1 Wal Job bin tok adbalawei langa God, “Ai nomo garram eni tjens, en ai garra gibap na. Main taim im gulijap binij na en det greib im redibala blanga mi. 2 Ai gin luk oni detlot wailwan pipul hu oldei meigim fan langa mi. 3 YAWEI det trubala God, if yu nomo album mi, wal hu garra pei mani blanga meigim mi fri? 4 Dumaji yubin meigim main fren olabat jadimap olabat irriwol na. Wal yu na garra shoum olabat dei nomo rait. 5 Olabat bin wandi bleim langa mi jis blanga album olabat ronselp. Wal yu meigim olabat bigininimob jidan blainwan du.

6 “God, yu na bin meigim olabat mokimbat langa mi en dei oldei spitbat langa mi. 7 Mi fil rili soribala en tharran meigim mi gulijap jidan blainwan en blanga main bodi brabli bouniwan.

8 “Sambala pipul oldei jidan brabli gudbala, en olabat jidan wail langa main nogudbala fren. 9 Olabat gin dum gudbala ting, en olabat oldei jidan brabli strongbala, 10 bat main fren olabat nomo sabi enijing.

11 “Blanga main laif im gulijap binji na. Aibin trai weidabat blanga det gudbala taim, bat nomo enijing bin hepin. Najing. 12 Bat ol main fren olabat trai blanga dalim mi blanga weidabat blanga det gudbala ting, bat najing. Olabat nomo sabi. 13 Ai garra dalim det graun blanga meigim main sweig redibala na. 14 En ai garra sei gudei langa det greibyad jis laik mi tok langa main dedi. En detlot wem olabat main mami en sistamob, en ai garra sei gudei langa olabat.

15 “Wotfo ai garra weidabat oni blanga tharran? 16 Hu garra go langa det greibyad garram mi? Nobodi.” Lagijat na Job bin tok.