1 Wal Job bin tok langa Elifas na, 2 “Aibin oldei irrimbat dislot wed yumob oldei toktokbat, bat detlot wed nomo albumbat langa mi. 3 Wotfo yu nomo jidan kwaitbala? Hu oldei fosimbat yu blanga kipgon askimbat mi kwestjan? 4 If ai bina jidan weya yu jidan, maitbi im bina isibala blanga mokimbat en gibitbat gudwan wed langa yu, 5 bat ai bina trai albumbat yu en meigimbat yu gudbinji.

6 “If ai kipgon tok, o if ai nomo tok, ai garra kipgon abumbat pein en ai garra kipgon woriworibat du. 7 God bin meigim mi nokap en imbin binijimap main femilimob. 8 Ebribodi sabi mi jidan prisana wen dei oldei luk mi jidan brabli bouniwan. 9 God im main enami na, en im nomo laigim mi enimo. Im oldei lukinatbat mi, en im baidim mi garram im shapwan tuth. 10 Ebribodi nomo laigim mi. Olabat oldei mokimbat langa mi en hitim main feis, 11 en God na bin gibit mi langa detlot krulbala pipul.”

12 Wal Job bin kipgon tok langa Elifas, “Ebrijing bin go gudwei, bat God bin grebum mi langa main nek en imbin sheikimap mi en libum mi haf ded. 13 En God bin pudum mi langa det pleis weya im spiya gin kilim mi rait langa main binji en meigim main binji kamat, en im nomo fil sori blanga mi, najing. 14 Lagijat na God nomo stap kilimbat langa mi, 15 en mi werrimon sekbeigwan klos, en jidan soribalawei langa graun. 16-17 Nomeda ai nomo jigibala en main preya im trubala, bat mi stil brabli apset en main dubala ai brabli redwan brom kraikraibat.

18 “If ai garra dai, ai garra dalim det graun nomo blanga gaburrumap main blad, dumaji im garra jingat mi nomo bin abum feyago. 19 Bat tudei na God jidan langa hebin en im garra tok mi nomo gilti en im garra oldei maindimbat langa mi. ✡ Job 19:25 20 Blanga main frenmob oldei mokimbat langa mi, bat ai garra jinginat langa God, 21 blanga dalim mi if mi rait o rong, jis laiga fren garra dum. 22 Ai garra dai dregli en ai kaan neba kambek igin.” Lagijat na Job bin tok.