1 Mɑ tɑɑpɑlɑɑ, ntɔŋ ɩ́ nyǝmɑ́ Moisi kʋsǝsɩɩtʋ kɛ teu yɑɑ. Tɔʋ, tǝ mɑɣɑmɑɣɑ tǝ tɔm kɛ mɑɑ kɛɛsɩ-mɛɣɛ pǝnɛ. Yʋlʋ weesuɣu tʋ tike niŋ kɛ kʋsǝsɩɩtʋ ntɩ tǝ pɛlǝɣɩ. 2 Ɩ́ nyǝnnɑ ɑlʋ, ɩ pɑɑlʋ ɩ́ wɛnɑ ɩ weesuɣu, kʋsǝsɩɩtʋ ntɩ tɩɩ hɑɑ-ɩ mpɑɑ sɩ ɩ́ kʋlɩ. Amɑ ɩ pɑɑlʋ ɩnɩ ɩ sǝpɑ, tǝ hɑ-ɩ mpɑɑ kɛ́, ɩ́ sɑɑkɩ ɩ sɑɑ. 3 Ɩ́ kʋlɑ kʋkʋlʋ nɑ ɩ́ sɑɑ, pɑɑ yɑɑ-ɩ wɑsɑŋkɑlɩ. Amɑ sǝm ɩ́ kɛlɑ ɩ pɑɑlʋ, kʋsǝsɩɩtʋ tɑ tɑsɑ ɩ niŋ pɛlʋɣʋ tɔtɔ, tǝ hɑ-ɩ mpɑɑ kɛ́. Pǝlɛ tɔ, ye ɩ sɑɑ kʋfɑlʋ ɩ tɑ kɛ wɑsɑŋkɑlɩ. 4 Mɑ tɑɑpɑlɑɑ mɛ, ḿpʋ́ɣʋ́ nɑ-mɛ tɔtɔ. Ye kʋsǝsɩɩtʋ tɔm tɑɑ, ɩ́ pǝsɑ sǝtɑɑ kɛ́. Pǝ tɑɣɑ pʋlʋ tɔɔ, mǝ nɑ Kilisiti ɩ́ kpɛntɑ tɔnʋɣʋ, nɑ pǝnɛntɛ ɩ́ pǝsɑ kʋfɑlʋ wei ɩ femɑ sǝtɑɑ tɑɑ tɔ ɩ nyǝ́mɑ, nɑ pǝ wɛɛ sɩ tǝ́ lɑ Ɩsɔ kɛ́ tǝmɑ nnɑ ɑ nǝɣǝsǝnɑɑ tɔ. 5 Pǝ tɑɣɑ pʋlʋ tɔɔ, wɑɑtʋ wei tɩɩ wɛ tɑ́ kʋpǝntʋ tɑɑ tɔ, kʋsǝsɩɩtʋ kpɑɑsɑɣɑ tɑ́ nɑntʋ tǝnɑ tɑɑ kʋnyɩɩlǝŋ ɩsɑɣɑŋ ɑpɑlʋtʋ, nɑ pǝ́ sʋsǝɣɩ-tʋɣʋ sǝm tǝmɑ lɑpʋ tɑɑ. 6 Amɑ pǝnɛntɛ tǝ lɩɩ kʋsǝsɩɩtʋ yomle tɑɑ nɑ sǝm lɑpǝnɑ nɑ tǝ́ lɩɩ mpi pɩɩ kpɑ-tʋɣʋ yomle kɛ mpʋ tɔ pǝ tɑɑ tǝkpɑtɑɑ. Pǝ tɔɔ kɛ́ tɩɩ tǝŋ ɩsǝnɑ kɑɣɑnɑ pǝ lɑɣɑsɑɑ tɔ, nɑ tǝ́ lɑ́ Ɩsɔ tǝmlɛ kɛ Ɩsɔ Feesuɣu toŋ tɑɑ. Pǝ́ tɑɑ wɛɛ ɩsɩɩ tǝ tǝŋɑɣɑ tɑkǝlɑsɩ tɑɑ kʋsǝsɩɩtʋ nɑ tǝ́ lɑkɩ tɔ.

7 Ɩlɛ ɩsǝnɑɣɑ pǝ wɛɛ ɩlɛ? Kʋsǝsɩɩtʋ kɛ́ ɩsɑɣɑm yɑɑ? Aɑɩ pǝ tɑɣɑ mpʋ se, pɑɑ pǝcɔ. Kʋsǝsɩɩtʋ yelinɑ nɑ mɑ́ nyɩ ɩsɑɣɑtʋ tɔm. Kʋpɑm ye kʋsǝsɩɩtʋ ɩ́ tɑɑ tɔ sɩ n kɑɑ nyɩɩlɩ, mɑ tɑɑ nyɩ kʋnyɩɩlʋɣʋ tɔm. 8 Kʋheelitu ntɩ tǝ yelinɑ nɑ ɩsɑɣɑtʋ hiki mpɑɑʋ nɑ tǝ́ kʋ kʋnyɩɩlǝŋ ɩnɩ ɩ tǝnɑɣɑ mɑ tɑɑ. Pǝ tɑɣɑ pʋlʋ, ye pǝ tɑɑ kɛ́ kʋsǝsɩɩtʋ tɔɔ, ɩsɑɣɑtʋ tɑɑ hiki tǝ tɩ. 9 Mɑ kiŋ ɩlɛ, kʋsǝsɩɩtʋ tɑɑ kɔntɑ tɔ, mɑ wɛnɑ mɑ tɩ. Amɑ kʋheelitu ntɩ tǝ kɔmɑ, ɩlɛnɑ ɩsɑɣɑtʋ ntɩ tǝ́ nyǝkɩ nɑ tǝ́ kʋlɩ. 10 Ɩlɛnɑ mɑ́ mǝlɩ sǝtʋ. Pɩɩ wɛɛ sɩ kʋheelitu ntɩ tǝ́ wɑɑsɩ. Amɑ mɑ kiŋ ɩlɛ tǝ mǝlɑ mɑɣɑ kʋɣʋ kɛ́. 11 Pǝ tɑɣɑ pʋlʋ tɔɔ, ɩsɑɣɑtʋ hikɑ mpɑɑʋ nɑ tǝ́ puɣusɩ-m nɑ kʋheelitu ntɩ, nɑ tǝ́ kʋ-m nɑ kʋheelitu ntɩ.

12 Ɩsɔ kʋsǝsɩɩtʋ wɛ tǝnɑŋŋ, nɑ kʋheelitu nɑ́ wɛ tǝnɑŋŋ tɔtɔ nɑ tǝ́ siɣisɑɑ nɑ tǝ́ tewɑ. 13 Teu nyǝm mpɩ pǝ mǝlǝnɑ ntɛ́ nɑ pǝ́ kɔnɑ mɑɣɑ sǝm nɑ? Aɑɩ, pǝ tɑɣɑ mpʋ se, pɑɑ pǝcɔ. Ɩsɑɣɑtʋ lɑpǝnɑ kɔkɔlɔ ɩnɩ. Tǝnɑɣɑ tǝ kulinɑ tǝ tɩ wɑɑlɩ sɩ ntǝɣǝlɛ ntɩ. Tǝ kpɑɣɑ mpi pǝ wɛ teu tɔɣɔ nɑ tǝ́ kʋnɑ-m. Tǝnɑɣɑ kʋsǝsɩɩtʋ yelɑɑ nɑ ɩsɑɣɑtʋ tɔm lɑ sɔɣɔntʋ nɑ pǝ́ tɛɛ cɑɑsɑ.

14 Tǝ nyǝmɑ́ mpʋ sɩ Ɩsɔ kʋsǝsɩɩtʋ tɔkʋɣʋ wɛ lotu tɑɑ tɔm kɛ́. Amɑ mɑɣɑ yʋlʋ kɛ yʋlʋ kɛ́ nɑ ɩcɑntʋ tǝlɔ, nɑ pǝ pɛɛtɑ-m nɑ ɩsɑɣɑtʋ nɑ mɑ́ pǝsɩ tǝ yom. 15 Mɑ tɑ cɛkǝnɑ mpi mɑ lɑkɩ tɔ. Pǝ tɑɣɑ pʋlʋ tɔɔ, mɑɑ lɑkɩ mpi mɑ sɔɔlɑ lɑpʋ tɔ. Amɑ mpi mɑ kisɑɑ tɔ mpǝɣɩ mɑ lɑkɩ. 16 Mɑ tɑ sɔɔlɩ mpi nɑ mɑ́ lɑkɩ-wɩ tɔɣɔ mɑ nyǝmnɑɑ sɩ Ɩsɔ kʋsǝsɩɩtʋ wɛ teu. 17 Ye mpʋ pǝ tɑɣɑ mɑ́ lɑkǝnɑ mpʋ. Amɑ ɩsɑɣɑtʋ nti tǝ wɛ mɑ tɑɑ tɔ tǝlɛ tǝ lɑkǝnɑ. 18 Mɑ nyǝmɑ́ teu sɩ kʋpɑntʋ nɑtǝlɩ tǝ fɛɩ mɑ kiŋ, mɑ pilimile tǝnɛ tǝ tɔm kɛ mɑ tɔŋ. Kʋpɑm pɑɑ mɑ luɣu wɛ teu sɩ mɑ́ lɑ kʋpɑntʋ, mɑɑ pǝsǝɣɩ tǝ lɑpʋ. 19 Mɑɑ lɑkɩ kʋpɑntʋ nti mɑ sɔɔlɑɑ tɔ. Amɑ ɩsɑɣɑtʋ nti mɑ kisɑɑ tɔ ntǝɣɩ mɑ mǝlɑɑ nɑ mɑ́ lɑkɩ. 20 Mɑ lɑkɩ nti mɑɑ cɑɑ tɔ, pǝ tɑɣɑ mɑ́ nɔkǝnɑ. Amɑ ɩsɑɣɑtʋ nti tǝ kɑntɑ mɑ tɑɑ tɔ ntɩ tǝ tǝnnɑ mpʋ.

21 Mɑ cɛkǝnɑ yɑɑsi ɩnɛ sɩ ye mɑ cɑɑkɩ kʋpɑntʋ lɑpʋ ɩsɑɣɑtʋ tɛɛnɑ nɔɣɔ. 22 Hɑtuu mɑ lotu tɑɑ mɑ sɔɔlɑ Ɩsɔ kʋsǝsɩɩtʋ mɛɛ. 23 Amɑ mɑ mɑɣɑnɑ yɑɑsi nɔɣɔlʋɣʋ mɑ tɔnʋɣʋ tɑɑ, nɑ tɑm ɩ pɛkǝlǝɣɩ nɑ ɩ́ yoonɑ yɑɑsi wei ɩ tɔɔ mɑ lɑɣɑtʋ nyǝmɑ́ tɔ, nɑ ɩ́ lɑ-m ɩsɑɣɑtʋ tiipile nte tǝ kɑntɑ mɑ tɑɑ tɔ tǝ sɑlǝkɑ tʋ. 24 Amɑ mɑ tɔm wɛ kʋnyɔŋ yoo, tɔnʋɣʋ kʋnɛ kʋ tɔŋnɑ-m kʋɣʋ kɛ́. A yɑkɩ-m? 25 Amɑ Tɑcɑɑ Yesu Kilisiti tɔɔ Ɩsɔ fɔɔ.

Mpʋ tɔ, hɑtuu mɑ hʋwɛɛ tɑɑ Ɩsɔ kʋsǝsɩɩtʋ kɛ mɑ tǝŋǝɣɩ. Pǝ kɑɑsɑ mɑ yʋlʋtʋ pilimile tǝnɛ tɔ, ɩsɑɣɑtʋ yɑɑsi kɛ tǝlɛ tǝ tǝŋǝɣɩ.