1 Avat a manga kakailai tadav God a dekdek i dat,

Na taorong ra nilai vavat tadav ra God kai Iakob.

2 Avat a puak ra kakailai, ma avat a par ra kudu,

Avat a ubu ra bo na ngap ma ra pagol,

3 Avat a vu ra tavur ta ra gai ba i kama,

Ba ra gai i palaioko ure kada bung na lukara.

4 Tago damana ra varkurai ure Israel,

A vartuluai kai ra God kai Iakob.

5 I tibe tar ia tai Iosep upi ra varvai,

Ba i vana rikai upi na kure ra gunan Aigipto.

Iau ga valongore vatavuna ra tinata kai tikai ba pa iau nunure.

6 Iau tar tak vue ra kinakap ta ra ul a varana,

A ura limana dir a langalanga kan ra rat.

7 U ga kail ba u ga ki na malari, ma iau ga valaun u;

Iau ga torom tam ba iau ga ki ivai ta ra ivarat,

Iau ga valar u ta ra tava Meriba. Sela.

8 Kaugu tarai, avat a valongore, ma ina varvai bulu ta vavat;

Israel, gala ava valongore iau!

9 Koko ta enana god na tur pire vavat,

Ma koko avat a lotu tadav ta enana god.

10 Iau ra Luluai kavava God,

Nina i ga ben vairop avat kan ra gunan Aigipto;

Avat a manga panganga, ma ina vangan ra ngie i vavat.

11 Ma kaugu tarai pa dia torom ta ra nilaigu,

Ma Israel pa i mainge iau.

12 Io, iau nur tar diat ta ra leo na nuknuk i diat,

Upi diat a mur uka kadia vartovo iat.

13 Gala kaugu tarai diat a valongore iau!

Gala Israel na vanavana ta kaugu lavur nga!

14 Gala ina uvia lolole pa kadia lavur ebar,

Ma ra limagu na tur bat diat dia ki na vargegelenai me.

15 Diat dia milikuane ra Luluai, diat a ongo boko tana,

Ma na damana pire diat pa na mutu.

16 Maia, ina tabar diat ma ra kon i boina kakit,

Ma ina tabar vamaur diat ma ra polo na livur i ki ta ra vat ki.