1-2  1Kol 3.6 Ilig 8.16Abolos e Kolin a꞉na elen amio꞉, Fo꞉l e wa꞉l toga ya꞉la꞉ga꞉,* Hen we Iliga꞉fo꞉ 18.23 a꞉na sa꞉sa꞉lo꞉ da꞉lab. A꞉fesa꞉s a꞉na fa꞉la꞉dowakiyo꞉, tilidabu kaluka꞉isale nolo꞉ a꞉na galilia꞉sa꞉ga꞉, imo꞉wo꞉ a꞉la꞉dabu ba꞉ba꞉, “Gio꞉ ho꞉gi tilidabu amio꞉, Godeya꞉ Mamayo꞉ a꞉namio꞉ dio꞉?” To a꞉no꞉ da꞉da꞉sa꞉ga꞉, iliyo꞉ a꞉ma꞉la꞉bo꞉ a꞉la꞉sio꞉, “A, Godeya꞉ Mamayo꞉ a꞉lab a꞉la꞉bo꞉, nio꞉ mo꞉dabu.”

3 A꞉la꞉sa꞉labikiyo꞉, Fo꞉l eyo꞉ a꞉la꞉dabu ba꞉ba꞉, “Gio꞉ ho꞉n amio꞉ wangabi to꞉lolo꞉wo꞉?”

Iliyo꞉ a꞉ma꞉la꞉bo꞉ a꞉la꞉sio꞉, “Nio꞉ Yo꞉na꞉lo꞉ to꞉lolan man a꞉no꞉ ko꞉lo꞉ di.” 4  Madi 3.11A꞉la꞉sa꞉labiki Fo꞉l eyo꞉ imo꞉wo꞉ a꞉la꞉sio꞉, “Yo꞉na꞉lo꞉ to꞉lolo꞉ a꞉no꞉ kaluka꞉isaleyo꞉ asugo꞉ nodola꞉sa꞉ga꞉, Godeyo꞉ ko꞉lo꞉ kudu hamana꞉ki, a꞉na to꞉lolo꞉. A꞉la꞉ta꞉ga꞉ Yo꞉n eyo꞉ kalu ni fa꞉s amilo꞉ mia꞉nigab a꞉no꞉ ko꞉lo꞉ tilida꞉da꞉bi a꞉la꞉liki wido꞉ ko꞉lo꞉, kalu elo꞉ sio꞉ a꞉no꞉, Ya꞉suwo꞉ o꞉m.” 5 To a꞉no꞉ da꞉da꞉ga꞉ dowabiki, iyo꞉ Ya꞉su Kelisowa꞉ wiya iliki, ho꞉na to꞉lolo꞉. 6  Ilig 8.17, 10.44,46Fo꞉l e dagiyo꞉ ili wa꞉la dia꞉tabiki, Mama Malilo꞉ a꞉no꞉ i amio꞉ a꞉na dowakiyo꞉, iyo꞉ towo꞉ ko꞉li ko꞉lilo꞉ tolaki, Godeya꞉ mano꞉ a꞉na wido꞉. 7 Kalu a꞉namilo꞉ seno꞉ kugula꞉fo꞉.

8 Fo꞉l e Yu kaluwa꞉lo꞉ tolo꞉ wida꞉sen aya ha꞉na꞉sa꞉ga꞉yo꞉, Godeya꞉ enedo꞉ kaluka꞉isale ko꞉lo꞉ bo꞉fo꞉lab man a꞉no꞉ widaki, kaluka꞉isaleyo꞉ to elo꞉ a꞉no꞉ tilidabuma꞉kiyo꞉, e ele otalen a꞉namio꞉ halale wida꞉len. 9 Ko꞉sega kalu nolo꞉ asulo꞉ ililo꞉wo꞉ halaidaki gola dowakiyo꞉, iliyo꞉ Alana꞉ man a꞉namio꞉ mogago꞉ towo꞉ kalaba sio꞉. A꞉la꞉gabiki, Fo꞉l eyo꞉ iyo꞉ a꞉na ta꞉ta꞉ga꞉yo꞉, tilidabu kaluka꞉isale o꞉lia꞉yo꞉ egele ha꞉na꞉sa꞉ga꞉, ho꞉leno꞉ tambo amio꞉ Tilanusa꞉ sugululo꞉ aya siliki, nenela꞉len. 10 Donayo꞉ a꞉la꞉ us a꞉namio꞉, to a꞉no꞉ko꞉ nenela꞉li sen ko꞉lo꞉, Yu kalu o꞉lia꞉ Gilig kalu o꞉lia꞉yo꞉ A꞉sia hen a꞉namilo꞉ sen a꞉no꞉ Alana꞉ to a꞉no꞉ tambo dabu.

11  Ilig 14.3A꞉la꞉ta꞉ga꞉ Gode eyo꞉ Fo꞉l eya a꞉la꞉ta꞉ga꞉yo꞉ molo ha꞉na꞉no꞉ ko꞉li ko꞉lilo꞉ dimido꞉. 12  Ilig 5.15A꞉la꞉go꞉ko꞉lo꞉ ha꞉fa꞉fdo꞉ halan helebeso꞉g o꞉lia꞉, nanog diakilo꞉ ka꞉lan helebeso꞉g a꞉no꞉lia꞉yo꞉, Fo꞉l amilo꞉ golo꞉ a꞉no꞉ dia꞉ha꞉na꞉sa꞉ga꞉, walaf kaluka꞉isalemo꞉wo꞉ dimiab amio꞉, iyo꞉ falele alifelo꞉ a꞉la꞉ta꞉ga꞉ nolo꞉ mama mogago꞉ dowo꞉ a꞉no꞉ sili alifo꞉gane. 13 Yu kalu nolba꞉yo꞉ mama mogago꞉wo꞉ o꞉lu ga꞉fela꞉li sia꞉sen ko꞉lo꞉, o꞉g a꞉namio꞉ iyo꞉ Ya꞉su Kelisowa꞉ wiyo꞉ da꞉fe ba꞉dakiyo꞉, mama mogago꞉ nolo꞉ o꞉luga꞉felaki a꞉la꞉sio꞉, “Fo꞉l elo꞉ Ya꞉suwa꞉ wi ko꞉lo꞉ wido꞉ a꞉na ilikiyo꞉, mama mogago꞉ ge hamana,” a꞉la꞉sio꞉.

14-15 Bobalo꞉ so꞉mea꞉sen misa꞉ kalu nowo꞉ ene wiyo꞉ Sigeba, ene so꞉wa doma꞉la꞉fo꞉ a꞉ma꞉yo꞉ a꞉la꞉dimidabikiyo꞉, mama mogago꞉ nolba꞉yo꞉ imo꞉wo꞉ a꞉la꞉sio꞉, “Ne Ya꞉suwo꞉ asulo꞉. A꞉la꞉ta꞉ga꞉ Fo꞉l elo꞉ dimido꞉wo꞉ dabu. Ko꞉sega kalu ge o꞉ba?” 16 A꞉la꞉sa꞉labiki kalu mama mogago꞉lo꞉ dowo꞉ a꞉ma꞉yo꞉ i o꞉lia꞉ alan bubaki, kalu doma꞉la꞉fo꞉ i a꞉no꞉ yame tandea꞉sa꞉ga꞉, helebeso꞉go꞉ tambo bidila꞉ ko꞉lo꞉, iyo꞉ ho꞉bo꞉lo꞉ a꞉la꞉ta꞉ga꞉ dalaido꞉. 17  Ilig 5.11Yu kalu o꞉lia꞉ Gilig kalu o꞉lia꞉ A꞉fesa꞉sdo꞉ sen a꞉no꞉ tambo, dimido꞉ a꞉no꞉ da꞉da꞉sa꞉ga꞉yo꞉, iyo꞉ tagilakiyo꞉, Ya꞉su Alan a꞉ma꞉ wiyo꞉ wabudaki dulugu sio꞉. 18 A꞉la꞉ta꞉ga꞉ tilidabu kaluka꞉isale modo꞉ a꞉no꞉ kalaba ya꞉sa꞉ga꞉, mogago꞉ dimida꞉len ilido꞉wo꞉ tambo foga꞉le sio꞉. 19 Kalu nolo꞉ fofalo꞉ dimida꞉sen i a꞉ma꞉yo꞉ ene fofalo꞉ dimida꞉sen mo꞉fo꞉s ko꞉lo꞉ kambolola꞉le a꞉no꞉ dia꞉sa꞉ga꞉, tambo siwa꞉la gido꞉. Mo꞉fo꞉s de amilo꞉ gido꞉ a꞉no꞉ mole diano꞉ ililo꞉ o꞉ngo꞉ agelo꞉wo꞉ 50,000 silba o꞉ngo꞉ ko꞉lo꞉ gido꞉. 20 A꞉la꞉do꞉ dimido꞉ a꞉namio꞉, Alana꞉ to we kalab amio꞉ halaido꞉ fa꞉la꞉dowakiyo꞉, kaluka꞉isaleyo꞉ tambo da꞉da꞉li ha꞉na꞉ga꞉ ilido꞉.

21  Ilig 23.11, Lom 1.13A꞉ma꞉ fa꞉s amio꞉, Fo꞉l e Masedonia a꞉la꞉ta꞉ga꞉ Akaya hen a꞉no꞉ tinia꞉liki, Ya꞉lusalem ha꞉na꞉no꞉ asulo꞉. “Ne a꞉na ha꞉na꞉ga꞉yo꞉, Lom a꞉namio꞉lo꞉ ha꞉na꞉no꞉ asulo꞉l” a꞉la꞉sio꞉. 22 A꞉la꞉fo꞉ko꞉lo꞉ Fo꞉l elo꞉ asuwa꞉ta꞉sen kalu a꞉la꞉, Timoti o꞉lia꞉ Elastus a꞉no꞉ Masedonia iliga꞉takiyo꞉, e A꞉sia hen a꞉naka o꞉elen.

23  2Kol 1.8Ho꞉len a꞉namio꞉ Alana꞉ man o꞉lo꞉ kudu ha꞉na꞉lab a꞉no꞉lia꞉yo꞉ kego꞉wo꞉ mada alan fa꞉la꞉dowo꞉. 24 Kalu nowo꞉ ene wiyo꞉ Demitius, eyo꞉ silbayo꞉ dia꞉sa꞉ga꞉, madali gode Atemis a꞉no꞉ misido꞉ momada꞉sa꞉ga꞉, amisa꞉n kalumo꞉ kililia꞉sen. Kalu egeledo꞉ nanogdo꞉ dia꞉sen i a꞉no꞉lo꞉ mole alan dia꞉sen. 25 Demitius eyo꞉ nanogdo꞉ dia꞉sen kalu a꞉no꞉ tambo kegea꞉sa꞉ga꞉, imo꞉wo꞉ a꞉la꞉sio꞉, “Nanog nilido꞉ dimida꞉sen wema꞉yo꞉, moleyo꞉ nafa dia꞉sen a꞉no꞉ gio꞉ asulab. 26 Ko꞉sega Fo꞉l we nili amisa꞉n o꞉lia꞉ A꞉sia heno꞉lo꞉ wida꞉li sia꞉likiyo꞉ ililima꞉nigab ko꞉lo꞉, nili dagiya꞉lo꞉ dimido꞉ gode a꞉no꞉, gode hendelema a꞉la꞉wido꞉ ko꞉lo꞉, kaluka꞉isaleya꞉ asulo꞉wo꞉ e no꞉nolo꞉ alita ta꞉fo꞉. A꞉la꞉do꞉ go꞉ a꞉no꞉ gio꞉ tamina ba꞉ba꞉ a꞉la꞉ta꞉ga꞉ dabu. 27 A꞉la꞉fo꞉ko꞉lo꞉ o꞉go꞉ nili mole anama꞉kilo꞉ nanogdo꞉ dia꞉sen wema꞉ wi nafayo꞉ mogagila꞉ma꞉nigab. Imili weno꞉ ko꞉mba. Ko꞉sega nili gode Atemis, A꞉sia heno꞉ tambo o꞉lia꞉ henfelo꞉ tambo amio꞉ wabuda꞉sen a꞉no꞉, ene wi alan a꞉no꞉ wilo꞉ma doma꞉ib. A꞉la꞉ta꞉ga꞉ ene gulugululan a a꞉no꞉ o꞉ngo꞉malo꞉ o꞉ngo꞉ a꞉la꞉asuluma꞉ib” Demitius eyo꞉ a꞉la꞉sio꞉.

28 Kaluka꞉isaleyo꞉ to a꞉no꞉ da꞉da꞉sa꞉ga꞉, kulufa꞉yakiyo꞉ towo꞉ halaido꞉ sa꞉lakiyo꞉, “A꞉fesa꞉s kaluka꞉isaleya꞉ gode alandeyo꞉ Atemis eka꞉.” 29  Ilig 20.4, 27.2, Kolo 4.10, File 1.24A꞉la꞉ ho꞉le sa꞉la꞉li ha꞉nakiyo꞉, amisa꞉n kaluka꞉isaleyo꞉ tambo kulufa꞉yo꞉ kegeo꞉. Kalu a꞉la꞉ Gaius dia꞉ Alistakus dia꞉ a꞉no꞉, Fo꞉l o꞉lia꞉ Masedonia a꞉la꞉ta꞉ga꞉lo꞉ mio꞉ i a꞉no꞉ ta꞉lia꞉sa꞉ga꞉, kegea꞉sen a us a꞉na anilia꞉ga꞉ tiane. 30 Fo꞉l e kaluka꞉isalelo꞉ kegeab a꞉namio꞉ towo꞉ sa꞉ma꞉ ha꞉na꞉no꞉ asulo꞉ ko꞉sega, tilidabu kalu iliyo꞉ e mo꞉hamana꞉ki ta꞉li. 31 A꞉la꞉ta꞉ga꞉ A꞉sia hen amilo꞉ gamani misa꞉ kalu nolba꞉yo꞉, Fo꞉l e mili ko꞉lo꞉, e ililo꞉ kegea꞉sen hen a꞉namio꞉ mo꞉hamana꞉kiyo꞉ towo꞉ hagugu saga꞉fo꞉. 32 Kaluka꞉isale kegeo꞉ a꞉ma꞉yo꞉, noma꞉yo꞉ to ko꞉li halale sa꞉lab amio꞉, noma꞉yo꞉lo꞉ to ko꞉li ka sa꞉la꞉li a꞉lakiyo꞉, tambo no꞉nolo꞉ dowo꞉. A꞉la꞉fo꞉ko꞉lo꞉ iyo꞉ mo꞉wo꞉ wena iliki kegeo꞉ a꞉la꞉bo꞉, kalu modo꞉wo꞉ mo꞉asulo꞉. 33 A꞉la꞉gabikiyo꞉, Yu kaluwa꞉yo꞉ Alegsanda, e susululia꞉ga꞉ tamina ta꞉takiyo꞉, to elo꞉ sa꞉ma꞉no꞉wo꞉ emo꞉wo꞉ a꞉na wala sio꞉. Alegsanda eyo꞉ towo꞉ dinafa fanda sa꞉ma꞉no꞉ a꞉la꞉liki, kaluka꞉isaleyo꞉ towo꞉ hela꞉foma꞉kiyo꞉ dagiya꞉ da꞉feyo꞉. 34 Ko꞉sega kalu kegeo꞉ i a꞉ma꞉yo꞉, e Yu kalulo꞉b a꞉la꞉bo꞉ ele ba꞉da꞉sa꞉ga꞉yo꞉, ofa꞉si a꞉la꞉ a꞉namio꞉ towo꞉ halale sa꞉la꞉likiyo꞉, “A꞉fesa꞉s kaluka꞉isaleya꞉ gode alandeyo꞉ Atemis eka꞉” a꞉la꞉sa꞉la꞉likiyo꞉ mo꞉bulufo꞉.

35 A꞉la꞉ga꞉i ha꞉na꞉la꞉ga꞉yo꞉, gamaniya꞉ mo꞉fo꞉sdo꞉ sa꞉sa꞉lan kalu a꞉ma꞉yo꞉, kalu kegeo꞉ tolo꞉ sa꞉la꞉len a꞉no꞉ hela꞉foma a꞉la꞉ta꞉ga꞉yo꞉, imo꞉wo꞉ a꞉la꞉sio꞉, “A꞉fesa꞉s kalu gio꞉ dabuma. Nili gode alan Atemisa꞉ misido꞉ u momado꞉ a꞉no꞉, akina a꞉la꞉ta꞉ga꞉lo꞉ sulufo꞉ tia꞉ a꞉no꞉lia꞉, ene gulugululan a a꞉no꞉lia꞉yo꞉ A꞉fesa꞉s nili bo꞉fo꞉lo꞉l ko꞉lo꞉, henfelo꞉ kaluka꞉isale tambowa꞉yo꞉ nili bo꞉fo꞉lab a꞉la꞉ asulufo꞉lab. 36 To so꞉lo꞉l we hendele a꞉lab ko꞉lo꞉, kalu imilig noma꞉yo꞉ o꞉ngo꞉ma a꞉la꞉bo꞉ mo꞉sa꞉ma꞉ib. A꞉la꞉fo꞉ko꞉lo꞉ giliyo꞉ ha꞉sa dowaki, hala nowo꞉ dimida꞉so꞉bo. 37 Kalu a꞉la꞉ wema꞉yo꞉ gulugululan ayamilo꞉ kelego꞉ nowo꞉ mo꞉afale di a꞉la꞉ta꞉ga꞉, nili godeyo꞉ mo꞉dio꞉ge sio꞉. Ko꞉sega giliyo꞉ a꞉la꞉ we madali tililia꞉ mio꞉. 38 Kalu noma꞉yo꞉ Demitius e o꞉lia꞉lo꞉ nanogdo꞉ dian o꞉lia꞉mo꞉wo꞉ hala nowo꞉ dimido꞉lalega, mo꞉walilima꞉no꞉wo꞉ digalo꞉ da꞉lab a꞉la꞉ta꞉ga꞉ gamani misa꞉ kalu iyo꞉ sab ko꞉lo꞉, a꞉na tililia꞉ga꞉, ililo꞉ hala dimido꞉ a꞉no꞉ fanda sa꞉ma꞉ni ha꞉na꞉bi. 39 Giliyo꞉ hala dimido꞉ sa꞉ma꞉no꞉ nolo꞉ dowalega, nili ele difa꞉ a꞉no꞉ kudu ha꞉nakiyo꞉, kegea꞉sa꞉ga꞉ ua digalema꞉niki. 40 Nilido꞉ o꞉gdo꞉ dimido꞉ wema꞉yo꞉ mo꞉lo꞉ma ka dimido꞉ ko꞉lo꞉, nio꞉ o꞉li ka mo꞉walilimabe ko꞉lo꞉ ne tagilab. Gamani kaluwa꞉yo꞉ dabu ba꞉dalega, nio꞉ tolo꞉ mo꞉sa꞉ma꞉no꞉ doma꞉ib.” 41 A꞉la꞉sa꞉la꞉sa꞉ga꞉yo꞉, kaluka꞉isaleyo꞉ tambo hamana꞉ki, towo꞉ sio꞉.