Jon
Lagale Lavavang At Ne Iesu Karisito
Jon Ga Malagan I
Jon Ga Malagan I
Levelinga Loklox Axasep
Levenmaares 85–95 A.D.
Jon neni lara atnedi lasangaun mi legepura lavaun pinivu at ne Iesu. Buaang levenaleng neni ga emu tangtagap mi ne Iesu, kuren la neni ga ven leven gugu ren la gang tonga levenanasa at ne Iesu. Mak mi ne Metiu, la ne Luk, nedi diga malagan avot levenbuk atdi la lempapaase atdi ga sixit emu mun. Ne Jon neni ga mu pit la ga malagan lempapaase ga lok petpes aleng tino. Do ata ven na levenmamalagan at ne Jon i ven ngan ta i do lara vetpes mo ga malagan i, ketla na levelinga ne Jon axa ga malagan i. Neni goxo vara i do na lox asilok axa i, kuren la neni ga lok. “Mo lavaun pinivu ren diga lok,” ua i epovo gita lok, “Mo lavaun pinivu ren maga lok.” Mo do una us lavavang ne Jon ga malagan i, uba ven i do ne Iesu neni lavatturunen at lempapaase ruturun. Neni lavatturunen at lisisixam la lorooro la neni lakde mi ladan at lorooro lexen. Neni laradi loklok tatao la neni ik lok tatao avukat dik. La neni langas nedik di lok ka i uto at ne Temen dik ne Moroa. Neni lentangas atdik, la Leeme Silok atdik, la lavatturunen atdik la neni mun ne Nitna ruturun at ne Moroa.
Lengkot silok keneng at na lubuk
1:1-18 Iesu neni ga laa meva kusu dina visix i de.
1:19-51 Iesu ga ro ka lentaba atnedi lavaun pinivu.
2:1–12:50 Iesu ga gugu saxaven to melamgo at limixin.
13:1–17:26 Levempapaase at ne Iesu at laanan kaala.
18:1–19:42 Larangtanga alis la lanmet at ne Iesu.
20:1–21:25 Iesu ga roo xat basinge lanmet.
1
Iesu Neni Lenavolo
1 * Jo 17:5; 1 Jo 1:1-2; Li 19:13Ganoxa at lereot Lenavolo mo gara nemen pam. La neni gak lok eburu mi ne Moroa, la neni ga epovo mun mi ne Moroa. 2 Boro xa at lereot, Lenavolo gak lok eburu mi ne Moroa.
3 * 1 Ko 8:6; Kl 1:16-17; Ib 1:2Keneng teren ne Moroa ga rudum li levempanga axap. La kopmen tepanga at nai luruntudum li, gita ravasu boro at tara vetpes. 4 * Jo 5:26Ga Lenavolo neni lavasuun at lorooro, la na lorooro ga raba laxasep ti limixin. 5 * Jo 3:19La laxasep i soosoo ri limixin at lamain la mo limixin kopmen di goxo lox epovo i do gita lox asi i.
Lovotpot At Ne Jon Laradi Sep Susu
6 * Mt 3:1; Lu 1:13-17,76Moroa ga riki laradi vapaase ren, laasen teren ne Jon. 7 Ga vot kusu na paase ri limixin mumu nom laxasep, kusu nedi diba ronga i la dina nunu at laxasep. 8 * Jo 1:20Neni xa xopmen mo laxasep. Neni ga vot mun kusu na tong asu levelinga ap mo laxasep. 9 * Jo 8:12; 1 Jo 2:8Anai ni laxasep tuturun, laxasep ga si ude at na lavatbung menemen la ik lox asuusu laxasep ti limixin axap.
10 * Jo 1:3; 17:25Lenavolo ga nemen at na lavatbung menemen, ketla limixin di goxo ven kibis i, keke do neni ga rudum li lempanga axap. 11 Neni gat pas uto at lubung mixin teren, ketla limixin axa ren di goxo siam ka i. 12 * Ga 3:26Ketla nedi diga siam ka i la diga nunu ren, ni ga lok li nedi ngan tinotno luvutnitna ne Moroa. 13 * Jo 3:3-6; Je 1:18; 1 Pi 1:23Di goxo ravasu ngan luvutnitna ne Moroa at loklok at na lavatbung menemen, i ngan ta do laxamdak mi laxaalik at lenasun, kopla at lavavara at latlok, kopmen. Ne Moroa xa, neni ne Temen di.
14 * Ais 60:1-2; Ga 4:4; Pl 2:7; Ib 2:14; Lu 9:32; Jo 2:11Lenavolo ga vee radi la ga nemen kantubu atnama. Maga ven lisisixam teren, la ni ga umsu mi letaba nabalamu la levelinga ruturun at ne Moroa. La mo lisisixam neni ga lok ka i ngan legesamdak at ne Temen.
15 * Jo 1:27,30; Mt 3:11Jon ga vavang min la ga xup silok ti limixin keretna, “Neni na laradi nenia aga paase ali mumu i. Aga vaase xeretna, ‘Laradi mo naba vot melemu rak, neni i silok aleng tia, mila neni ga rooro avot tia.’ ” 16 * Kl 2:10Letaba nabalamu ren i silok aleng tidik, la kerepmo neni ira lox anarong nedik, la iram taba amisik dik mi nom leveloklox anarong. 17 * Pas 34:28; Ro 6:14; 10:4Moroa ga raba avolo ne Moses mi Laulis Linga. Ketla letaba nabalamu at ne Moroa mi levelinga ruturun ga ravasu at ne Iesu Karisito. 18 * Pas 33:20; Jo 6:46; 1 Ti 6:16; 1 Jo 4:12; Mt 11:27Tara goxovisi na ven ne Moroa. Ne Nitna xusuk mun, neni i epovo mi ne Moroa, neni it kis esogo mi ne Temen la neni xa ga paase axasep dik mi ne Moroa.
Levesusue Mumu Ne Jon
Mi Lugugu Ren
Mi Lugugu Ren
(Mt 3:1-12; Mk 1:1-8; Lu 3:1-18)
19 Limixin amgomgo ro Jerusalem diga riki aonon lentaba lavamaasa la lentaba luvuttadi gugu at loogu laplavang* Na luvuttadi, nedi at libibinat at ne Levi la diga lok tooro lavamaasa ro xeneng at loogu laplavang. uto ri ne Jon la diga sue i do, “Nenu nege?” 20 * Jo 3:28Jon goxo ronga xepe di xusu neni gi toxo vorang lususue atdi, ketla neni ga vaase axasep di xusu dina xasep. Ni ga vaase xeretna, “Nenia xopmen Lanarong.”
21 * Lal 18:15,18; Mt 11:14; Jo 6:14; 7:40La diga sue manga i, “Nenu nege? Kereva, nenu mo leeme vapaase ali megano, ne Elaisa?”
Jon ga vorang i ridi xeretna, “Nenia xopmen.”
La diga sue manga i xeretna, “Kereva, nenu leeme vapaase ali, ne Moroa ga xaape min at levelinga at ne Moses?”
La ni ga vorang i ridi xeretna, “Kopmen.”
22 Melemu rinotno diga sue i, “Una tong i rinama do nenu nege. Ma vara i do maba lok ka tovoporang at na lususue uto atnedi limixin amgomgo diga riki nama. Una tong i do nenu nege.”
23 Jon ga vorang i ridi mi levelinga at leeme vapaase ali ne Aisaia, ni ga lok keretna,
“Nenia mo lara ip kup to at lamatbin keretna, ‘Mina lox akmokso langas ti Leeme Silok.’ ” Ais 40:3
24 La lentaba lubung Parisi, luvuttadi amgomgo diga riki di, diga vot pasa ne Jon. 25 * Mt 21:25; Jo 1:33Diga sue i xeretna, “Do nenu xopmen Lanarong, kopla ne Elaisa, kopla mo leeme vapaase ali, la tila u sep susu limixin?”
26 Jon ga vorang i ridi xeretna, “A sep susu limixin mi ladan mun. Kantubu atnimi laradi mo i tu, nemi xopmen minaklen i. 27 * Jo 1:15; Gu 13:25Neni mo naba vot melemu rak, ketla nenia axo epovo xusu ana soxomus luvanga vatpas teren mila i silok aleng tia.”* Anai ni lavapaase poovo ri lox asuusu i do ne Jon ga lox asu langsangan loklok ngangao ren ti ne Iesu.
28 * Mt 3:6; Jo 10:40Anaa levempanga ga ravasu ro Beteni, to at lara lenep dan Joridan, ne Jon ga sep susu limixin e.
Lanasip At Ne Moroa
29 * Ais 53:6-7; Jo 1:40; 1 Pi 1:18-19Ap mo manga lara laaleng Jon ga ven ne Iesu gat pas go boro, la ni ga vaase xeretna, “Pen ba i, ni nom Lanasip at ne Moroa naba doxoma xepe laxakapmek at limixin at na lavatbung menemen kopok. 30 * Jo 1:15Neni na laradi nenia aga paase min tinemi, la aga vaase do, ‘Laradi mo naba vot melemu rak, neni i silok aleng tia, mila neni ga rooro avot tia.’ 31 Gano a goxoklen i do neni nege, ketla nenia aga vot de ngan laradi sep susu mene mi ladan kusu ti lox asuvos i ri leme Israel.”
32 * Mt 3:16La ne Jon ga tong asu lavapaase axasep keretna, “Aga ven Loroonan Kaala ga rava si boro vana at laxalibet la ga nemen teren, ga lok ngan lamno. 33 * Lu 3:2-3Nia xovisi goxoklen i, ketla ne Moroa ga riki ia xusu anap sep susu limixin mi ladan la neni ga lok tia xeretna, ‘Unaba ven Loroonan Kaala naba si boro vana la na nemen at tara taradi. Neni mo laradi naba sep susu limixin mi Loroonan Kaala.’ 34 * Mt 3:17; 17:5; 27:54Agara ven pam i la a tong i rinimi do neni ne Nitna ne Moroa.”
Lavaun Pinivu At Ne Iesu
35 Ap mo manga lara laaleng melemu Jon ga nemen manga ro saparap ladan sen Joridan eburu mi legepu radi at lavaun pinivu ren. 36 * Jo 1:29At loxonaleng neni ga ven ne Iesu gat pas aurer i, la neni ga lok keretna, “Pen ba i. Neni na, Lanasip at ne Moroa.”
37 Mo luun pinivu ren duga ronga na levelinga la duga emu eburu nga mi ne Iesu. 38 Iesu ga rem gili la ga ven du, duga mumu asu i, la ga sue du, “Kereva mo?”
Duga vorang i rin keretna, “Rabai. Loogu ram ua?” (Lavasuun at loxolinga Rabai do, leeme loklox ase.)
39 La ne Iesu ga lok, “Uto dik ata ven i.” Kuren la duga emu min la duga ven lenep neni gak lok teren. La duga nemen go ap mo laaleng axap eburu min, ga se at lavanuet konaleng ga ukantinao.
40 * Mt 4:18-20Endru, neton ne Simon Pita, neni lara atdu ga ronga mo levelinga at ne Jon la ga emu mi ne Iesu. 41 * 1 Sml 2:10; Sam 2:2; Jo 4:25La soso mun ne Endru ga vot pasa neton, ne Simon la ga lok tin, “Mara long lenget ka vam Lanarong.” Lavasuun at loxolinga Lanarong do, Karisito.
42 * Mt 16:18; Mk 3:16Melemu neni ga lam ka ne Simon uto saparap ne Iesu. Iesu ga ven tin la ga lok tin keretna, “Nenu, ne Simon, nitna ne Jon. Laasen ta ru ne Kepas.” Na laasen i lok ngan mun ne Pita la lavasuun teren do luuat kis.
Iesu Ga Ro Xaka
Ne Pilip Mi Ne Natanael
Ne Pilip Mi Ne Natanael
43 * Mt 8:22; Mk 2:14Ap mo manga lara laaleng Iesu ga vara i do nat pas uto Galili. Ni ga vot pasa ne Pilip la ga lok tin keretna, “Ude u, la una mumu asu ia.”
44 Pilip neni boro Betsaida, lemenemen at ne Endru mi ne Pita. 45 * Lal 18:18; Ais 7:14; 9:6; Jer 23:5; Isi 34:23Pilip ga vot pasa ne Natanael la ga lok tin, “Mara long lenget ka vam laradi ne Moses ga malagan axasep mumu i ro xeneng at levenbuk at Laulis Linga. La lavaeme vapaase ali bok diga malagan mumu i. Neni ne Iesu, lamdak at ne Josep, boro Nasaret.”
46 * Jo 7:41,52La ne Natanael ga sue i, “I epovo xusu tempanga avukat naba vot boro Nasaret?”
Pilip ga lok, “Ata onon la una ven ba i.”
47 At loxonaleng ne Iesu ga ven ne Natanael ga vas auret, la ni ga vaase mumu i xeretna, “Neni laradi ruturun boro Israel, kopmen tempanga xaxarang nak lok at lorooro ren.”
48 * Sam 32:2La ne Natanael ga sue i. “Uklen ba ia xereva?”
Iesu ga vorang i rin keretna, “At loxonaleng ne Pilip kovisi na lam kaka u, ara ven pam u, ut kis to maxopok at luuna pik.”
49 * Mt 14:33; 16:16; 27:42; Mk 3:11Natanael ga lok, “Rabai. Nenu ne Nitna ne Moroa. Nenu Loorong Silok mede Israel.”
50 Iesu ga lok tin, “U nunu mene rak mila nenia a tong i ru do a ven u ro maxopok at luuna pik. Unaba ven levempanga silok aleng ti na lavanga.” 51 * Lur 28:12La ni ga lok bok tidu, “A tong tuturun i rinumu do munaba ven laxalibet na rem suang la munaba ven lubung angelo at ne Moroa dinat pas si la dinat pas urut uto saparav ia Laradi Mevana.”
*1:1: Jo 17:5; 1 Jo 1:1-2; Li 19:13
*1:3: 1 Ko 8:6; Kl 1:16-17; Ib 1:2
*1:13: Jo 3:3-6; Je 1:18; 1 Pi 1:23
*1:14: Ais 60:1-2; Ga 4:4; Pl 2:7; Ib 2:14; Lu 9:32; Jo 2:11
*1:17: Pas 34:28; Ro 6:14; 10:4
*1:18: Pas 33:20; Jo 6:46; 1 Ti 6:16; 1 Jo 4:12; Mt 11:27
*1:19: Na luvuttadi, nedi at libibinat at ne Levi la diga lok tooro lavamaasa ro xeneng at loogu laplavang.
*1:21: Lal 18:15,18; Mt 11:14; Jo 6:14; 7:40
*1:27: Anai ni lavapaase poovo ri lox asuusu i do ne Jon ga lox asu langsangan loklok ngangao ren ti ne Iesu.
*1:29: Ais 53:6-7; Jo 1:40; 1 Pi 1:18-19
*1:41: 1 Sml 2:10; Sam 2:2; Jo 4:25
*1:45: Lal 18:18; Ais 7:14; 9:6; Jer 23:5; Isi 34:23
*1:49: Mt 14:33; 16:16; 27:42; Mk 3:11
*1:51: Lur 28:12