19
Tepad te pegpengognan aw pegsibwan
Mat. 19:1-12; Mar. 10:1-12
1 Nayan, penga te pegtoladà i Jesus te kedita niyan, nesayo sikandin lekat te probinsya te Galiliya aw minokit doton dipag te wayeg te Jordan taman te probinsya te Judiya. 2 Medita se otaw timaking kandin, aw pinegolian din se kedita dan doen mesakit.
3 Doen menge Parisiyo nengemahà te kemalì diyà te pegtoladà i Jesus amon doen idimanda dan tepad kandin. Dimoton dan kandin aw mig-insà dan, “Mepakay lay aw somibwan se otaw te esawa din pengkey wedad medaet ininang din?”
4 Timaba si Jesus, “Wedà niyo besi besahi se kagi te Timanem insolat. Peg-inang din te otaw gebii, sebad olò se meama ininang din aw sebad olò heman se bayi. 5 Minikagi heman se Timanem,
‘Yan se doun te tomanan se meama te amay aw inay din, aw megsebad diyà te esawa din. Se didowa dan meinang sebad.’
6 Yan kenà dowa se teleesawa, so neinang dan sebad. Nayan, so ininang dan te Timanem sebad, eked kepakay aw ipesoway dan te otaw.”
7 Minikagi dan, “Aw eked iyan kepakay, nengà lay migpunù si Moises gebii te keilangan doen papil ibegay te meama diyà te bayi tepad te pegsibwan din, aw penga niyan mepakay din ipekesayo?”
8 Minikagi si Jesus, “Migpunù si Moises te mepakay aw somibwan kaw te esawa niyo, so netegahan din te ontò magsen se olo niyo. Meneng gebii te peg-inang te Timanem te otaw, eked kepakay se pegsibwan. 9 Mikagi a den diyà kenyo, aw somibwan se meama te esawa din wedà peglakad, aw todà mengognan, mekelakad sikandin.”
10 Minikagi se menge tinoledaan din, “Aw iling kenyan se kelimahan domateng diyà te teleesawa, labi pa mèpiya aw eked pengognan se otaw.”
11 Meneng minikagi si Jesus, “Kenà kedita te otaw se eked palos pengognan, meneng olò se menge otaw pinemallì te Timanem te eked pengognan. 12 Medita se kemolò te otaw eked palos pengognan. Doen otaw eked pegbatà so kolang lekat te pegtebaw dan. Doen heman eked pengognan so tinelinan dan. Doen heman eked pengognan amon wedad mekeanggà te pegtoladà dan tepad te peglowan te Timanem. Aw pinemallì kaw te Timanem amon eked kaw palos pengognan, keilangan tomolò kaw kandin.”
Si Jesus aw menge mengisù
Mat. 19:13-15; Mar. 10:13-16; Luc. 18:15-17
13 Nayan, doen menge otaw nengibing te dedeitek mengisù doton ki Jesus amon pemàdan din dan aw megtawal-tawal te begayan dan te Timanem te mèpiya. Sinagda dan te menge tinoledaan din. 14 Meneng minikagi si Jesus, “Ikà niyo egsagda kandan, so lomowan se Timanem diyà te otaw ontò somalig diyà kandin iling te pegsalig te mengisù diyà te amay aw inay dan.”
15 Nemaed si Jesus kandan aw migtawal-tawal. Penga niyan, nesayo sikandin lekat kidoen.
Kelimahan te otaw meyaman
Mat. 19:16-30; Mar. 10:17-31; Luc. 18:18-30
16 Nayan, doen sebad otaw dimoton ki Jesus aw mig-insà, kagi din, “Sir, eden lay se mèpiya keilangan inangen ko amon doen kaling pedowan ko wedad temanan?”
17 Minikagi si Jesus, “Nepela a so mig-insà ka diyà kanak aw eden se mèpiya inangen nikaw. Sebad olò se ontò mèpiya, olò Timanem. Aw meibeg ka kominawà te kaling pedowan wedad temanan, keilangan tomolò ka te menge punù din ingkeliwat i Moises.”
18 Mig-insà se otaw sìyan, “Eden lay punui se keilangan toloen ko?”
Minikagi si Jesus, “Ikà egbonò. Ikà eglakad. Ikà egpenakaw. Ikà egkebolalaw tepad te doma otaw. 19 Keilangan memasa ka te amay aw inay nikaw. Kedekeli heman te pedowan no se doma otaw iling te peg-aneng-aneng no te kamno pegkeotawun.”
20 Minikagi se otaw, “Gayed ko egtoloen se kedita niyan. Eden lay se wedà ko pa inangi?”
21 Minikagi si Jesus, “Aw meibeg ka te ontò melobos se pedowan no diyà te Timanem, olì ka den aw beligyai se kedakel te kedònan no, aw begayi se kwarta no diyà te menge otaw nelimahan. Aw yan se inangen no, doen ontong kinewaen no doton te langit. Penga te pegpemegay no te kedakel niyan, likò ka dini aw taking ka kanak.”
22 Pegdineg din kenyan, nelidò se pedowan din aw nesayo sikandin, so ontò dakel se kedònan din.
23 Minikagi si Jesus diyà te menge tinoledaan din, “Eneng-enengi niyo se kagi ko kenyo. Ontò melima se pegpesakop te otaw meyaman diyà te peglowan te Timanem. 24 Mikagi a den heman diyà kenyo te pengkey ontò melima se peg-okit te ayam-ayam kamilo diyà te awang te dagem, meneng labi pa melima se pegpesakop te otaw meyaman diyà te peglowan te Timanem.”
25 Pegdineg dan kenyan, ontò dan nepela, aw minikagi dan, “Aw iling kenyan, wedad palos otaw mekelowà lekat te pelumun te Timanem.”
26 Meneng timengteng si Jesus diyà kandan aw minikagi, “Pengkey eked pekelowà se otaw lekat te pelumun te Timanem, meneng wedad palos eked kebatog te Timanem.”
27 Penga niyan, minikagi si Pedro, “Meneng sikami, tinenanan day den se kedakel amon tomaking kay kamno. Eden lay se ontong kinewaen day?”
28 Minikagi si Jesus, “Eneng-enengi niyo se kagi ko kenyo seini. Aw inangen te Timanem kaling se keneyonan, menenoo a Timanem Migpekeotaw doton te melangkaw onsedanan te peglowan. Sikiyo menge tinoledaan ko, menenoo kaw heman doton te sempolò teg dowa onsedanan te peglowan, so lomowan kaw diyà te sempolò teg dowa pongan te menge bowad-bowad i Israel. 29 Aw timanan se otaw te kedònan din, aw kedowa din, aw amay din, aw inay din, aw batà din, aw pawà din, amon megpesakop diyà kanak, kominawà sikandin te ontong ginatos pa meelagà diyà te tinenanan din, aw begayan heman sikandin te kaling pedowan wedad temanan. 30 Meneng medita se otaw melangkaw songkani meinang ontò medanà doton te peglowan te Timanem. Medita heman se otaw medanà songkani, meneng meinang dan kwani melangkaw.”