1 Nayan, wedà kenamay, dimoton se menge tinoledaan i Jesus kandin, aw mig-insà dan, “Sinu lay se ontò melangkaw doton te peglowan te Timanem?”

2 Tinawal i Jesus se sebad batà, aw impetindeg din iyan kidoen te tengà-tengà dan. 3 Penga niyan, minikagi si Jesus, “Eneng-enengi niyo se kagi ko seini. Eked kaw palos sekopi te Timanem diyà te peglowan din singed todaen niyo se aneng-aneng niyo, aw megpedanà kaw iling te kedanà te mengisù. 4 Meneng se otaw ontò melangkaw doton te peglowan te Timanem, yan se otaw megpedanà te kandin pegkeotawun iling te kedanà te batà seini. 5 Aw megsagman se otaw te sakop ko iling te batà seini tandà te pegpesakop din kanak, pineokit kenyan segmanen a din heman.”

6 “Meneng aw doen otaw mekebaet te pegpemenal te mengisù egkeidowan ko, ontò medaet se pelumun domateng diyà kandin. Labi pa mèpiya aw iketan se lieg din te dakel bato aw idagdag doton te lawod. 7 Mekelelayò se kedita te otaw, so doen egpekebaet te kandan pegpemenal. Doen gayed mekebaet te pegpemenal te kedita te otaw, meneng mekelelayò se otaw eg-inang kenyan, so ontò sikandin ipelumun.

8 “Aw meboyo kaw meg-inang te salà pineokit te belad aw benis niyo, mèpiya aw tokongen niyo iyan aw iagbel niyo amon eked kaw peg-inang te salà, aw amon kominawà kaw te kaling pedowan wedad temanan. Labi pa medaet aw meboyo kaw pineokit te belad aw benis niyo, aw iagbel se kedakel te lawa niyo kidoen te apoy doton te kilot eked palos kepadeng. 9 Aw meboyo kaw heman meg-inang te salà pineokit te mata niyo, mèpiya aw logiten niyo se mata niyo aw iagbel niyo amon eked kaw peg-inang te salà, aw amon kominawà kaw te kaling pedowan wedad temanan. Labi pa medaet aw meboyo kaw pineokit te mata niyo, aw iagbel se kedakel te lawa niyo kidoen te apoy doton te kilot.”

10 “Keilangan eked kaw peglindò te sakop ko medanà iling te kedanà te mengisù seini, so mikagi a den diyà kenyo te egtonggoan dan te menge anghil gayed egdoma te Amay ko doton te langit. [ 11 Dimini a Timanem Migpekeotaw amon ipelowà ko se menge otaw nelegeb te salà.]

12 “Eneng-enengi niyo ini. Aw doen otaw doen sebad gatos ayam-ayam din karniro, aw metalon se sebad, tenanan din se kesyaman teg siyam doton te bontod, aw pemehaen din se sebad. 13 Mikagi a den diyà kenyo, aw kitaen din se sebad netalon, doen keluba din labi pa dakel diyà te keluba din tepad te kesyaman teg siyam wedà ketalon. 14 Iling heman kenyan se keluba te Amay ko doton te langit, so eked sikandin keibeg aw doen sakop din medanà mekesoway lekat kandin, pengkey sebad.”

15 “Na, aw doen otaw egpemenal meg-inang te salà diyà kenyo, doton kaw kandin te wedad doma otaw kidoen, aw ikagi kaw diyà kandin tepad te salà ininang din. Aw megselsel sikandin, yan tinebangan niyo den sikandin. 16 Meneng aw eked sikandin penenalan te kagi niyo, petekingi niyo se doma otaw pengkey sebad aw dowa, aw lomikò kaw doton kandin, amon doen dowa otaw aw kenà telo meg-indan te benal se kagi niyo kandin. 17 Aw eked sikandin penenalan kandan, indani niyo iyan diyà te kedita te otaw egsimba kidoen. Aw eked sikandin tolò te menge obanen te simbahan, ikà niyo egdoma kandin, so iling den sikandin te menge otaw kenà egpenimanem aw nelegeb te salà.”

18 “Eneng-enengi niyo se kagi ko kenyo seini. Aw megpunù kaw te doen eked kepakay inangen dini lanto te tanà, eked heman iyan kepakay inangen doton te langit. Aw megpunù kaw te doen mepakay inangen dini lanto te tanà, mepakay heman iyan inangen doton te langit.

19 “Mikagi a den heman diyà kenyo, aw doen dowa kenyo dini lanto te tanà, aw megsebad kaw te kenyo pemoyoen diyà te Amay ko doton te langit, metoman iyan meinang so ibegay din iyan diyà kenyo. 20 Pengkey olò dowa aw telo se otaw metipon amon megsimba kanak, kidoen a heman doma dan.”

21 Penga niyan, dimoton si Pedro ki Jesus aw minikagi, “Pengolo, aw melikit gayed eg-inang se doma otaw te salà diyà kanak, mekepila lay se pegwedad ko te salà din? Botong lay aw mekepito?”

22 Minikagi si Jesus, “Kenà olò mekepito, meneng keilangan gayed no pegwedaden se peg-inang din te salà, pengkey doblihen se kepitowan te mekepito. 23 Iling kani se peglowan te Timanem. Doen selotan mig-aneng-aneng te mèpiya aw somokot sikandin te salà te menge sakop din. 24 Pegtebò din, doen otaw impeangay din ontò dakel se salà din, so minelalan se kwarta binelesan din. 25 So eked sikandin pekeimpas, minikagi se selotan te keilangan inangen din allang se otaw sìyan sipat esawa din aw menge batà din. Keilangan ibeligyà dan heman te selotan sipat kedakel te kededònan dan amon meimpas se salà dan. 26 Meneng limongken se otaw sìyan aw migpeido-ido, kagi din, ‘Sir, pegtagad ka bag te eked kenamay, so impasen ko se kedakel te salà ko kamno.’ 27 Penga niyan, pigwedad te selotan se salà te otaw sìyan tandà te keido din kandin, aw impelowà din sikandin. 28 Meneng pegkesayo te otaw sìyan, kinità din se doma otaw doton te dalan doen ontò deitek salà diyà kandin. Pegketà, pineleng din se lieg te otaw sìyan aw minikagi, ‘Impasi den se salà no kanak.’ 29 Penga niyan, limongken se otaw aw migpeido-ido, kagi din, ‘Pegtagad ka bag te eked kenamay, so impasen ko se kedakel te salà ko kamno.’ 30 Meneng wedad keido din, aw impekeleboso din se doma otaw lamig meimpas se salà. 31 Nayan, pegketaga-taga te menge kedomaan din kenyan, ontò nelidò se pedowan dan. Penga niyan, dimoton dan te selotan aw mig-indan dan te kedita te neinang din. 32 Penga niyan, impeangay te selotan se otaw sìyan aw minikagi, ‘Medaet ka otaw. Pegpeido-ido no diyà kanak, pigwedad ko se kedakel te salà nikaw. 33 So neidowan ta, keilangan keidowan no heman se doma otaw.’ 34 Ontò sikandin neopalan te selotan, aw impekeleboso din sikandin amon ipelumun lamig meimpas se kedakel te salà.”

35 Minikagi si Jesus, “Aw eked kaw ontò pegwedad te salà te doma otaw, iling heman kenyan se inangen te Amay ko diyà kenyo. Eked kaw din keidowi.”