1 YAWEI, wen yu gitwail, nomo dalimof mi.

Nomo panishim mi wen yu brabli einggri.

2 Yubin shudum mi garram yu erro en meigim mi leimwan.

Yubin kilim mi en meigim mi buldan langa graun.

3 Dumaji yubin gitwail langa mi main bodi ardim nomo lilbit.

Mi jidan brabli sikwan dumaji brom ol main nogudbalawei.

4 Mi jidan giltiwan en im gaburrumap mi brabliwei, jis laik fladwoda.

Im tumatj blanga mi blanga hendulum.

Im jis laik det hebiwan loud weya mi garrimap.

5 Ol main sowa im smeliwan en rotinwan na, dumaji aibin siliwan.

6 Mi garram detmatj pein en ai kaan adli wok, en mi gulijap buldan langa graun.

Mi oldei krai insaid langa main hat.

7 Mi barnbarn detmatj en mi gulijap dai.

8 Mi nokap na en ai kaan dum enijing.

Mi jingat dumaji mi ardimbat detmatj en mi fil nogudbinji.

9 YAWEI, yu sabi wanim mi wandim brabli.

Yu lisinbat langa mi wen mi jingat langa yu.

10 Main hat im pamping nomo lilbit.

Ai nomo strongbala enimo.

En main dubala ai nomo luk gudwei na.

11 Ol main fren en detlot pipul hu jidan wansaid langa mi kaan kaman gulijap langa mi, dumaji ai garram loda sowa,

en ol main femili kipawei brom mi du.

12 Detlot pipul hu wandim kilim mi ded, olabat pudumbat ola trep blanga mi.

En detlot pipul hu wandim kilim mi, olabat toktok blanga meigim ebrijing nogud blanga mi.

Olabat kaan stap toktokbat blanga dum nogudbala ting langa mi.

13 Mi jis laik defwan en kaan irrim enijing,

en jis laik ai nomo garram mawus en kaan tok langa enibodi.

14 Mi jis laik detlot hu nomo ensim dumaji dei kaan lisin.

15 Bat mi trastim yu, YAWEI.

Yu na main bos en main God, en yu na garra ensim mi.

16 Nomo larram ol main enami rabishim mi.

Nomo larram olabat tok jigibalawei wen ai stat dumbat nogudbala ting.

17 Im jis laik mi nili buldan en mi ardimbat olataim.

18 Ai dalim yu, “Mi sori blanga ol main nogudbalawei.”

Dei meigim mi wori detmatj.

19 Ol main enami garram gudwan bodi en dei jidan strongbala.

Sambala pipul nomo laigim mi, en dei nomo garram eni risan.

20 Detlot pipul hu peiyimbek mi nogudwei blanga gudbala ting mi dum,

olabat main enami.

21 YAWEI, yu nomo libum mi miselp.

Main God, nomo jidan longwei brom mi.

22 Yu na main bos en yu seibum mi.

Kaman kwikbala blanga album mi.