1 Aibin tok miselp, “Ai garra meiksho ai nomo dum nogudbala ting,

en ai kaan larram main mawus meigim mi tok nogudbala wed.

Jis laik wen yu pudum braidul bit langa hos mawus, wal lagijat du ai kaan tok eni wed wen nogudbala pipul jidan gulijap langa mi.”

2 Ai nomo bin tok enijing.

Aibin jidan kwaitwan nomeda aibin jinggabat blanga tok blanga gudbala ting.

Bat aibin fil brabli nogudbinji.

3 Aibin wori nomo lilbit.

Wen aibin kipgon jinggabat, tharran bin meigim mi mowa nogudbinji.

Ai nomo bin holdimbek miselp en streidawei aibin askim YAWEI,

4 “YAWEI, haulong ai garra jidan laibala?

Wotaim ai garra dai?

Dalim mi wotaim main laif garra binij.”

5 Yubin meigim main laif shotwan.

Main laif im shotwan langa yu,

en trubala orait, pipul jidan jis laik det win weya im blo en binij.

6 Olabat binij kwikbala, jis laik det shedopat.

Ebrijing weya pipul dum im jis najing.

Olabat gin jidan ritjwan garram ebrijing tudei bat olabat nomo sabi hu garra gajim ol detlot ebrijing bambai.

7 Bos, ai nomo wandim enijing mowa na.

Ai libum ebrijing langa yu.

8 Seibum mi brom ol main nogudbalawei.

Nomo larram sili pipul mokimbat mi.

9 Ai garra jidan kwaitbala.

Ai kaan tok enijing dumaji yu na bin panishim mi en meigim mi jidan lagijat.

10 Nomo panishim mi enimo.

Mi garra binij dregli dumaji yu kilimbat mi.

11 Ai sabi yu panishim melabat blanga melabat nogudbalawei.

Yu binijimap ebrijing melabat garram jis laik det badaflai weya im dagat klos.

Trubala, melabat jis laik det win weya blo en im binij kwikbala.

12 Yu lisin langa main preya YAWEI en yu lisin langa mi wen mi jingat.

Wen mi krai, kaman en album mi.

Mi wulijim streinja weya jidan oni lilbit taim garram yu, jis laik main femilimob weya deibin jidan bifo.

13 Yu nomo wail langa mi,

en larram mi jidan gudbinjiwei bifo mi dai.