1 Ye mpʋ mpɑ nɑ Yesu Kilisiti pɑ kpɛntɑɑ tɔ pɑ kɑɑ tɑsɑ pɑ tɔm kɛ kʋɣʋ. 2 Pǝ tɑɣɑ pʋlʋ tɔɔ, Ɩsɔ Feesuɣu lɑkɩ ɩsǝnɑ nɑ ɩ́ hɑɑ weesuɣu kɛ mpɑ nɑ Yesu Kilisiti pɑ kpɛntɑɑ tɔ, ḿpʋ́ɣʋ́ pǝ lɑpɑ nɑ pǝ́ lǝsɩ-m ɩsɑɣɑtʋ nɑ sǝm pǝ yɑɑsi ɩnɩ ɩ tɑɑ. 3 Ɩsɔ lɑpɑ mpi Moisi kʋsǝsɩɩtʋ tɑɑ pǝsɩ nɑ tǝ́ lɑ yʋlʋwɛɛtʋ tɔɔ tɔ. Ɩ hʋlɑ yǝlɑɑ tɑsǝkǝlɛ kɛ timpi pɑ lɑkɩ ɩsɑɣɑtʋ kɛ tɑm tɔ, mpi tɔ ɩ tilɑ ɩ mɑɣɑmɑɣɑ ɩ pu. Nɑ wɛɛtʋ nti tǝ nǝɣǝsǝnɑ yǝlɑɑ ɑsɑɣɑɑ nyǝntʋ tɔɣɔ ɩ kɔmnɑɑ sɩ ɩ́ hɩɩsɩ ɩsɑɣɑtʋ. 4 Ɩsɔ lɑpɑ ḿpʋ́ɣʋ́ sɩ nti kʋsǝsɩɩtʋ cɑɑlɑɣɑɑ-tʋ sɩ tǝ́ lɑ tɔ, tǝ lɑ pǝ tǝnɑɣɑ teitei. Pǝ tɑɣɑ pʋlʋ, kɑɣɑnɑ tǝ yelɑ tɑ́ wɛɛtʋ kʋpǝntʋ tǝŋʋɣʋ nɑ tǝ́ tǝŋǝɣɩ Ɩsɔ Feesuɣu. 5 Mpɑ pɑ tɔŋnɑ tɔntɛ kɛ yʋlʋ wɛɛtʋ kʋpǝntʋ tɑɑ tɔ tǝ tike tǝ tɔm kɛ pɑ nyǝmɑ́. Nɑ mpɑ pɑ tǝŋǝɣɩ Ɩsɔ Feesuɣu tɔ kʋlɛ kʋ nyǝntʋ tike kɛ pɑ lɑkɩ. 6 Ye n tǝŋǝɣɩ yʋlʋwɛɛtʋ kʋpǝntʋ kɛ tɑm, n tɛɛsǝɣǝnɑ sǝm kɛ́. Amɑ ye Ɩsɔ Feesuɣu nyǝntʋ kɛ n lɑkɩ tɑm, n hikiɣi weesuɣu nɑ lɑŋhɛɛlɛ kɛ́. 7 Mpɑ pɑ sɛɛsɑ ɩsǝlɛ nɑ yʋlʋwɛɛtʋ kʋpǝntʋ tǝŋʋɣʋ tɔ, pɑ kɛ́ Ɩsɔ kolontunɑɑ kɛ́. Pɑɑ tǝŋǝɣɩ Ɩsɔ kʋsǝsɩɩtʋ, pɑɑ tɩɩ pǝsǝɣɩ-tɩ tɔ se. 8 Mpɑ pɑ tɔŋnɑ pɑ yʋlʋwɛɛtʋ kʋpǝntʋ tǝŋʋɣʋ tɔ, pɑɑ pɩɩ lɑ ɩsǝnɑ, pɑ kɑɑ te Ɩsɔ.

9 Amɑ mɛ ɩlɛ mǝ fɛɩ yʋlʋwɛɛtʋ kʋpǝntʋ tɑɑ tɔtɔ. Ɩsɔ Feesuɣu nyǝntʋ tɑɑ kɛ́ ɩ́ wɛɛ. Pǝ tɑɣɑ pʋlʋ tɔɔ, Ɩsɔ Feesuɣu cɑɣɑ mǝ tɑɑ tɔ se. Wei ɩ tɑɑ Kilisiti Feesuɣu fɛɩ tɔ ɩ tɑ kɛ ɩ nyǝŋ. 10 Ye Kilisiti wɛ mǝ kiŋ pɑɑ nɑ mǝ ɩsɑɣɑtʋ kɑ kʋ mǝ tɔnǝŋ tɔ, Ɩsɔ Feesuɣu wɛ mǝ tɑɑ nɑ tomɑ. Mpi tɔ pǝ pǝsɑ-mɛɣɛ kʋpɑmɑ kɛ Ɩsɔ ɩsɛntɑɑ kɛ́. 11 Ye Ɩsɔ Feesuɣu ŋku kʋ feesɑ Yesu kɛ́ sǝtɑɑ tɑɑ tɔ kʋ cɑɣɑ mǝ tɑɑ, wei ɩnɩ ɩ kɑ feesɑ Kilisiti kɛ sǝtɑɑ hɛkʋ tɔ, kʋlʋm ɩnɩ ɩ kɑ́ hɑ mǝ tɔnǝŋ kʋsǝpǝŋ ɩnɛɣɛ tomɑ nɑ ɩ Feesuɣu ŋku kʋ cɑɣɑ mǝ tɑɑ tɔ kʋ toŋ tɑɑ.

12 Mɑ tɑɑpɑlɑɑ, pǝ tɔɔ kɛ́ pǝ nyǝkɑ-tʋ, nɑ pǝ tɑɣɑ sɩ tǝ́ tǝŋ tɑ́ yʋlʋwɛɛtʋ kʋpǝntʋ nɑ tǝ́ lɑkɩ nti tǝ nyɩɩlǝɣɩ tɔ. 13 Pǝ tɑɣɑ pʋlʋ, ye ɩ́ tǝŋǝɣɩ mǝ yʋlʋwɛɛtʋ kʋpǝntʋ, ɩ́ kɑ́ sɩ. Amɑ ye ɩ́ kisɑ mǝ yʋlʋwɛɛtʋ kʋpǝntʋ yɑɑsi sɩ tǝ́ sɑɑlɩ nɑ Ɩsɔ Feesuɣu Nɑŋŋtʋ toŋ, ɩlɛ ɩ́ tʋlɑ-tɩ. 14 Pɑ tǝnɑ mpɑ Ɩsɔ Feesuɣu tiikiɣi tɔ pɑ kɛ́ Ɩsɔ piyɑ kɛ́. 15 Pǝ tɑɣɑ pʋlʋ tɔɔ, Ɩsɔ Feesuɣu ŋku pɑ hɑ-mɛ tɔ kʋ tɑ kɛ Feesuɣu ŋku kʋ lɑkɩ-mɛɣɛ yomɑɑ nɑ kʋ́ tɑsǝɣɩ-mɛɣɛ sɔɣɔntʋ tʋɣʋ tɔ. Amɑ kʋ kɛ́ Ɩsɔ Feesuɣu ŋku kʋ lɑkɩ-mɛɣɛ Ɩsɔ pǝyɑlɑɑ nɑ kʋ lɑkɩ nɑ ɩ́ yɑɑkɩ Ɩsɔ sɩ mɑ Cɑɑ, Pɑɑpɑ tɔ. 16 Tǝ kɛ́ Ɩsɔ piyɑ, nɑ Ɩsɔ Feesuɣu mɑɣɑmɑɣɑ hʋ́lǝ́ɣɩ́ ḿpʋ́ɣʋ́ hɑtuu tɑ́ tɑɑ. 17 Tǝ kɛ́ ɩ piyɑ, nɑ kʋpɑntʋ nti Ɩsɔ tɔmɑ sɩ ɩ kɑ́ hɑ ɩ yǝlɑɑ ɩsɩɩ kpɑncoou tɔ, tɩɩ hiki-tɩ tɔtɔ. Tɑ́ nɑ Kilisiti tɩɩ kpɛntǝnɑ-tǝɣɩ hikuɣu. Ye tɑ́ nɑ-ɩ tǝ kpɛntɑ wɑhɑlɑ hikuɣu tɑ́ nɑ-ɩ tɩɩ kpɛntɩ ɩ teeli tɑɑ tɔtɔɣɔ.

18 Ye mɑ kiŋ pǝ fɛɩ ɩsɩɩ pɑɑ kpɑɣɑ tɑ́ kɑɣɑnɑ kʋnyɔntɔɣɔlɛ nɑ pɑ́ kɛɛsǝnɑ teeli wei cele Ɩsɔ kɑ́ tʋ-tʋ tɔ. 19 Kʋŋmɑŋmɑm tǝnɑ tɑŋɑɑ tǝtɛɣɛtɛɣɛ sɩ Ɩsɔ ɩ́ lǝsɩ ɩ pǝyɑlɑɑ nɑ pǝ́ nɑ́. 20 Pǝ tɑɣɑ pʋlʋ tɔɔ, tɑɑlǝm nyǝm tɑɑ kɛ́ pǝ sʋsɑ kʋŋmɑŋmɑm mpɩ, nɑ pǝ tɑɣɑ sɩ pǝ nɔkɑɑ. Ɩsɔ tʋnɑ-wǝɣɩ mpʋ. Pɑɑ nɑ mpʋ tɔ nɑ tɛɛlʋɣʋ wɛɛ kɛ́. 21 Pǝ tɑɣɑ pʋlʋ tɔɔ, kʋyɑkʋ nɑkʋlɩ pɩɩ tɛ nɑ Ɩsɔ kʋŋmɑŋmɑm tǝnɑ hɛɛsɩ wɑkǝlʋɣʋ yomle nɑ pǝ te tǝkpɑtɑɑ kɛ́ teitei ɩsɩɩ Ɩsɔ piyɑ kɑ te wɑɑtʋ wei pɑɑ tɛ kɑsɑɣɑmpiyɑ pǝsʋɣʋ tɔ. 22 Tǝ nyǝmɑ́ sɩ hɑlǝnɑ sɑŋɑ kʋŋmɑŋmɑm tǝnɑ tɔŋnɑ mɔlɑ nɑ pǝ́ sɑlǝmǝɣɩ ɩsɩɩ ɑlʋllʋ sɑlǝmʋɣʋ tɔ. 23 Pǝ tɑɣɑ kʋŋmɑŋmɑm tike mɔlǝɣǝnɑ. Amɑ nɑ tɑ́ mpɑ tǝ wɛnɑ Ɩsɔ Feesuɣu ɩsɩɩ kɑncɑɑlɑɣɑ kʋcɔɔʋ ŋku Ɩsɔ lɑpɑ-tʋ tɔ, tɑ́ mɔlǝɣɩ tɑ́ tɑɑ tɔtɔ, nɑ tǝ́ tɑŋɑ kʋyɑŋku Ɩsɔ kɑ́ pǝsɩ-tʋɣʋ ɩ piyɑ nɑ ɩ́ tɛɛsɩ tɑ́ tɔnǝŋ ɩnɛɣɛ yɑpʋ tǝkpɑtɑɑ tɔ. 24 Tǝ nɑwɑ sɩ tǝ hikɑ tɑ́ yɑpʋ yɑɑ, ɩlɛ pǝ wɛ tɛɛlʋɣʋ tɑɑ tɔm nɑ pǝ́cɔ́. Ye mpi yʋlʋ nɑɑ tɔ pǝ tɔɔ kɛ́ ɩ tɛɛlǝɣɩ, ɩlɛ pǝ tɑɣɑ tɛɛlʋɣʋ ntɛ́ tǝnɑ. Awe kɑ́ tɑsɑ tɛɛlʋɣʋ kɛ mpi ɩ tɛmɑ nɑʋ tɔ? 25 Ye mpi tǝ tɑ nɑtɑ tɔ pǝ tɔɔ kɛ́ tǝ tɛɛlǝɣɩ ɩlɛ tǝ cɑɣɑnɑ suulu kɛ́ nɑ tǝ́ tɑŋɑ-wɩ.

26 Pǝ kɑɑsɑ Ɩsɔ Feesuɣu nɑ́ kɔŋ tɔtɔ nɑ kʋ́ sǝŋnɑ tɑ́ mpɑ tǝ kɛ́ ɑcɑmɑɑ tɔ. Pǝ tɑɣɑ pʋlʋ, tǝ tɑ nyɩ ɩsǝnɑ tɩɩ sǝlǝmɩ nɑ pǝ́ té tɔ. Amɑ Feesuɣu ŋkʋ kʋ sǝlǝmǝɣǝnɑnɑ-tʋɣʋ Ɩsɔ, nɑ miituɣu mpi yʋlʋ kɑɑ pǝsɩ nɑ ɩ́ kɛɛsɩ nɔɣɔ tɑɑ tɔ. 27 Ɩsɔ wei ɩ nɑɑ lotu tɑɑ tɔ ɩ nyǝmɑ́ kpɑkpɑɑ kɛ mpi Feesuɣu Nɑŋŋtʋ cɑɑ ɩ sǝlǝmɩ tɔ. Pǝ tɑɣɑ pʋlʋ, mpɑ pɑ kɛ́ Ɩsɔ nyǝ́mɑ tɔ mpɛɣɛ Ɩsɔ Feesuɣu Nɑŋŋtʋ sǝlǝmǝɣǝnɑ teitei ɩsɩɩ Ɩsɔ cɑɑkɩ tɔ.

28 Tǝ nyǝmɑ́ sɩ kʋpɑntʋ kɛ Ɩsɔ lɑkɩ pǝ tǝnɑ pǝ tɑɑ kɛ́ mpɑ pɑ sɔɔlɑ-ɩ nɑ pɑ́ kɛ́ mpɑ ɩ yɑɑwɑ ɩsɩɩ ɩ nɔkʋɣʋ wɛɛ tɔ. 29 Mpɑ Ɩsɔ kɑ lǝsɑ hɑtuu lɔŋ tɔ, ɩ lɑɑlɑɑ kɛ́ nɑ ɩ́ fɑɣɑsɩ-wɛ nɑ pɑ mpɑɑ sɩ pɑ́ nǝɣǝsǝnɑ ɩ Pǝyɑɣɑ, nɑ kɛlɛ kɑ́ hiki newɑɑ pɑɣɑlɛ. 30 Mpɑ Ɩsɔ kɑ lɑɑlɑɑ nɑ ɩ́ fɑɣɑsɩ mpʋ tɔ ɩ lǝsɑ-wɛɣɛ, nɑ mpɑ ɩnɩ ɩ lǝsɑ mpʋ tɔɣɔ ɩ lɑpɑ nɑ pɑ́ pǝsɩ yʋlʋpɑmɑ kɛ ɩ ɩsɛntɑɑ. Mpɑ ɩ lɑpɑ nɑ pɑ́ pǝsɩ yʋlʋpɑmɑ kɛ mpʋ ɩnɩ tɔɣɔ ɩ yelɑɑ nɑ pɑ́ hiki pɑ pɑɑ nyǝm kɛ ɩ teeli tɑɑ tɔtɔ.

31 Ye mpʋ suweɣe tɩɩ tɑsɑ yɔɣɔtʋɣʋ tɔtɔ? Ye pǝ wɛɛ sɩ Ɩsɔ wɛ tɑ́ tɔɔ, ɩlɛ ɑwe kɑ́ lɩɩ-tʋɣʋ koloŋɑ? 32 Ɩ tɑ kisinɑ ɩ mɑɣɑmɑɣɑ ɩ Pǝyɑɣɑ tɔɔ. Amɑ ɩ hɑ-kɛ tǝkpem kɛ́ tɑ́ tǝnɑ tɑ́ tɔɔ. Tɔʋ, ɩ tɑ kisi ɩ Pǝyɑɣɑ hɑʋ, kɑcɑŋfɑnɑ pǝ tǝnɑ mpi pǝ kɑɑsɑɑ tɔ? 33 Ye mpʋ ɑwe kɑ́ tʋ tɑɑlɩ kɛ́ mpɑ Ɩsɔ lǝsɑɑ tɔ? Pǝ tʋ fɛɩ, pǝ tɑɣɑ pʋlʋ tɔɔ, Ɩsɔ mɑɣɑmɑɣɑ hʋlǝnɑ sɩ pɑ tɔm tɑ sɩ tiili. 34 Nɑ ɑwe kɑ́ mɑɣɑsɩ pɑ tɔm kʋɣʋ tɔtɔ? Pǝ tʋ fɛɩ, pǝ tɑɣɑ pʋlʋ tɔɔ, Yesu Kilisiti tɩɩ sǝpǝnɑ, nɑ ɩ́ tɩɩ fem nɑ ɩ́ wɛ Ɩsɔ kɔŋkɔŋ tɑɑ nɑ ɩ́ sǝlǝmǝɣǝnɑ-tʋ. 35 Ɩlɛ pepe kɑ́ lǝsɩ Kilisiti sɔɔlʋɣʋ kɛ tɑ́ tɔɔ? Wɑhɑlɑ kɑ́ pǝsɩ? Lɑŋpǝsǝlɛ sɔsɔɔlɛ nɑ? Yɑɑ kʋnyɔŋ ŋku pɑɑ tʋ-tʋ tɔ? Nyɔɣɔsɩ nɑ? Yɑɑ hʋlʋmǝŋ? Asolɑ tɑɑ wɛɛʋ nɑ? Yɑɑ sǝm? 36 Ɩsɔ Tɔm tɑɑ pɑ ŋmɑɑwɑ mpʋ sɩ: