o yawoimi o imi kámasa o kaga ame tuta sikaaiyaka o kaga nava bei sima, kaga liliuna moe komi ami dedevina manuna bogina. 23 E komi moe Guyau ina bodao. E Guyau moe Yaubada ina boda. Tauna koroto manudi taabu kouyawana gagāgasa kami,
‘Yau tomota tayamo ina boda.’
†a3:4 Gui 18:24, 19:1; 1Ko 1:12, 3:5,22, 4:6, 16:12; Tai 3:13.
†a3:6 Gui 18:4-11.
†b3:6 Gui 18:24-28.
†3:16 Rom 8:9, 14:7-8; 1Ko 6:19; 2Ko 6:16; Epe 2:21-22; Ibe 3:6.