2 JON
Jon pepa muno namba 2 boglkwa
Ka mongo yegl ende okuna ongwa
Pepa muno i Jon boglkwa. Ye pepa muno 1 bogl kondo ana enge sungagle ta mogltre ana pepa namba 2 i boglkwa. Yomba tau pirkwa buglayungu A.D. 90 mina pepa i boglkwa.
Ka mem kande kaima yegl pangwa: God yombama wagle angro ta wakai kanimbi yomba wakai kangwa mambuno i God lomo dumere erikwa. Te Jon eremogl Yesus God Wam mogl te God ya yomba akiye moglme dungwa. Yomba tau eremogl Yesus i yomba nangiye ta paikrume dingwa, ana God yombamo wagle ene iyungugl endekriyo.
1
Jon pepa muno namba 2 boglkwa
1 Yaglkande kongunmo mina na ende okuna einga, na pepa muno i bogl ambu ene God pinde yungwa ya te nangitnma wagle akiye teinga.* Yomba tau pirkwa pepa muno i bogl ambu ta tome dingwa. Te tau pirkwa “ambu” iwe kamambuno pirkwa yungu ombuno i nangiglma bogl, ana yagl ambu yungu ombuno igle meglkwa. Yegl eran ye yungu ombuno suwarata meglmbi, ana epigl 13 mina ye ama yungu ombuno suwara moraglkwa. Na ka kaima mina ene pre munduna pangwa. Te na keme tamanga, ba ka kaima pirkwa yomba kindaginde ye ene pre ama munduno pangwa. 2 Sraglpre, ka kaima i nono mina suna pangwa i nono mina aimande yene paimorambuka.
3 Nono ka kaima dinamunara ya te yomba kanwakai yenamnara i ana God Neno ya Yesus Krais God Wam, ye wakaimo ya mitno goglkwa ya te nomane pokndungwa i nono mina panambuka.
Ka kaima ya yomba kanwakai yeinamga
4 Ene nangitnma wagle tau God Neno kamo kaima mina pinande eremeglkwa, i Neno God yegl eriyo dumere ikra erikwa pre na pirtre gun pond yeinga. 5 Ambu ya, na erme lo kor ta bogl ene tekrika, okuna mambuno ere lo ta dinerko pirkondumga ikra na kordagl krapoglka: Nono yomba kanwakai yeinamga. 6 Ana wakai kanamnara igle mina ye lomo dumere mere pinande ounga. Okuna imbo ye lomo i ene yegl pirkwa: Ene yomba kanwakai yei wanmoraglkwa.
Yesus Krais kamo akegidi i-wan moramga
7 Ka kimbi dingwa yomba merkinde endpi makan koglkoglo eingwa. Ye eremogl Yesus Krais, yomba nangiye pango ungwa i ende ikine unambuka i ye ta dipene endekrikwa. Yomba koyeglmere kakimbi dindre ana Yesus Krais kundamo ikine meglkwa.† 1 Jon 4:2 ka pangwa i kanamga. 8 Ene taragl inamunedi pre kongunmo erikwa ikra wau bogl dinambedi sugl wakai mogltre ana topomo i boglkango ene prapra inaglkwa. 9 Yomba ta Yesus Krais kamo beke teingwa i ta akegidi moglkre ana puglondi endpi ka ta mina enan ana God yombamo i mina ta mogl tekrukwa. Te yomba ta Yesus Krais kamo beke tengwa i akegidi moran ana Nem ya Wam akiye ye mina moglkwa. 10 Ana yomba ta ene meglmara undre ka beke tomga i ta ditekran ana ene diwakai yeitekre te ye iyungugl endekriyo. 11 Yomba ta eremogl yomba koyeglmere ta diwakai yembi ana mambunomo kinde ormere ikra ye wu suwara pi akeple dungwa.
Ka di uglo yongwa
12 Na ka tau merkinde pangwa ene ditenagledi pirka, ba ka i pepa mina bora kiurika. Na ende ene meglmara wimbo ana nono gumano kandre ka di pirpir oun ana nono gun pond yeinamga.
13 Ene ambutn God pinde i-pere endungwa ikra ye nangiglma wagle ene diwakai yeitemiwo.‡ 2 Jon 1:1 ka pangwa i kanamga.
*1:1: Yomba tau pirkwa pepa muno i bogl ambu ta tome dingwa. Te tau pirkwa “ambu” iwe kamambuno pirkwa yungu ombuno i nangiglma bogl, ana yagl ambu yungu ombuno igle meglkwa. Yegl eran ye yungu ombuno suwarata meglmbi, ana epigl 13 mina ye ama yungu ombuno suwara moraglkwa.
†1:7: 1 Jon 4:2 ka pangwa i kanamga.
‡1:13: 2 Jon 1:1 ka pangwa i kanamga.