8
Ɩsǝtǝlɑsɩ tɑɑpɑlɑɑ
1 Ḿpʋ́ɣʋ́ Ɩsǝtǝlɑsɩ yɔɣɔtɑɑ sɩ: Mɑ́ nɑ yǝlɑɑ mpɑ tǝ lɩɩ Pɑpiloni nɑ tǝ́ polo Yosɑlɛm kɛ wulɑʋ sɔsɔ Atɑkǝsɛsɛɛ kɑwulɑɣɑ wɑɑtʋ tɑɑ tɔɣɔlɛ:
2 Pɛnhɑsɩ lʋlʋɣʋ tʋ Kɛɛsɔm, nɑ Ɩtɑmɑɑ lʋlʋɣʋ tʋ Tɑniyɛɛlɩ, nɑ Tɑfiiti lʋlʋɣʋ tʋ Hɑtusi,
3 nɑ Sekɑniyɑ pǝyɑlɑɑ tɑɑ lɛlʋ nɑ Pɑlɔkɩ lʋlʋɣʋ tʋ Sɑkɑlɩ nɑ ɩ́lɛ́ ɩ lʋlʋɣʋ tɑɑ yǝlɑɑ kɛ nɩɩnʋwɑ nɑ nɩɩlɛ nɑ nɑɑnʋwɑ (150).
4 Nɑ Pɑhɑtɩ-Mowɑpʋ lʋlʋɣʋ tʋ Selɑyɑ pǝyɑlʋ Ɩliyohenɑyi nɑ pǝ́ sɔɔsǝnɑ yǝlɑɑ ŋmʋnʋɣʋ (200).
5 Nɑ Sɑtu lʋlʋɣʋ tʋ Yɑsiyɛlɩ pǝyɑlʋ Sekɑniyɑ nɑ yǝlɑɑ kɛ ŋmʋnʋɣʋ nɩɩnʋwɑ (300),
6 nɑ Atinɩ lʋlʋɣʋ tʋ Yonɑtɑŋ pǝyɑlʋ Ɩpɛtɩ nɑ yǝlɑɑ kɛ nɩɩlɛ nɑ nɑɑnʋwɑ,
7 nɑ Ɩlɑm lʋlʋɣʋ tʋ Atɑliyɑ pǝyɑlʋ Yesɑyɑ nɑ yǝlɑɑ nɩɩtoso nɑ nɑɑnʋwɑ,
8 nɑ Sefɑtiyɑ lʋlʋɣʋ tʋ Mikɑyɛɛlɩ pǝyɑlʋ Sepɑtiyɑ nɑ yǝlɑɑ nɩɩnɑɑsɑ,
9 nɑ Yowɑpɩ lʋlʋɣʋ tʋ Yehiyɛlɩ pǝyɑlʋ Opɑtiyɑ, nɑ yǝlɑɑ ŋmʋnʋɣʋ nɑ pǝlefɛɩ hiu (218),
10 nɑ Pɑni lʋlʋɣʋ tʋ Yosifiyɑ pǝyɑlʋ Selomitɩ nɑ yǝlɑɑ nɩɩnʋwɑ nɑ nɩɩtoso (160),
11 nɑ Pepɑyi kpekǝle tʋ Pepɑyi pǝyɑlʋ Sɑkɑlɩ nɑ yǝlɑɑ pǝlefɛɩ hiu nɑ nɑɑnʋwɑ,
12 nɑ Asǝkɑtɩ lʋlʋɣʋ tʋ Hɑkɑtɑŋ pǝyɑlʋ Yohɑnɑŋ nɑ yǝlɑɑ kɛ nɩɩnʋwɑ nɑ nɑɑnʋwɑ (110),
13 nɑ Atonikɑm lʋlʋŋ nyǝ́mɑ kɑntǝkɑɣɑ nyǝ́mɑ Ɩlifelɛtɩ nɑ Yehiyɛlɩ nɑ Semɑyɑ nɑ yǝlɑɑ nɩɩtoso,
14 nɑ Pikifɑyi lʋlʋɣʋ nyǝ́mɑ Utɑyi nɑ Sɑkuu nɑ yǝlɑɑ nɩɩtoso nɑ nɑɑnʋwɑ.
Yosɑlɛm pote mpɑɑʋ tɑɣɑnʋɣʋ
15 Ḿpʋ́ɣʋ́ Ɩsǝtǝlɑsɩ tɑsɑɑ sɩ: Mɑ kpeɣelɑ yǝlɑɑ tǝnɑɣɑ lɔɔʋ ŋku kʋ tǝŋǝɣǝnɑ Ahɑfɑ tɔ kʋ nɔɣɔ nɑ tǝ siki tǝnɑɣɑ kʋyɛɛŋ tooso. Tǝnɑɣɑ mɑ pɑɑsǝnɑɑ sɩ sǝnlɑɑ nɑ kɔtǝlɑɑ pɑɑ wɛ pǝ tɑɑ. Amɑ Lefii tʋ nɔɣɔlʋ ɩ fɛɩ. 16 Ntɛnɑ mɑ́ tʋ tǝmlɛ kɛ nyʋɣʋ nyǝmɑ Ɩliyesɛɛ nɑ Alǝyɛlɩ nɑ Semɑyɑ nɑ Ɩlǝnɑtɑŋ nɑ Yɑlipɩ nɑ Ɩlǝnɑtɑŋ nɑ Nɑtɑŋ nɑ Sɑkɑlɩ nɑ Mesulɑm nɑ kiiu sɛɣɛsǝlɑɑ nɑɑlɛ, Yoyɑlipɩ nɑ Ɩlǝnɑtɑŋ 17 nɑ mɑ́ heeli-wɛ sɩ: Ɩ́ polo Kɑsifiyɑ nyǝ́mɑ nyʋɣʋ tʋ Ɩtoo tɛ nɑ mɑ́ kɛɛsɩ-mɛɣɛ nti ɩ́ kɑ́ heeli ɩ́ nɑ ɩ tɑɑpɑlɑɑ nɑ Ɩsɔ tǝsɛɛlɛ sǝnlɑɑ mpɑ pɑ wɛ tǝnɑ tɔ. Ɩlɛnɑ ɩ́ kɔnɑ-tʋɣʋ tɑ́ Ɩsɔ tǝsɛɛlɛ tǝmlɛ lɑtɑɑ. 18 Ḿpʋ́ɣʋ́ tɑ́ Ɩsɔ kentɑ tɑ́ tɔɔ nɑ pɑ́ pǝsɩ nɑ pɑ́ kɔnɑ Mɑlii nɑ Lefii pɑ lʋlʋɣʋ tʋ Selepiyɑ. Yɑkɔpʋ pǝyɑlʋ kɛlɛ, ɩ pǝyɑlɑɑ nɑ ɩ newɑɑ pɑ wɛ pǝlefɛɩ hiu. 19 Ɩlɛnɑ pǝ́ sɔɔsɩ Melɑli lʋlʋɣʋ tʋ Hɑsɑpiyɑ nɑ Yesɑyɑ nɑ ɩ newɑɑ nɑ pɑ pǝyɑlɑɑ, pɑ wɛ hiu. 20 Nɑ pɑ́ kɔnɑ tɔtɔɣɔ yǝlɑɑ ŋmʋnʋɣʋ nɑ hiu (220) mpɑ pɑ lǝsɑ Ɩsɔ tǝsɛɛlɛ sǝnlɑɑ sǝkpemɑ tɑɑ tɔ. Mpɛ ɩnǝɣɩ Tɑfiiti nɑ ɩ tɑɑpɑlɑɑ pɑɑ cɛlɑ Lefii nyǝmɑ.
21 Ḿpʋ́ɣʋ́ mɑ tɔmɑ sɩ tǝ hɔkɔ nɔɔsɩ kɛ tɑ́ tǝnɑɣɑ Ahɑfɑ lɔɔʋ nɔɣɔ tǝnɑ, nɑ pǝ́ hʋ́lɩ́ sɩ tǝ pɑsɑ tɑ tǝɣɩ tɑ Ɩsɔ ɩsɛntɑɑ, nɑ ɩ́lɛ́ ɩ yele nɑ tɑ́ nɑ tɑ́ nyǝ́mɑ nɑ tɑ́ wontu nɑ tɑ́ mpɑɑʋ lɑ teu. 22 Pɩɩ wɛ-m fɛɛlɛ sɩ mɑ́ yɔɣɔtɩ wulɑʋ nɑ ɩ́ yele nɑ yoolɑɑ nɑ kpɑɣɑnǝŋ cɑɣɑlɑɑ sɩɩ-tʋɣʋ tɑ́ kolontunɑɑ tɔɔ. Amɑ tǝ heelɑ-ɩ tǝfoo sɩ tɑ́ Ɩsɔ kentiɣi ɩ yǝlɑɑ tǝnɑ tɔɔ kɛ́, nɑ ɩ́ mʋɣʋ pɑ́ɑ́nɑ́ nɑ mpɑ pɑ lɔɔkɩ-ɩ tɔ. 23 Ḿpʋ́ɣʋ́ tǝ hɔkɑ nɔɔsɩ nɑ tǝ́ sǝlǝmɩ Ɩsɔ sɩ ɩ́ wɑɑsɩ-tʋ nɑ ɩ́lɛ́ ɩ mʋ tɑ́ kʋsǝlǝmʋtʋ.
24 Pǝ wɑɑlɩ kɛ́ mɑ kpɑɣɑ kɔtǝlɑɑ sɔsɑɑ tɑɑ kɛ́ nɑɑnʋwɑ nɑ nɑɑlɛ, nɑ pǝ́ sɔɔsǝnɑ Selepiyɑ nɑ Hɑsɑpiyɑ nɑ pɑ tɑɑpɑlɑɑ kɛ nɑɑnʋwɑ. 25 Ɩlɛnɑ mɑ́ mɑɣɑsɩ pɑ ɩsɛntɑɑ kɛ liɣitee nyǝɣǝtʋ nɑ wʋlɑ nɑ wontu kʋpɑntʋ nti wulɑʋ sɔsɔ nɑ ɩ lɑɣɑtʋ tɑsǝlɑɑ nɑ ɩ wɑɑlɩ nyǝ́mɑ nɑ tɛtʋ tɑɑ Ɩsɛɣɛlɩ nyǝ́mɑ kɑ hɑwɑ sɩ pɑ́ ŋmɑnɑ tɑ́ Ɩsɔ tǝsɛɛlɛ tɔ. 26 Nɑ mɑ́ cɛlɛ-wɛɣɛ liɣitee nyǝɣǝtʋ kɛ tɔɔnǝnɑɑ hiu nɑ tǝ wontu kɛ tɔɔnǝnɑɑ tooso, nɑ wʋlɑ kɛ tɔɔnǝnɑɑ tooso tɔtɔ, 27 nɑ wʋlɑ cɛmsɛnɑɑ kɛ hiu, pɑ liɣitee wɛ ɩsɩɩ wʋlɑ nyǝɣǝtʋ iyɑɣɑ, nɑ nyǝɣǝlʋɣʋ kʋsɛɛmʋɣʋ hɛɛsɩ nsi sɩ tewɑ ɩsɩɩ wʋlɑ nɑ sɩ mʋɣɩ kɔkɔ tɔɣɔ nɑɑlɛ. 28 Ḿpʋ́ɣʋ́ mɑ heelɑ-wɛ sɩ: Teitei ɩsɩɩ mǝ kɛʋ Ɩsɔ tǝmlɛ lɑtɑɑ tɔ, mpʋ tɔtɔɣɔ wontu tǝnɛ tǝ kɛ́ Ɩsɔ nyǝntʋ. Liɣitee nɑ wʋlɑnɑɑ pǝ kɛ́ luɣu kʋlʋmʋɣʋ kʋcɔɔʋ ŋku yǝlɑɑ lɑpɑ mǝ cɔsɔnɑɑ Ɩsɔ Tɑcɑɑ tɔɣɔ. 29 Ɩ́ pɑɑsǝnɑ kpɑncoou ŋkʋɣʋ teu, hɑlǝnɑ Yosɑlɛm. Ɩ́ tɑlɑ tǝnɑ ɩlɛ ɩ́ mɑɣɑsɩ-tǝɣɩ kɔtǝlɑɑ sɔsɑɑ nɑ Lefii nyǝ́mɑ nɑ lʋlʋŋ nyɔɔŋ nyǝ́mɑ pɑ ɩsɛntɑɑ kɛ́ Ɩsɔ tǝsɛɛlɛ kutuluŋ lɛlǝŋ tɑɑ.
30 Ḿpʋ́ɣʋ́ kɔtǝlɑɑ nɑ Lefii nyǝ́mɑ pɑ pɑɑsǝnɑ wʋlɑ nɑ liɣitee nnɑ pɑ mɑɣɑsɑ mpʋ tɔ, nɑ wontu kʋpɑntʋ ntɩ nɑ pɑ́ ponɑ-tǝɣɩ Yosɑlɛm kɛ tɑ Ɩsɔ tǝsɛɛlɛ tɑɑ.
Ɩsǝtǝlɑsɩ-wɛ pɑ tɑtɛ kɛ Yosɑlɛm
31 Ḿpʋ́ɣʋ́ tǝ kʋlɑ Ahɑfɑ lɔɔʋ nɔɣɔ kɛ ɩsɔtʋ kɑncɑɑlɑɣɑ nyǝŋ kʋyɛɛŋ nɑɑnʋwɑ nɑ nɑɑlɛ nyǝŋkʋ wule nɑ tǝ tɛɛ Yosɑlɛm. Tɑ́ Ɩsɔ kɑ wɛ tɑ́ wɑɑlɩ kɛ́ tɑ́ mpɑɑʋ tǝnɑ tɑɑ kɛ́ nɑ ɩ́ tɔɣɔnǝɣɩ tɑ́ kolontunɑɑ nɑ ŋmɩɩlɑɑ mpɑ pɑ cɔɔsǝɣɩ-tʋ tɔ. 32 Tǝ tɑlɑ Yosɑlɛm ɩlɛnɑ tǝ́ hɛɛsɩ kʋyɛɛŋ tooso. 33 Ɩlɛnɑ tǝ mɑɣɑsɩ liɣitee nyǝɣǝtʋ nɑ pǝ wontu kʋpɑntʋ kɛ kʋyɑkʋ liɣiti nyǝŋkʋ wule kɛ tɑ́ Ɩsɔ tǝsɛɛlɛ tɑɑ nɑ tǝ cɛlɑ Uliyɑ pǝyɑlʋ kɔtʋlʋ Melemɔtɩ wei nɑ Pɛnhɑsɩ pǝyɑlʋ Ɩlɑsɑɑ pɑɑ wɛɛ tɔ, nɑ Lefii nyǝ́mɑ Yesuwɑ pǝyɑlʋ Yosɑpɑtɩ nɑ Pinuwi pǝyɑlʋ Noyɑtiyɑ. 34 Ḿpʋ́ɣʋ́ pɑ kɑlɑ pǝ tǝnɑ nɑ pɑ́ mɑɣɑsɩ nɑ pɑ́ ŋmɑɑ.
35 Pɑ tǝnɑ mpɑ pɑ lɩɩnɑ Pɑpiloni tɔ mpɛ pɑ lɑpǝnɑ Ɩsɔ kɛ́ kɔtɑsɩ nɑ Ɩsɛɣɛlɩ nyǝ́mɑ tǝnɑ hǝtɛ tɑɑ kɛ́ lɑtǝcɛnɑɑ nɑɑnʋwɑ nɑ nɑɑlɛ nɑ ɩwɑɑŋ kɛ nɩɩnɑɑsɑ nɑ nɑɑnʋwɑ nɑ nɑɑtoso, nɑ pɑ́ lɑ kɔtɑsɩ nsi kɔkɔ lusɑ sɩ tǝnɑ tɔɣɔ ɩwɛɛsɩ nɩɩtoso nɑ nɑɑnʋwɑ nɑ nɑɑtosompɔɣɔlɑɣɑ, nɑ ɩsɑɣɑtʋ hɩɩsʋɣʋ nyǝnsɩ kɛ pǝŋtʋlʋŋ nɑɑnʋwɑ nɑ nɑɑlɛ. Tɑcɑɑ kɛ pɑ wɔpɑ wontu ntɩ tǝ tǝnɑ. 36 Pǝlɛ pǝ wɑɑlɩ kɛ́ pɑ kɛɛsɑ nti wulɑʋ tʋwɑ Ɩfǝlɑtɩ pɔɣɔ nɑ ilim tǝtʋlɛ tɔɔ tɛtʋ nyɔɔŋ nyǝ́mɑ tɔ. Ɩlɛnɑ pɛlɛ pɑ́ sǝnɑ Ɩsɛɣɛlɩ nyǝ́mɑ kɛ Ɩsɔ tǝsɛɛlɛ ŋmɑʋ tɔm tɑɑ.