1 Penga niyan, impeibing i Pilato si Jesus doton didalem te balay aw impebadas. 2 Penga te pegbadas te menge sondalo kandin, linekò dan se belagen doen tigis, aw yan se insangkob diyà te olo din iling te korona te selotan. Impesaol dan heman sikandin te melalag saol te selotan. 3 Penga niyan, migpelingo-lingo dan dimuyun kandin iling te pegduyun dan te selotan, aw minikagi dan, “Iduyun sikona Selotan te menge Judiyo.”

Nenampak dan heman kandin.

4 Todà limowà si Pilato te balay, aw minikagi diyà te menge otaw netipon, “Na, ipelowà ko den sikandin dini kenyo amon ketegahan niyo te wedad palos salà din kinità ko.”

5 Penga niyan, limowà si Jesus te balay. Sinengkoban pa sikandin te belagen doen tigis, aw impesaol pa te melalag saol te selotan. Minikagi si Pilato, “Na, tengtengi niyo sikandin.”

6 Meneng se menge pengolo te simbahan aw otaw egtonggò te simbahan, pegkità dan ki Jesus, migbelobansag dan, “Imetayi sikandin. Lensangi diyà te kros.”

Minikagi si Pilato, “Sikiyo se mengibing kandin aw meglansang kandin diyà te kros amon matay, so se kenaken, kinità ko te wedad salà din.”

7 Minikagi se menge obanen te Judiyo, “Doen punù ingkeliwat i Moises diyà kenami linèpangan din, aw yan se doun te keilangan ipelumun sikandin aw imetayan, so minikagi te sikandin se Batà te Timanem.”

8 Pegdineg i Pilato te Batà te Timanem si Jesus, labi pa nelemitan. 9 Todà din inibing si Jesus doton didalem te balay aw todà din ininsà, “Kenan ka lay lekat?”

Meneng wedà taba si Jesus. 10 Nepela si Pilato, aw minikagi, “Mèpiya aw tomaba ka, so netegahan no te siak se mepakay somogò aw ipelowà ka aw ipelansang ka diyà te kros amon imetayan.”

11 Minikagi si Jesus, “Simpana wedà ka pelowani te Timanem, eked ka pekelowan diyà kanak seini. Yan se doun te labi pa mebegat se salà te otaw migpeibing kanak dini kamno.”

12 Pegdineg i Pilato kenyan, ibeg din megpelowà ki Jesus. Meneng migbelobansag se menge obanen te Judiyo, “Aw ipelowà no sikandin, meinang ka poon te selotan tadon si Cesar, so aw megpelingo-lingo se otaw selotan, poon sikandin i Cesar.”

13 Pegdineg i Pilato te kagi dan, inibing din si Jesus doton te lowà te balay, aw nenenoo kidoen te oseyanan iningedanan Gabata te otaw eg-ikagi te Hebreo, meneng se kelebadan niyan, “Tindeganan Bato.” 14 Aldaw sìyan, yan se aldaw te pegtegilan dan te Pista te Pegpelowà. Sagwa agpet den alas dosi, minikagi si Pilato, “Na, seini se selotan niyo.”

15 Meneng migbelobansag dan, “Imetayi sikandin. Imetayi. Lensangi diyà te kros.”

Minikagi si Pilato, “Meibeg kaw lay te ipelansang ko se selotan niyo diyà te kros?”

Timaba se menge pengolo te simbahan, “Sebad olò se selotan day, aw yan si Cesar.”

16 Penga niyan, impeibing i Pilato si Jesus amon ilansang diyà te kros.

17 Nayan, inibing si Jesus te menge sondalo, aw impetiang dan kandin se kros lensangan kandin. Nesayo dan lekat te Jerusalem aw dimoton dan te bontod iningedanan Golgota te otaw eg-ikagi te Hebreo, meneng se kelebadan niyan, “Tòlan te Olo.” 18 Pegdateng dan doton, inlansang dan sikandin diyà te kros. Doen heman dowa otaw doma din inlansang diyà te kros intollok diyà te tangkil din, aw si Jesus diyà te tengà-tengà. 19 Doen insolat i Pilato aw impesawol din iyan doton diatas te olo i Jesus, kagi niyan, “Seini si Jesus tege Nasarit, Selotan te menge Judiyo.” 20 Medita se Judiyo migbasa kenyan, so medapag kidoen se lonsod te Jerusalem. Insolat iyan te telo kemolò te kagi, Hebreo, aw Latin, aw Griego. 21 Minikagi se menge pengolo te simbahan te Judiyo diyà ki Pilato, kagi dan, “Mèpiya aw eked no solati se kagi, ‘Seini se Selotan te menge Judiyo.’ Keilangan iselilin no se kagi, ‘Migpelingo-lingo se otaw seini Selotan te menge Judiyo.’ ”

22 Timaba si Pilato, “Eked ko den todai se insolat ko.”

23 Penga te peglansang te menge sondalo ki Jesus diyà te kros, inabat dan se penenaktun linowas din. Pigtalad-talad dan iyan te epat talad amon doen meabat te teg sebad-sebad kandan. Inabat dan heman se melayat saol i Jesus tinibok se inabel wedà palos tebili. 24 Yan se doun te minikagi dan, “Mèpiya aw eked tadon lisii se saol din. Meneng labi pa mèpiya aw megbonot kidon aw sinu se mekeabat kenyan.”

Pegbonot dan kenyan, yan netoman se pakang insolat diyà te kagi te Timanem,

25 Yan se ininang te menge sondalo.

Dalem niyan, doen menge bayi timindeg kidoen medapag te kros linensangan ki Jesus. Yan se inay din, aw kedowa te inay din, aw esawa i Clopas si Maria, aw si Maria tege Magdala. 26 Pegkità i Jesus te inay din aw sìyan sebad tinoledaan nedekelan din te pedowan, minikagi diyà te inay din, “Inà, sìyà den se batà nikaw.”

27 Penga niyan, minikagi heman si Jesus diyà te sìyan tinoledaan din, “Sìyà den se inay nikaw.”

Lekat te aldaw sìyan, impeogpà te tinoledaan sìyan se inay i Jesus kidoen te balay din.

28 Penga niyan, netegahan i Jesus te nepenga din den se kedita te insogò te Amay din kandin, aw minikagi, “Nelao a.”

Pineokit kenyan, netoman se pakang tepad kandin tapay insolat diyà te kagi te Timanem. 29 Doen sibolan sinolan te bino sinengedan te wayeg. Inagem dan se ispongha intangen diyà te panga te kayo hisopo, aw impesopsop dan iyan ki Jesus. 30 Penga te pegsopsop din, minikagi, “Nepenga den.”

Penga niyan, timikelong sikandin aw nematay.

31 Nayan, neinang iyan te meapon te aldaw te pegtegilan dan te Pista te Peglaklak. Ibeg te menge obanen te Judiyo, meabat lekat te kros se lawa te otaw nematay te eked pa sallep se aldaw, so se keeldawan niyan, yan se Sebado ontò melangkaw aldaw diyà te menge Judiyo. Yan se doun te nemoyò dan ki Pilato te pentigen te sondalo se benis te menge otaw inlansang diyà te kros amon ayas dan matay. 32 Yan insogò din se menge sondalo, aw pigpantig dan se benis te sebad otaw inlansang diyà te tangkil i Jesus, aw penga niyan diyà heman te sebad tangkil din. 33 Meneng pegdateng dan doton ki Jesus, kinità dan te nematay den sikandin, aw yan se doun te wedà dan pentigi se kandin benis. 34 Meneng doen sebad sondalo nenogseng te kilid din te dilek, aw yan dimelog se dipanog aw wayeg lekat te kilid din. 35 Kinità ko se kedita nini in-indan ko den kenyo, aw benal se kagi ko. Netegahan ko te benal iyan neinang, aw ibeg ko memenal kaw heman. 36 Peg-inang te menge sondalo kenyan, netoman se pakang tapay insolat diyà te kagi te Timanem,

38 Nayan, doen sebad otaw si Jose tege Arimatiya timaking ki Jesus, meneng mig-eles-eles te pegtaking din kandin so nelemitan sikandin te menge obanen te Judiyo. Dimoton si Jose ki Pilato aw mig-insà aw mepakay aw ebaten din se lawa i Jesus lekat te kros amon ilebeng din. Mepakay iyan diyà ki Pilato, aw yan dimoton aw inabat din se lawa. 39 Doen heman timaking kandin si Nicodemo. Sikandin se dimoton ki Jesus kedengan te delem. Inibing din heman se menge keliman kilo bebolong metinadeg iningedanan mira aw alos pigsanged. 40 Inibing dan se lawa i Jesus, aw ginakes dan iyan te sapot sipat te metinadeg, so yan se ketanem te menge Judiyo aw ilebeng se lawa te nematay. 41 Doen kekeyowan medapag te bontod linensangan ki Jesus. Doen lebeng kidoen kaling inewangan diyà te pangpang, aw wedad pa palos inlebeng. 42 Yan se linebengan dan te lawa din, so medapag, aw agpet den somallep se aldaw, aw keeldawan niyan se aldaw te peg-etod.