1 Nayan, te wedà pa libtak se aldaw te iselem te Linggo, ontò limapos si Maria tege Magdala dimoton te lebeng i Jesus. Kinità din se lebeng din neowang so tapay den nekelid se dakel bato insampeng. 2 Penga niyan, kimagnan sikandin aw dimoton ki Pedro aw sìyan sebad tinoledaan ontò nedekelan i Jesus te pedowan. Minikagi sikandin, “Neabat se lawa te Pengolo tadon lekat te lebeng. Wedà day ketegahi aw kenan iyan soli.”

3 Penga niyan, timindeg si Pedro aw sìyan sebad tinoledaan aw dimoton dan te lebeng. 4 Kimagnan se didowa dan, meneng sìyan sebad tinoledaan, labi pa megaen diyà ki Pedro, aw yan se onà dimateng doton te lebeng. 5 Simelib sikandin amon tomengteng doton didalem. Kinità din se sapot kidoen, meneng wedà sikandin awop. 6 Penga niyan, nekemodi si Pedro dimateng aw dimeleg doton didalem te lebeng. Kinità din se sapot kidoen. 7 Kinità din heman se kelobaw intenges diyà te olo. Wedà iyan pesipati diyà te sapot, meneng linepì aw tinani. 8 Penga niyan, minawop heman se tinoledaan nekeonà dimateng. Pegkità din te kedita niyan, nemenal sikandin te ontò benal neantay si Jesus lekat te nematay, 9 so lamig te aldaw sìyan, wedà pa kelebeti te menge tinoledaan se pakang tapay insolat diyà te kagi te Timanem, te keilangan meantay si Jesus lekat te nematay. 10 Penga niyan, minolì se didowa tinoledaan i Jesus doton te balay dan.

11 Nayan, mig-ogpà pa si Maria tege Magdala doton te lowà te lebeng aw migkelag. Dalem te pegkelag din, simelib amon tomengteng doton didalem. 12 Kinità din kidoen se didowa anghil nenaol te mepotì. Nenenoo dan kidoen te linebengan ki Jesus, sebad se lenged te olo, aw sebad se lenged te benis. 13 Mig-insà dan, “Atà, nengà lay migkelag ka?”

Timaba sikandin, “So neabat se lawa te Pengolo ko, aw wedà ko ketegahi aw kenan iyan soli.”

14 Penga te peg-ikagi din kenyan, miniling sikandin aw kimità ki Jesus timindeg kidoen te lowà te lebeng, meneng wedà kilala kandin. 15 Mig-insà si Jesus, “Atà, nengà lay migkelag ka? Sinu lay se inahà nikaw?”

Meneng mig-aneng-aneng si Maria te sikandin se otaw egtonggò te kekeyowan sìyan, aw yan se doun te minikagi sikandin, “Sir, aw sikona se nengabat te lawa din, indani a aw kenan iyan soli, so ibingen ko.”

16 Minikagi si Jesus, “Maria.”

Yan siminalo si Maria diyà kandin aw minikagi te kagi te Hebreo, “Raboni.” (Se kelebadan niyan, “Menenoladà.”)

17 Minikagi si Jesus, “Ikà eg-awid kanak, so wedà a pa pegpeengat doton te Amay ko. Meneng doton ka te menge kedowa ko, aw peg-indan ka kandan te molì a pa doton te Amay ko, doton te Timanem ko. Sikandin se Amay niyo heman aw Timanem niyo.”

18 Penga niyan, dimoton si Maria tege Magdala te menge tinoledaan i Jesus aw minikagi, “Kinità ko den gina se Pengolo.”

Penga niyan, in-indan din diyà kandan se kedita te inikagi i Jesus diyà kandin.

19 Pegkedelem te Linggo sìyan, netipon se menge tinoledaan i Jesus kidoen te sebad balay, aw tinakep dan se lelebangan niyan amon eked dan kitai, so nelemitan dan te menge obanen te Judiyo. Pengkey netakep se lelebangan, meneng pegketà dimateng si Jesus timindeg kidoen te tengà-tengà dan, aw minikagi, “Ibeg ko melinaw se pedowan niyo.”

20 Penga niyan, impekità din diyà kandan se menge palì diyà te belad din aw kilid din. Ontò neluba se menge tinoledaan din te pegkità dan te Pengolo. 21 Penga niyan, todà minikagi si Jesus, “Ibeg ko melinaw se pedowan niyo. Iling te pegsogò te Amay ko kanak, yan isogò ko den heman sikiyo.”

22 Penga te peg-ikagi din kenyan, mig-edop sikandin diyà kandan aw minikagi, “Domateng se Espiritu Santo kenyo. 23 Aw pegwedaden niyo se salà te doma otaw, pegwedaden iyan te Timanem. Meneng aw eked niyo pegwedadi se salà te doma otaw, eked iyan pegwedadi te Timanem.”

24 Nayan, si Tomas, se doma ngadan din si Pingin, sikandin se sebad diyà te sempolò teg dowa tinoledaan i Jesus. Pegpekità i Jesus diyà kandan, wedad kidoen si Tomas. 25 Yan minikagi se doma tinoledaan diyà ki Tomas, “Migpekità se Pengolo kenami.”

Meneng minikagi si Tomas, “Eked a pemenal te neantay sikandin lekat te nematay singed aw onà ko kitaen se palì te lansang diyà te belad din, aw isawol ko se intetodò ko diyà te awang niyan, aw ilamen ko heman se kilid din.”

26 Penga te sebad simana, todà netipon se menge tinoledaan i Jesus doton te balay, aw kidoen heman si Tomas doma dan. Netakep se lelebangan, meneng pegketà dimateng si Jesus timindeg diyà te tengà-tengà dan, aw minikagi, “Ibeg ko melinaw se pedowan niyo.”

27 Penga niyan, minikagi sikandin diyà ki Tomas, “Soli se intetodò no dini. Tengtengi se belad ko. Ilami heman se kilid ko. Ikà egdowa-dowa, meneng pemenal ka kanak.”

28 Meneng olò minikagi si Tomas, “Sikona se Pengolo ko. Sikona se Timanem ko.”

29 Minikagi si Jesus, “Nemenal ka den so kimità ka den kanak. Meneng labi pa meluba se menge otaw memenal pengkey wedà dan kità kanak.”

30 Medita pa se kepelahan ininang i Jesus kinità te menge tinoledaan din, meneng wedà ko solati se kedita niyan diyà te libro seini. 31 Meneng insolat ko ini amon memenal kaw den te si Jesus se Misiyas megpelowà kenitadon aw sikandin se Batà te Timanem. Aw memenal kaw kandin, begayan kaw te kaling pedowan wedad temanan.