25
Bajari Nu Nange Emboro Ijuguse Tavo Aetira, Ainda Benunuri.
1-2 Arie, Bajari, na nimokena benunu sise resena: arie God, na ni tumonderena.
Meka geono dae sise, na sonembaso dae resena. Erá doyeóso, gitofui na dedo ivuga use gegha jiriore!
3 Mave ni tumonderaera amo, ne meka jo gae arera.
Avata, nimokena mave osogo futo arera, ainda evetu genembo ne meka garera.
4 Arie, Bajari, ninda emboro eveva ijugaso gaone!
5 Ninda geka da beká ava ijugaso, ainda amboda amboda aone! Ainda beká mo,
God namokena jebuga muturaira, amo nimori. Na sifo ghousa evia nimoa tumonderaena.
6 Arie, Bajari, ninda kavevera a dubo bari ijugudo refesa, ava kotedo sekago amingaso dae resena.
7 Ninda dubo bari evovodae udo refesa, kotugo ninda veka eveva udo refesa ava kotise,
na nange babojuse ari ekoko use, kosasaghudo fusena, ava nandae kote doyaso dae resena.
8 Bajari nu dambugo a evevagori. Ava sedo, ari ekoko embo emboro ningi aminda yaetera, ava nune ijugeraira.
9 Tumbari embo ava giti jijighuse bu emboro evevakena ise, nunda uju ava nemokena ijugeraira.
10 Mave nunda evovo sari ava use, nunda Agho Dari kaifa eraira,
kotugo nu rea sisira ava use irera ava, ne nune dubo ruruse, giti jighiraira.
11 Bajari, ninda beka gajari kaifa use, nanda ari ekoko kote do! Ai resira amo, nanda ari ekoko digarigori.
12 Mave Bajari igheghi eraera ava, nune kaifa use, emboro ningi aminda yaetera, ava ijugeraira.
13 Evetu genembo amo susu iti fafode edo evovodae aminguse irarera.
Amingururoro, nenda sasingu enda evia nenda tofodae barera.
14 Bajari, mave igheghi eraera, nemokena nune komana edo nunda evovo sari da beká ava ijugurureari ningiraera.
15 Na sonemba Bajari kena bari dae gigiturureono,
nune na sifo ghousa evia dara memaghae da jokáda saghimbe buraira.
16 Bajari, jovereghe namoa gosuse, nandae joka e! Ai resira amo, na bate beká use eregofena.
17 Mema namokena refira ava baji tomanako beká etira, ava saso dubo jama aone!
Kotugo, na mema bouvu itatama erena ava, bu fugaetesi!
18 Nanda ghamo vevera a bouvu mema itatama eraena ava kotise, nanda ari ekoko isambu kote do!
19 Nanda gitofu nanjogo irera ava fuge gi! Na imboe gamboe beká eraera, ava gaso dae resena.
20 Meka geone dae sise, na nimokena ambo sose fefetururono, na gagara edo sonembuse, kaifa aso dae resena.
21 Na nimoa tumonduse, nanda aito eveva fugeraena, a nanda geka bekáda bekáda seraena aindae, na gagara e!
22 Arie, Bajari, ninda natofo Israel embo dara itatama eraera ava, sonembaso dae resena!