9
God Inonoda Ijujeraera Aindae, Sakai Saore!
1 Arie Bajari, na janje isambuimi nindae sakai sarena.
Nanda gae gitida rea eteso sirorusira ava osa sarena.
2 Arie, Bajari, God Iká Bekáda Iresa na nindae ivugaimi tamo erari beká erira.
Na nindae sakai sise, ninda javo jighono erarira.
3 Ni nanjigo buvuraesa amo, nanda gitofu ojuimi sumbudo du ambu fafaseraera.
4 Ainda susu mo, ninda anumba vasada
anumbedo, bekáda bekáda ijujuse,
nanda sari ava bekáva kasama edo na sonembetesi.
5 Nunda oro oro ekoko use, ni jo tumondae eraera ava, ni bu ambari kena fitesi.
Ne sosighi beká ava etesi,
nine nenda javo ghaje fugeteso binó irae beká ava etira.
6 Arie, namanenda gitofo makoe vekaghae museteri,
nine nenda reighi sosighi e jighi jovereghari beká etesi.
Ne amboda eniimi jo kotae arera.
7 O Bajari mo, nu kini (king) edo, evovodae irira.
Nu evetu genembo ijujari da vasa e vatetena etiri fetirira.
8 Nune evetu genembo isasambu dambu dambughae ijujuse,
evetu genembo isasambu bekáda bekáda use kaifa arira.
9 Bajari mo, nu evetu genembo babate binó tefo ainda ambo sosari vasari,
evetu genembo mendeniimi nemokena mema muturaera ainda sifoda,
numo nenda jungari vasa kíkanghari bekári.
10 Bajari mave ni kasama erera amo, nenda tumondari nimokena fifiterera,
Ai resira amo, mave nimokena furaria amo, eni jo imboe ae aresa.
11 Arie! Bajari ututu Saion* Afige, geka eni Saion dae gefusera, tuturo 2:6 duruda tege, garesa! aminda anumbirise, nunda natofo kaifa eraira aindae, isimbaore!
Nu rea usira ava, natofo isambu kena isagha saore!
12 Kikita mo, God da tofori, ororo gutuse sorara eraera aindae kotise, mino mutarira.
Nenda mema mave erefutira ainda mino ava, God nune mutarira.
13 Arie Bajari, nanda gitofu nandae mema muturaera, ava gaetesi!
Arie Bajari, nandae joka edo, erá doyeoso ambeone!
14 Aso, na Jerusalem embo da dombuda fete,
nindae sakai resena da beká saono ne ningarera.
Edo, na sonembusesa aindae, ivuga arena.
15 Oro mendeni mave ni jo tumondae eraera aimi,
bako ghambudo, aminda totofo du vovosegeteri.
Ne totofo nenda vaghoda teretero nemoá fatira.
16 Bajari nange bekáda bekáda ijujeraira aimi, nu mavejuri, ava ijugeari kasama eraera.
Nune etiri, ari ekoko embo ava, totofo nenda vaghoda teretero, aimi fatira.
17 Ari ekoko embo isasambu ambari embo da vasada vosarera.
Oro mave God imboe eraera isambu, aminda vosarera.
18 Avata makasi embo da mema amboda God kote simbugarira. Kotugo
makasi embo da gigitari ava beká arira, jo dadabae arira.
19 Arie Bajari, ere fu! Erá doyeoso, natofoimi ninda geka bu fugeure!
Oro mave ni jo tumondae eraera ava, bu fiti, ninda dombuda fetoro, nenda ari ekoko ainda mino ava mutu baore!
20 Arie Bajari, nemoá jo God iraeri, ne taká tefo
evetu genembo ava kasama aoro dae sise,
aso ne ojuimi ghamo takeghari itatama aeteri.