26
Genembo Kosasa Tefo Ainda Banungariri.
1 Arie Bajari, na kosasa tefori, na jo mana managhae ni tumondae eraena. Ava sedo, nandae “eveva” saresa.
2 Arie Bajari, nanda ari rea eraena ava, ijujedo na dere gi!
Nanda janje jokáda rea uju eraena, a reju koteraena ava ijuje gi!
3 Ninda dubo bari evovodae irira aimi, nanda emboro isagha erira. Ninda geka beká tumonduse deingheraena.
4 Na jo derari kakatode tatae eraena. Kotugo, evetu genembo nenda gunguboimi natofo dereraera ainde dabade,
jo anumbedo umo gaumo ae eraena.
5 Na ari ekoko embode tatari beghagha eraira, kotugo ari ekoko embode jo anumbedo umo gaumo ae eraena.
6 Arie Bajari, na jo dara embo irae ava ijuguse,
nanda ungo seghedo viti ya ninda olta dombuda yaru divari jokáda tere ya foa ghuse,
nimoa tumonde baingheraena.
7 Aminguse, na aiyakoe sise yaruimi didivuse, nine ari eveva gaveva ututeraesa, ava isimberaena.
8 Arie Bajari, ni kambo eminda ireaso, ninda fakina duroghae isagha eraira ava na dubo bu gogoghomberaena.
9 Ari ekoko embo a kotugo kokomana de babarigari kakato daso amboro dae aresa, ainda sifoda, na erá deose!
10 Evetu genembo resena amo, ne evovodae ari ekoko use, komana da mendo bari dae sise ufena moni muturaera.
11 Avata nasukako namo jo amingae eraena, na emboro sokumako a dambugo beká aminda yari dae inini eraena,
ava sedo nandae joka use na sonembaso jebugarena.
12 Na vasa evevada fetirise daradae jo oju ae eraena.
Nunda natofo tafaroro ari dae totorugururoro, na jokáda ere fetedo, Bajari dae sakai sarena.