48
God El Leum Lun Pacl Fahsru
1 Porongo ma se inge, kowos mwet Israel
Su ma in fwilin tulik natul Judah:
Kowos fulahk ke Inen LEUM GOD
Ac fahk mu kowos alu nu sin God lun Israel,
Tusruktu wanginna kalmen ma kowos fahk uh.
2 Kowos filangkin in fahk mu
Kowos mwet in siti mutal sac,
Ac lah kowos filiya lulalfongi lowos in God lun Israel,
Su Inel pa LEUM GOD Kulana.
3 LEUM GOD El fahk nu sin Israel,
“Oemeet nga tuh fahkak ma ac sikyak;
Na in kitin pacl ah na, nga orala sikyak.
4 Nga nuna etu lah pwaye kowos ac mau likkeke,
Upa oana osra, ac keke oana bronze.
5 Ouinge nga palyeak ma ac sikyak nu suwos ke pacl loeloes somla —
Nga fahkak ke ma ac orek meet liki na pacl sikyak uh,
In oru kowos in tia fahk mu
Ma sruloala ac mwe lemlem lowos pa oru in sikyak.
6 “Ma nukewa nga tuh fahkak meet, liye pa sikyak tari inge.
Kowos enenu in akilen lah ma nga tuh fahk ah pwayena.
Inge nga ac fahk nu suwos ke ma sasu su ac fah tuku,
Ke kutu ma lukma ma nga tiana fahkak meet.
7 Nga tufacna oru ma inge in sikyak;
Wangin ma ouinge orek in pacl somla.
Funu oasr, kowos lukun fahk mu kowos etu tari kac.
8 Nga nuna etu lah tia ku in lulalfongiyuk kowos,
Mweyen eteyuk lah kowos mwet utuk nunak.
Pa sis kowos tiana wi lohng ke ma inge,
Ac wanginna kas kac sun insrewos.
9 “In oru tuh mwet uh in kaksakin Inek,
Nga kutongya kasrkusrak luk.
Nga sruokyana tuh nga in tia kunauskowosla.
10 Nga srike kowos ke e lun keok,
Oana ke silver uh liklikiyukla in sie funyu,
Ac nga konauk lah wangin ma wo keiwos.
11 Ma nga oru uh nga oru ke sripuk —
Nga fah tia lela Inek in pilesreyuk
Ku lela kutena mwet saya in ipeis ke wolana
Su fal in ma na luk, ac ma luk mukena.”
Cyrus, Mwet Kol Solla Lun LEUM GOD
12 LEUM GOD El fahk,
“Israel, mwet su nga pangonak, porongeyu!
Nga mukefanna pa God! Nga pa emeet ac nga pa etok! Isa 44:6; Fwack 1:17; 22:13
13 Pouk pa orala pwelung lun faclu
Ac laknelik inkusrao.
Ke nga pang nu ke faclu ac kusrao
Elos sulaklak na tuku ac tu ye mutuk.
14 “Kowos nukewa toeni nu sie ac lipsre!
Wangin sie inmasrlon god uh ku in palye
Lah mwet se nga sulela uh ac fah sroang mweuni Babylon.
El ac fah oru ma nga lungse elan oru.
15 Nga pa tuh kaskas ac pangnol ah;
Nga kololma ac nga fah oru tuh in wo ouiyal.
16 “Inge kaluku nu yuruk ac lohng ma nga fahk uh.
Ke mutawauk ah me, nga kaskas kalem na,
Ac oru tuh kas luk in akpwayeiyuk pacl nukewa.”
(Inge LEUM GOD Fulatlana El ase ku lal nu sik ac supweyu.)
Oakwuk Lun LEUM GOD Nu Sin Mwet Lal
17 God mutal lun Israel,
LEUM GOD su molikowosla, El fahk,
“Nga pa LEUM GOD lowos,
Su lungse luti kowos ke ma ac wo nu suwos sifacna,
Ac in kol kowos nu ke inkanek ma fal kowos in fahsr kac.
18 “Kowos funu lohang nu ke ma sap luk,
Mwe insewowo lukun kahkma
Oana soko infacl ma tia wi mihnla.
Kutangla lukun tuku nu suwos
Oana noa ma tok weacn uh.
19 Fwilin tulik nutuwos lukun arulana pusla oana puk uh,
Ac nga lukun oru elos in tiana wi kunausyukla.”
20 Tufokla liki acn Babylon, som ac sukosok!
Kowos in engan ac sulkakin pweng wo se inge akyokye; oru in eteyuk yen nukewa:
“LEUM GOD El molela Israel, mwet kulansap lal!” Fwack 18:4
21 Ke LEUM GOD El pwen mwet lal sasla sie acn fol ac pao yen mwesis,
Elos tiana keok ke malu.
El orala kof in tuku liki sie eot nu selos;
El falngelik eot sac, ac kof uh asrma.