1 Pǝlɛ pǝ wɑɑlɩ kɛ́ nyʋɣʋ nyǝ́mɑ nɑpǝlɩ pɑ kɔmɑ nɑ pɑ́ heeli-m sɩ pɑɑ Ɩsɛɣɛlɩ nyǝ́mɑ yɑɑ kɔtǝlɑɑ yɑɑ Lefii nyǝ́mɑ, pɑ tɑ fɑɣɑnɑ tɛtʋ nyǝ́mɑ mɑ tɑ nyɩ ɩsɔnɑɑ, pɑ kɛɛnɑ ɑcɑɑlǝtʋ nti Kɑnɑɑŋ nyǝ́mɑ nɑ Hiti nyǝ́mɑ nɑ Peliisi nyǝ́mɑ nɑ Yepusi nyǝ́mɑ nɑ Amoni nyǝ́mɑ nɑ Mowɑpʋ nyǝ́mɑ nɑ Icipiti nyǝ́mɑ nɑ Amolii nyǝ́mɑ pɑ lɑkɩ tɔɣɔ. 2 Ɩsɛɣɛlɩ nyǝ́mɑ nɑ pɑ piyɑ pɑ kpɑɣɑ piitimnɑɑ mpɛ pɑ tɑɑ kɛ́ ɑlɑɑ kɛ́, hɑlǝnɑ pɑnɑ kpɑɩ nyǝ́mɑ mpɛ pɑ piitim siti. Pǝ tɑɣɑ nyʋɣʋ nyǝ́mɑ nɑ sɔsɑɑ mpɛ pɑ cɑɑlǝnɑ kʋtɑkɛɛsǝtʋ ntǝɣɩ lɑpʋ.

3 Wɑɑtʋ wei mɑ nɩɩ tɔm ntɩ, ɩlɛnɑ mɑ lɑŋlɛ pǝsɩ nɑ mɑ́ cǝlɩ mɑ kpɑɩ nɑ mɑ wontu, nɑ mɑ́ kpɛsɩ mɑ nyɔɔsɩ nɑ mɑ tɑntʋɣʋ nɑ mɑ tǝlɩ tɑmɑɣɑ 4 kɛ mpʋ, hɑlǝnɑ sɑɑ wei pɑ lɑkɩ tɑɑnɑɣɑ kɔtɑɣɑ tɔ. Ḿpʋ́ɣʋ́ Ɩsɛɣɛlɩ nyǝ́mɑ mpɑ pɑ tǝnɑ pɑ nyɑŋɑɣɑ sɩ Ɩsɔ kɑ́ hɔ mpɑ pɑ lɩɩnɑ Pɑpiloni tɔ pɑ ŋkpɑŋʋɣʋ kɛ pɑ ɩsɑɣɑtʋ tɔɔ tɔ, pɑ kɔmɑ nɑ pɑ́ kotinɑ-m.

5 Ḿpʋ́ɣʋ́ mɑ kʋlɑ tɑɑnɑɣɑ kɔtɑɣɑ wɑɑtʋ nɑ mɑ lɑŋpǝsǝlɛ ńtɛ́, nɑ mɑ tɔɔ nɑ mɑ wontu kʋcǝlǝtʋ ntɩ, nɑ mɑ́ luŋ ɑkulɑ nɑ mɑ́ tɛɣɛ mɑ Ɩsɔ Tɑcɑɑ kɛ niŋ 6 nɑ mɑ sǝlǝmɩ-ɩ sɩ: Hɑɩ, mɑ Ɩsɔ, mɑ lɑŋlɛ wɑkǝlɑɑ kɛ́, fɛɛlɛ ɩɩ tisiɣi sɩ mɑ́ kʋsɩ mɑ ɩsɛ nɑ mɑ́ nyǝnɩ-ŋ. Hɑɩ, tɑ́ ɩsɑɣɑtʋ kɑɑ huɣule kɛ́ nɑ tǝ́ kɑlǝsǝnɑ ɩsɔtɔnʋɣʋ nɑ tǝ́ liki-tʋ. 7 Too pǝ kpɑɣɑʋ tɑ́ cɑɑnɑɑ pɔɔlɛ tɑɑ nɑ pǝ́ sɩɩnɑ sɑŋɑ tɔ tǝ lɑpɑ ɩsɑɣɑtʋ sɔsɔɔntʋ kɛ́. Pǝ tɔɔ kɛ́ ɑwulɑɑ kpɑɩ nyǝ́mɑ ŋmɑkǝlɑ tɑ́ nɑ tɑ́ ɑwulɑɑ nɑ tɑ́ kɔtǝlɑɑ nɑ pɑ́ yoonɑ-tʋ nɑ pɑ́ kuu tɑnɑ tɑ́ wontu ɩsɩɩ sɑŋɑ pǝ wɛʋ ɩsǝntɔ tɔ. 8 Amɑ nɔɔnɔɔ Tɑcɑɑ tɑ́ Ɩsɔ nyɑ́, nyɑ́ hʋlɑ-tʋɣʋ pɛɛlɛɛ kɛ wɛɛ nɑɑlɛ nɑ ń yele sɩ tɑ́ tɑɑ kʋkɑɑsɑɑ ɩ́ mǝlɩ nɑ pɑ́ cɑɣɑ nyɑ́ tɛtʋ tɑɑ nɑ ń cɛ-tʋɣʋ tɑ́ yomle nɑ tɑ́ ɩsɛntɑɑ hɛtɩ nɑ tǝ feesi tǝfʋʋʋ. 9 Tɑmpɑnɑ tɔɔ, tɩɩ kɛ́ yomɑɑ kɛ́, ɩlɛ tɑ́ Ɩsɔ nyɑ́, n tɑ lɔ-tʋ. Nyɑ́ yelinɑ nɑ Pɛɛsɩ ɑwulɑɑ sɔsɑɑ nɑ tɑ́ pǝtɔɔtǝlɛ nɑ pɑ́ yele sɩ tǝ́ mǝlɩ tɑ́ wule tɑɑ, nɑ tǝ́ kʋsɩ nyɑ́ tǝsɛɛlɛ ncɑɑlɛ nɑ tǝ́ wɛɛnɑ tǝcɔɔsǝlɛ kʋpɑntɛ kɛ Yosɑlɛm nɑ Yutɑ tɑɑ.

10 Tɔʋ, tɑ́ Ɩsɔ, wentiɣi tɩɩ tɑsɑ yɔɣɔtʋɣʋ kɛ tǝnɛ tǝ tɔɔ? Tǝ tɑɑ tɔkɩ nyɑ́ kʋsǝsɩɩtʋ 11 nti n tɛlǝsɑ-tʋ nɑ nyɑ́ kʋyɔɣɔtʋtʋ tɛlǝsǝlɑɑ nɔɣɔ tɔ. Hɑlɩ n kɑ kpɑɑlɑ-tʋ sɩ tɛtʋ nti tǝ tɑɑ tǝ puki mpʋ tɔ tǝ kɛ́ ɑsilimɑ kɛ́. Tǝ yǝlɑɑ kɛ́ ɑcɑɑlǝŋ kɛ́, ɩlɛnɑ pɑ́ suuli-tǝɣɩ ɑcɑɑlǝtʋ. 12 Pǝ́cɔ́ tǝ tɑɑ hɑ tɑ́ pɛɛlɑɑ kɛ tɛtʋ ntɩ tǝ yǝlɑɑ piyɑ yɑɑ tǝ́ cɑɑ pɑ pɛɛlɑɑ kɛ tɑ́ pǝyɑlɑɑ. Pǝyele tǝ́ tɑɑ pɛɛkɩ pɑ ɑlɑɑfǝyɑ yɑɑ ɩsǝnɑ pɩɩ cɑɣɑnɑ-wɛ tɔ. Wɑɑtʋ ɩnǝɣɩ tɩɩ pǝsɩ yǝlɑɑ toŋtunɑɑ, nɑ tɛtʋ tǝnɛ tǝ nyǝ́mɑ pǝsɩ tɑ́ nɑ tɑ́ piyɑ tɑ́ nyǝm. 13 Hɑɩ, Tɑcɑɑ, tɑ́ yɑɑsi ɩsɑɣɑʋ nɑ tɑ́ kɑwɑlɑɣɑ sɔsɑɣɑ kɔnnɑ-tʋɣʋ wɑhɑlɑ ɩnɛ, pɑɑ nɑ mpʋ n tɑ kɛɛsǝnɑ tɑ́ ɩsɑɣɑtʋ nɑ ń fɛlɩ-tʋ. Hɑlɩ tɑɣɑ n kɑɑsɑɑ nɑ n mǝlǝnɑ-tʋɣʋ cǝnɛ. 14 Ɩlɛ ɩsǝnɑɣɑ tɩɩ tɑɣɑnɩ kisuɣu kɛ nyɑ́ kʋsǝsɩɩtʋ nɑ tɑ́ nɑ ɑcɑɑlǝŋ piitim mpɩ tǝ́ kpɑkǝɣɩ tǝmɑ? Ye tǝ lɑpɑ mpʋ, n kɑɑ mʋ pɑ́ɑ́nɑ́ nɑ n kpiisi-tʋ? 15 Sɑŋɑ ɩsǝntɔ, kʋpɑntʋ sɔsɔɔntʋ kɛ n lɑpɑ-tʋ, nɑ ń yele sɩ tɑ́ tɑɑ kʋkɑɑsɑɑ ɩ́ wɛɛnɑ weesiŋ. Tǝ sǝŋnɑ ntɛɣɛ nyɑ́ ɩsɛntɑɑ nɑ tɑ́ ɩsɑɣɑtʋ, pǝ́cɔ́ pǝ fɛɩ sɩ ń yele yʋlʋ kɛ mpʋ nɑ ɩ weesuɣu.