1 Nayan, dimeleg dan doton dipag te lanaw medapag te Gerasa. 2 Pegtenà i Jesus, doen otaw dinetengan te bosaw simongon kandin lekat te menge lebenganan, 3 so yan se eg-ogpaan din. Ontò sikandin magsen, aw yan se doun te eked sikandin kegapos te doma otaw, pengkey doen sengkalì. 4 Pengkey melikit dan sikandin eggeposen te sengkalì, aw egpentongan dan sikandin, meneng gayed din egbogtoen se sengkalì, aw egbàtan din se ipegpantong kandin. Wedad palos otaw mekedaeg kandin so ontò magsen. 5 Pengkey aldaw aw delem, gayed sikandin eglegeb kidoen te lebenganan aw doton heman te bontod, aw gayed egpuypuy aw egpemoneg te lawa din te bato.

6 Pegkità din ki Jesus doton te mediyò, kimagnan sikandin simongon ki Jesus aw limongken diyà kandin. 7-8 Migpunù si Jesus diyà te bosaw, kagi din, “Lowà ka den diyà kandin.”

Minikagi se otaw te dakel kagi din, “Jesus, Batà te Timanem ontò melangkaw, ikà egsamok kanak. So Timanem se egtengteng kenita, memoyò a diyà kamno, ikà bag egpeeleg kanak.”

9 Mig-insà si Jesus, “Sinu lay se ngadan nikaw?”

Timaba sikandin, “Si Minelalan se ngadan ko, so medita kay.”

10 Ontò nemoyò se bosaw diyà ki Jesus te eked din dan peseyowi doton te mediyò ogpeanan.

11 Ontò medita se osa nenowal doton te bontod medapag. 12 Nemoyò se menge bosaw diyà ki Jesus, kagi dan, “Aw mepakay diyà kamno, malin kay doton te menge osa sìyan.”

13 Yan impealin din dan. Limowà se menge bosaw lekat te otaw aw minalin dan doton te osa. Penga niyan, kimagnan se kedita te osa pesalo te keba, aw kimahang dan doton te lanaw. Nelemes se kedita dan menge dowa melalan.

14 Penga niyan, kimadas se menge telediyaga te osa aw mig-indan dan tepad kenyan doton te lonsod aw kedepagan niyan. Penga niyan, dimoton se menge otaw inindanan dan amon komità dan kenyan. 15 Pegdateng dan doton ki Jesus, kinità dan se otaw pinelowaan te minelalan se bosaw. Nenenoo sikandin, aw nenelowal den, aw migkèpiya den. Pegkità dan kenyan, nelemitan dan. 16 Inindanan dan heman te menge otaw kimità kenyan tepad te neinang diyà te otaw sìyan aw menge osa. 17 Lekat niyan, nemoyò dan te mesayo si Jesus lekat te ogpeanan dan.

18 Penga niyan, te pegsakay i Jesus te belangay, nemoyò se otaw pinelowaan te bosaw aw mepakay sikandin tomaking. 19 Meneng wedà din petekingi, so inikegiyan i Jesus, “Olì ka den doton te menge kedomaan nikaw, aw peg-indan ka kandan tepad te mèpiya ininang te Pengolo kamno, aw keido din kamno.”

20 Penga niyan, nesayo sikandin aw mig-indan doton te Dikapolis tepad te mèpiya ininang i Jesus diyà kandin. Yan se doun te nepela se kedita te otaw inindanan din.

21 Pegbatas i Jesus doton dipag te lanaw, ontò medita se otaw netipon diyà kandin doton te kilid te lanaw. 22 Penga niyan, dimoton ki Jesus se sebad obanen te simbahan te Judiyo, ngadan din si Jairo. Pegkità din ki Jesus, limongken sikandin 23 aw nemoyò, kagi din, “Ontò netigdaan se deitek batà ko bayi. Peg-ayas ka bag, aw pemàdi sikandin amon kegolian aw eked kematay.”

24 Penga niyan, timaking si Jesus kandin. Ontò medita se doma otaw timaking ki Jesus aw migpesegsegay dan kidoen te dalan.

25 Nayan, doen heman sebad bayi timaking kandin pigdipenogan te sempolò den teg dowa se omay. 26 Medita se doktor migbolong kandin, aw neamin se kedakel te kwarta din. Ontò sikandin ineleg, so pengkey eden se imbolong dan kandin, meneng labi den beling medaet se mesakit din. 27 Pegdineg din tepad te eg-inangen i Jesus, dimoton sikandin aw migpedapag diyà te getan din aw nemaed te saol din, 28 so tapay sikandin mig-aneng-aneng te megolì se mesakit din aw pemàdan din olò se saol i Jesus. 29 Pegketà, negolì se mesakit din, aw mig-imanman sikandin te mèpiya den se lawa din.

30 Pegketaga-taga i Jesus te doen neinang pineokit te tolos din, miniling sikandin aw timengteng diyà te menge otaw timaking kandin, aw minikagi, “Sinu lay se nemaed te saol ko?”

31 Minikagi se menge tinoledaan din, “Ikà eg-insà aw sinu se nemaed kamno, so pigdenganan ka te medita otaw.”

32 Meneng gayed timengteng si Jesus diyà te kedita dan amon kitaen din aw sinu se nemaed kandin. 33 Nelemitan se bayi sìyan, so netegahan din te negolì den se mesakit din. Yan migpedapag sikandin diyà ki Jesus aw tinegangtang tandà te lamit din. Limongken sikandin diyà ki Jesus aw mig-indan kandin te kedita tepad te mesakit din aw pegkegolì niyan. 34 Penga niyan, minikagi si Jesus, “Atà, simalig ka diyà kanak, aw yan se doun te negolian ka. Olì ka den. Mèpiya den se pedowan aw lawa nikaw.”

35 Telobo pa minikagi si Jesus diyà te bayi, dimateng se otaw lekat te balay te obanen te simbahan, aw minikagi diyà ki Jairo, “Nematay den se batà nikaw. Wedad den kekemowan te pegpedeleg no te Menenoladà doton te balay nikaw.”

36 Meneng wedà segmani i Jesus se inikagi dan. Minikagi sikandin diyà ki Jairo, “Ikà egkepuluk, meneng salig ka diyà kanak.”

37 Wedad doma otaw impetaking i Jesus doton te balay, meneng olò si Pedro, aw si Santiago, aw adi i Santiago si Juan. 38 Pegdateng dan doton te balay i Jairo, kinità i Jesus se menge otaw migbelisì, aw migkelag, aw migmatay tandà te lano dan. 39 Peg-awop din diyà te balay, minikagi sikandin, “Ikà niyo egbelisì. Ikà niyo egkelag. Wedà kematay se batà. Olò sikandin timedogi.”

40 Meneng nebebeyatan dan si Jesus. Penga niyan, impelowà din se kedita dan, aw dimoton sikandin te tambì inibatan te batà. Impetaking din olò se tinoledaan din aw amay aw inay te batà. 41 Pinemàdan din se belad te batà, aw minikagi te kagi te Hebreo, “Talita kumi.” (Se kelebadan niyan, “Atà, enaw ka.”)

42 Pegketà, minenaw sikandin aw migpanaw-panaw, so sempolò den teg dowa se omay din. Ontò nepela se amay aw inay din. 43 Meneng ontò migpunù si Jesus te wedad palos otaw mepakay indanan dan tepad te peg-antay din te batà sìyan. Minikagi heman si Jesus te mèpiya aw pemekànen dan se batà.