1 U ra tena varbalaurai kai Israel, una valongore,

U ba u agagure Iosep da ra kikil na sip;

U ba u ki na king ta ra ul a angelo, una pupua rikai.

2 Una lue rap Epraim ma Beniamin ma Manase, una ongor,

Ma una mai upi una valaun avet.

3 Una vadoane mule avet, God,

A matam na pupua, ma avet a laun.

4 Luluai, a God kai ra lavur kor,

Aivia ra bung boko una kankan ure ra niaring kai kaum tarai?

5 U ga tabar diat ma ra gem na tinangi,

Ma u ga vamomo diat ma ra ngala na lur na mata i diat.

6 A tarai dia ki kikil avet dia varngangar ure avet,

Ma kaveve lavur ebar dia nonganongon ure avet.

7 God kai ra lavur kor, una vadoane mule avet;

Ma ra matam na pupua, ma avet a laun.

8 U ga kap vairop ra davai na vain kan Aigipto,

U ga korot vue ra umana Tematana, ma u ga kalie.

9 U ga raut are;

Ma i okor bulu, ma i lulul bonot ra gunan.

10 I vamalur ra umana lualuana,

Ma ra umana ingaingarina dia da ra tagatagal kai God.

11 I tultulue ra ingaingarina, ma i tuk tar ta ra ta.

Ma ra golina tuk tar ta ra Tava Alir.

12 Ta ra ava u ga rada vakaina kana liplip,

Upi diat par dia vana pakit dia ibul ia?

13 A kuabar na kolok i ngonge,

Ma ra umana leing ta ra lokalokor dia iaian tana.

14 God kai ra lavur kor, una lingan mulai,

Una gigira ba marama ra bala na bakut, ma una lalaume go ra davai na vain;

15 Ma una ki ravie nina ba ra limam tuna i ga vaume,

Ma ravie ra davai nina u ga vapadikat ia upi kaum.

16 A davai na vain i tar dodo, di tar.mut vue;

Dia virua ba u matana kankan.

17 Una balaure maravut nina ba u ga valaun ia ma ra limam tuna,

Ma ra tarai nina u ga vatavua diat upi kaum diat.

18 Damana pa avet a vana tapuku kan u;

Una valagar avet, ma avet a lotu tadav ra iangim.

19 Luluai, God kai ra lavur kor, una vadoane mule avet;

A matam na pupua, ma avet a laun.