47
Nununkeyuk Acn Babylon
1 LEUM GOD El fahk, “Babylon, fani liki tron lom,
Ac muta fin kutkut infohk uh.
Meet kom oana sie virgin, sie siti ma soenna kutangyukla,
A inge monum tia sifil fisrasrsrasr ac fwel!
Inge kom sie mutan kohs. 47:1–15; Isa 13:1—14:23; Jer 50:1—51:64
2 Furokak eot in ilil flao!
Eisla nuknuk afinyen motom! Sarukla nuknuk kato lom.
Olak sikut lom an ac tupalla infacl uh!
3 Mwet uh ac liye lah kom koflufol;
Elos fah liye ke kom akpusiselyeyuk ac mwekinla.
Nga ac oru foloksak luk, ac wangin mwet ac tulokinyuwi.”
4 God mutal lun Israel El aksukosokyekutla —
Inel pa LEUM GOD Kulana.
5 LEUM GOD El fahk nu sin Babylon,
“Muta in lohsr uh ac mislana.
Mwet uh ac tia sifil pangon kom kasra lun mutunfacl uh!
6 Nga tuh kasrkusrak sin mwet luk.
Nga tia sifil oralos oana mwet luk.
Nga fuhlelosi nu inpoum,
Ac kom tiana pakomutalos.
Finne mwet matu, kom arulana akkeokyalos.
7 Kom nunku mu kom ac kasra nwe tok,
Oru wangin nunkeyen ma inge sum
Lah ac mau fuka saflaiya.
8 “Porongo ma se inge, kom su lungse mwe pwar
Ac nunku mu moul lom an oakwuk ac wanginna sensen kac.
Kom fahk mu kom fulat oana God,
Ac wangin sie oana kom.
Kom nunku mu kom ac tiana katinmasla,
Ku pulakin keok ke sripen tulik nutum uh wanginla. 47:8–9; Fwack 18:7–8
9 Tusruktu in kitin pacl na, ke len sefanna,
Ma inge kewa fah sikyak nu sum.
Kom finne susfa ac orek inutnut,
Mukul tomom ac tulik nutum uh ac fah wanginla.
10 “Arulana wangin fosrnga lom ke ma koluk lom;
Kom nunku mu wangin sie ac ku in liye kom.
Lalmwetmet ac etauk lom kiapwekomla,
Ac kom sifacna nunku mu kom God —
Wangin sie saya oana kom.
11 Mwe ongoiya ac fah tuku nu fom,
Ac inutnut lom an tia ku in sikulya.
Musalla ac fah sa na in sun kom,
Sie musalla yohk ma kom tiana nunku mu ac sikyak!
12 Sruokyana mwe inutnut ac mwe susfa lom;
Kom nuna orekmakin ma ingan oe ke kom fusr ah me.
Sahp ac ku in kasrekom,
Ku sahp kom ku in sang aksangengye mwet lokoalok lom.
13 Wangin ku lom, kom finne eis kas in kasru
Sin mwet su suiya itu uh,
Ac kitalik pulan pacl uh fal nu ke ma elos liye inkusrao,
Ac fahkak nu sum ma ac sikyak nu sum
Ke malem nu ke malem.
Sap mwet tuni ma oan yen engyeng uh ingan in tuku ac molikomla.
14 “Elos ac fah oana mah pao,
Ma sie e ac fah furreak!
Elos ac tia pac ku in sifacna molelosla.
Firir sac ac fah arulana fol nu selos,
Tia e in langlung se.
15 Pa na ingan luman kasru kom ac eis sin
Mwet tuni ma oan yen engyeng uh, su kom muta lolngok yoro in moul lom nufon.
Elos nukewa ac som liki kom ac fahsr innek lalos sifacna,
Ac wangin sie selos fah lula in molikomla.”