3
Diyuu kapipiilovaidi go, Yaubada aba numisa
1 Tauna nakona tomota tayamo bei ikaumakimaki kana,
‘Neta sakava ana kúpwana geya ivaitedeta go, Yaubada iuyaoneda, kaga ana dedevina kita Diyuu? O sakava ana kúpwana kaga basabasaina?’
2 Kita Diyuu moe ada dedevina gagaina toina! Dogoi badabadaidi Yaubada iguinuwedi kita Diyuu yaida goi go, dogoi gagaina moe tubudao ikawoidi bei ina katótula Eberamo yaina sikabikaonedi be sitalavaitedi tomota liliudi yaidi. 3 Go tubudaoyadi maniyedi geya aba numisa geya, tauna Yaubada ina kanasíuna sikapipilave. Moe manuna manakaeda tanuwonúwana? Kada,
‘Diyuu maniyedi adi kawoiyana goi geya aba numisa geya, tauna Yaubada nakae geya aba numisa geya’?
4 Geya, geya toina! Yaubada aba numisa, sopana be ina guinuwa sivavasa! Nakona tomota liliudi sipola o tadigo kada, ‘Sopadi be idi guinuwa ituli ituli’ go, tuwo Yaubada aba numisa, sopana be ina guinuwa sivavasa! Moe moitamo ina liuna manuna nakae. Moe tayagoi unana boi nimatu Gínina Kimaasabaina goi Devida igini ina goyo ana liuna manuna. Yaubada ina liunayana manuna Devida Yaubada ilatuwoko kana,
‘Tomota bei sikamoitamoem
bego kom im bóbwara im liuna manuna kukibobosidi.
Nakae im kotu goi tomota geya itoboinedita
sitakinoim kadi,
“Im lovina liuna manuna kom geya kukivavaseta.” ’
Same 51:4
5 E tomota maniyedi sidigo kadi,
‘Yaubada tuta liliuna iliiuneda ida kapipilovayadi manudi. Tauna ida kapipilovayadi goi tomota itoboinedi sigitedoko Yaubada ina bóbwara ikibobosidi.’
Neta ida kapipilova goi Yaubada ina kibobwata ikaiwoduwe, manakaeda? Kada,
‘Yaubada ibágala tutayana ida kapipilovayadi pasidi ina egamogamogu goi iliuneda’?
(Ame nakae tomota maniyedi idi nuwonúwana.) 6 Geya, geya toina! Neta kita Diyuu geya itakinoideta ida kapipilovayadi manudi, bei manakaena da poyapoya idi kapipilova manudi itakinodokoidi? Geya! 7 E nakona tomota tayamo ikaumakimaki idigo kana,
‘Neta yau geya aba numisa geya go, ame guna sinapu goyogoyoinayana goi Yaubada ana Nanamsa Mooitamoina tagitedoko be nakae takinane Tauyana aba taimámina, e moeko goi Tauyana bogina avaite. Tauna geya itoboineeta itakinoigu yau toogoyoigu bei liuna ababane ae?’
8 Moe geya itoboineeta! Neta moe moitamo, itoboineda kada,
‘Bei goyo taguinuwe bego dogoi dedevina isowóduwo!’
Moe nakae tomota maniyedi sitagiwoigu be nakae sidigodigo bego yau nakae aabobore. Tauyadi Yaubada itoboine itakinoidi toogoyoidi bei liuna sibabane.
Diyuu be nakae Totuyoyowo sivavasa madi goyo
9 Tauna manakaeda? Kita Diyuu kidi Totuyoyowo Yaubada matana goi tadedevinasavedi? Geya, geya toina! Mae bogina atalavaita tomota liliuda, Diyuu be nakae Totuyoyowo, sinapu goyo ina togaga iyowóida. 10 Moe nakae Gínina Kimaasabaidi sidige, kadi,
‘Geya vatau tayaamo kiboobosina Yaubada matana goi,
geya toina!
11 Geya vatau tayaamo iyagoi nako dedevina.
Geya vatau tayaamo isokikina Yaubada yaina geya.
12 Madabokidi Yaubada situgavile.
Nakae tauyadi geya basabasaidimo Tauyana yaina.
Geya vatau tayaamo yabobona iguinuwe,
geya toina!
Same 14:1-3, 53:3
13 Tobudi valiwoga katupaaevaina nakae,
tauna idi bóbwara ibówana.
Maedi goi sipolapola.
Same 5:9
Sopadi goi moteta bolaausina nakae,
e idi bóbwara goi tomota sikaogoyoedi.
Same 140:3
14 Tauyadi tobudi atubolata
be kubukasa goi sikaayaoda.
Same 10:7
15 Madi uyáwana latuwodi sina sikaumata.
16 Ava dadava goi neta sinonoina,
tomota sikaigoyaidi be siyogedegededi.
17 Ago tuboina ana kenao,
moe geya siyagoiyeta.
Aiseya 59:7-8
18 Tauyadi sinuwonúwana kadi,
“Yaubada geya kamatoiteeta.” ’
Same 36:1
19 E tayagoi bego kaga Yaubada ina Katukedayana idige, tauyadi Diyuu Atukeda ikaukaabolidi ivadigoidi. Moe bego tomota liliuda sopada ikaupatudi be nakae da poyapoya liliuda Yaubada ina kotu goi ida goyo tatalaseyanedi. 20 Tauna Atukedayana ana guinuwa goi geya vatau tayaamo kina Yaubada bei ivayoko kina kiboobosina.†a Sam 143:2; Gui 13:39; Gal 2:16. Atukedayana ina paisewa moe bego tayagoi goyo kaga. Ame tauna.†b Rom 7:7.
Yaubada ina kibóbwata
Yeisu aba numisa ina kabikáwana goi ikaiwoduwe
Yeisu aba numisa ina kabikáwana goi ikaiwoduwe
21 E ame tuta goi Yaubada ina kibóbwata ina kanasíuna manuna ikaiwoduwe yaida. Go geya kada kita ina Katukedayana taguuinuwe goi ikaiwoduwe geya. (Go ina kibobwatayana boi Mosese be nakae Yaubada ina tokabivalavalayao liliudi idi buki goi‡ Mosese be nakae Yaubada ina tokabivalavalayao liliudi idi buki goi: Buki Aba Vatowo, Tateta, Vininabeso, Yoyowo be nakae Atukeda moe Mosese iginidi. Bukiyadi Diyuu sivayoudi Yaubada ina Katukeda. sitalavaite). 22 Ina kibobwatayana moe Yeisu Guyau aba numisa ina kabikáwana goi ikaiwoduwe kita ana tonumisayao madabokida manuda.†a Rom 1:17; Gal 2:16, 3:22. Moe moitamo. Madabokida tavavasa Yaubada matana goi.†b Rom 10:12; Gal 3:20; Kol 3:11. 23 Madabokiida, Diyuu be Totuyoyowo, bogina tagoyo, e Yaubada ana káeyana tomoeeyalina tapoikiki bego yaida goi itakanukanunu go, geya itoboinedeta. 24 Ago mana kanuwóiya ina yabobona goi madabokiida ivayokoida kita kiboobosida. Ame nakae: Guyau Yeisu ina kámasa goi itateteda. 25 Yeisuyana Yaubada ikasale, e ikaikaina goi be nakae ina kabikáwana aba numisa goi kita ada kaba núwala.† Tat 25:17-22, 37:9; Rom 3:25; Ibe 9:5; 1Iy 2:2, 4:10. Nakae Yaubada iguinuwe bego ina kibóbwata ina kanasíuna manuna ikaiwoduwe unana ida goyo boi mainao bogina taguuinuwedi mana mesayágana ituuyouyoidi. 26 Nakae iguinuwe bego ina kibobwatayana ina kanasíuna manuna ame tuta ikaiwoduwe, e bei Tauyana tokivavasa, tuwo avatauwa neta aba numisa Yeisu nakae, bei ivayokoidi kidi kiboobosidi.
Yauwe Diyuu be Totuyoyowo
idi Yaubada tayamo idi numisa tayamo pasina
idi Yaubada tayamo idi numisa tayamo pasina
27 Tauna ida gágasa manakae? Kita Diyuu itoboineda tagágasa bego Totuyoyowo tatobusavedi? Geya! Gagasayana Yaubada bogina isanabode, tauna geya itoboineeta. Enao vau bogina isowóduwo. Neta nakae, Yaubada ina Katukeda ana kamoitamo manakaena isowóduwo? Atukedayana ana guinuwa goi? Geya, go sem numisa goi. 28 Moitamo. Yau ayagoi numisa pasina Yaubada ivayokoida kita kiboobosida go, geya ina Katukeda ana guinuwa pasina geya. 29 Go neta moe geya moitamo, manakae? Yaubada kita Diyuu adetava ida Yaubada? Geya! Tauyana Totuyoyowo idi Yaubada nakae ae? U. Tauyana Diyuu be Totuyoyowo madabokida ida Yaubada 30 unana Yaubada tayamo toito.†a Atu 6:4. Tauna kita Diyuu sakavaida kuuponidi ida numisa pasina ivayokoida kita kiboobosida be nakae Totuyoyowo sakavaidi geya adi kupwanamo nakae; idi numisa goi ivayokoidi kidi kiboobosidi.†b Gal 3:8,20. 31 Tauna neta Totuyoyowo idi numisa goi ivayokoidi kidi kiboobosidi go, moe geya Atukedayana ana guinuwa goi geya, manakae? Atukedayana ida numisa goi atauwe? Geya, geya toina! Go sem Atukedayana ayatodoko.
†a3:20 Sam 143:2; Gui 13:39; Gal 2:16.
‡3:21 Mosese be nakae Yaubada ina tokabivalavalayao liliudi idi buki goi: Buki Aba Vatowo, Tateta, Vininabeso, Yoyowo be nakae Atukeda moe Mosese iginidi. Bukiyadi Diyuu sivayoudi Yaubada ina Katukeda.
†a3:22 Rom 1:17; Gal 2:16, 3:22.
†b3:22 Rom 10:12; Gal 3:20; Kol 3:11.
†3:25 Tat 25:17-22, 37:9; Rom 3:25; Ibe 9:5; 1Iy 2:2, 4:10.
†a3:30 Atu 6:4.
†b3:30 Gal 3:8,20.