1 Nayan, nesayo si Jesus aw minolì doton te kandin lonsod. Timaking heman se menge tinoledaan din. 2 Pegkesebado, migtoladà sikandin doton te simbahan te Judiyo. Nepela se medita otaw dimineg kandin, aw minikagi dan, “Ontò kidon nepela so dakel den se nebatog din. Ontò sikandin biyasa, aw mèpiya heman se kepelahan eg-inangen din. 3 Meneng netegahan tadon te olò sikandin karpintiro, aw si Maria se inay din. Netegahan tadon heman se menge kedowa din si Santiago, si Jose, si Judas, aw si Simon. Eg-ogpà heman se menge etebay din dini kenitadon.”

Yan nebensi dan ki Jesus. 4 Penga niyan, minikagi sikandin, “Gayed egsegmanen te doma otaw se telekeliwat te kagi te Timanem, meneng kenà sikandin egsegmanen te menge otaw te kandin lonsod aw menge kedowa din.”

5-6 Nepela si Jesus so wedà dan pemenal kandin, aw yan se doun te pilabok se kepelahan ininang din kidoen. Pilabok olò se otaw pinemàdan din aw negolian.

Nayan, miglegeb si Jesus doton te kedita te lonsod, aw migtoladà kidoen. 7 Doen sebad aldaw migtipon sikandin te sempolò teg dowa tinoledaan din. Imbegay din diyà kandan se tolos amon megpelowà dan te bosaw lekat te otaw, aw insogò din dan teg dowa-dowa doton te menge doma ogpeanan. 8 Te wedà dan pa kesayo, doen impunù din kandan te olò bangkà se mepakay dan ibingen. Eked dan pengibing te kànen, aw kelepì, aw kwarta, so togpoan dan te otaw toledaan dan. 9 Mepakay aw menepatos dan, meneng eked dan pengibing te ekasan. 10 Migpunù sikandin, kagi din, “Aw domateng kaw doton te lonsod, ketingen kaw diyà te sebad balay. Ikà niyo eg-alin-alin lamig domeleg kaw doton te doma lonsod. 11 Aw doen otaw eked pegsagman kenyo, aw eked dan penenalan te itoladà niyo, tektaki niyo se napò te tanà lekat te sepatos niyo te pegkesayo niyo lekat te lonsod dan. Yan metaga-taga se otaw kidoen te doen salà ininang dan, so wedà dan penenalan kenyo.”

12 Penga niyan, nesayo dan. Pengkey kenan dan pesalo, migtoladà dan te keilangan megselsel se kedita te otaw te salà ininang dan. 13 Medita se bosaw impelowà dan lekat te otaw, aw medita heman se otaw doen mesakit pinetedakan dan te lana aw negolian dan.

14 Nayan, dimineg se selotan si Herod tepad te ininang i Jesus aw menge tinoledaan din, so ontò nedengeg si Jesus. Doen menge otaw eg-ikagi, “Sikandin besi si Juan Memonyagay neantay den lekat te nematay, aw yan se doun te eg-inangen din se kepelahan metolos.”

15 Meneng doen heman menge doma otaw eg-ikagi, “Sikandin se telekeliwat te kagi te Timanem gebii si Elias.”

Doen heman menge doma otaw eg-ikagi, “Ontò sikandin telekeliwat te kagi te Timanem, iling te menge telekeliwat te kagi te Timanem gebii.”

16 Meneng pegdineg i Herod tepad te ininang i Jesus, minikagi sikandin, “Sikandin besi si Juan Memonyagay, sìyan impesipal ko se lieg din, meneng neantay besi lekat te nematay.”

17 Yan se inikagi i Herod, so kedengan impedakep din si Juan, aw impegapos din, aw impekeleboso din. Yan se ininang din ki Juan amon meluba se nayi din si Herodias inagaw din diyà te kedowa din si Felipe. 18 Peg-agaw i Herod te nayi din, simila si Juan kandin, kagi din, “Mig-inang ka te salà, so nengagaw ka te nayi nikaw.”

19 Yan se doun te neopal si Herodias diyà ki Juan, aw ibeg din ipeimatay din si Juan. Meneng wedà pekedeleg, 20 so egsagman si Herod ki Juan, so netegahan din te gayed eg-inang si Juan te metòlid, aw wedad salà ininang din. Yan se doun te eked kepakay diyà kandin aw imetayan si Juan. Egkeibeg si Herod domineg te ipegtoladà i Juan, meneng pegdineg din kenyan, ontò migkebulung se aneng-aneng din.

21 Nayan, mig-inang si Herod te pista tepad te aldaw te pegtebaw din, aw impetanod din se kedita te opisyal, aw kapitan te sondalo, aw otaw meyaman. Yan se aldaw intelegsà i Herodias amon ipeimatay din si Juan. 22 Pegsayaw te laga batà i Herodias, ontò neluba si Herod aw menge otaw timanod. Penga niyan, minikagi si Herod, “Pemoyoi den se ibeg no diyà kanak pengkey eden, so ibegay ko iyan diyà kamno.”

23 Migsapà si Herod diyà kandin, kagi din, “Pengkey eden se pemoyoen nikaw, yan se ibegay ko kamno, pengkey taman te ketengà te tanà eglowanan ko.”

24 Penga niyan, nesayo se laga aw mig-insà diyà te inay din, kagi din, “Eden lay se mèpiya pemoyoen ko?”

Minikagi se inay din si Herodias, “Pemoyoi te ipesipal din se lieg i Juan Memonyagay.”

25 Penga niyan, ayas limikò se laga doton ki Herod, aw nemoyò, kagi din, “Ibeg ko, ipesipal no se lieg i Juan Memonyagay, aw ipesawol no se olo din diyà te dakel sablag, aw ipeibing no dini kanak te eked kenamay.”

26 Ontò nelidò se pedowan i Herod. Meneng so migsapà sikandin, aw eked keibeg silahen te menge otaw timanod, eked sikandin tomalis te pakang din diyà te laga. 27 Yan se doun te wedà sikandin peg-alà-alà, aw insogò din se sondalo mangay te olo i Juan. Penga niyan, dimoton se sondalo te keleboso aw sinipal din se lieg i Juan. 28 Insawol din se olo din diyà te sablag, aw imbegay din diyà te laga, aw inibing te laga doton te inay din. 29 Pegdineg te menge tinoledaan i Juan te inimetayan sikandin, dimoton dan te keleboso, aw inabat dan se lawa din aw inlebeng dan iyan.

30 Nayan, peg-olì te menge sogounun i Cristo doton kandin, mig-indan dan diyà kandin tepad te kedita te ininang dan aw intoladà dan. 31 Penga niyan, minikagi si Jesus, “Tenani niyo se doma otaw, aw taking kaw kanak doton te kesikmihan amon meg-etod kaw te eked kenamay.”

Yan se inikagi din, so medita se otaw gayed egdoton kandin, aw kenà egpekekaen si Jesus aw menge tinoledaan din. 32 Penga niyan, nesayo dan lekat kidoen. Simakay dan te belangay aw dimoton dan te kesikmihan te wedad doma dan.

33 Nayan, medita se otaw kimità te pegkesayo dan, aw netegahan dan te sikandan si Jesus aw menge tinoledaan din. Yan nesayo dan lekat te medita ogpeanan dan, aw kimagnan dan diyà te kilid te lanaw, aw nekeonà dan dimateng doton te peselowan te belangay sinekayan i Jesus. 34 Pegtenà i Jesus, kinità din se ontò medita otaw migtagad kandin. Ontò din dan neidowan, so iling dan te menge ayam-ayam karniro megketading te eked kenamay aw wedad megdiyaga kandan. Penga niyan, migtoladà si Jesus kandan te medita kebenalan. 35 Pegkeapon niyan, dimoton se tinoledaan din kandin, aw minikagi dan, “Ontò ini kebigtilan, aw agpet den delem. 36 Pekeseyowi se kedita te otaw doton te menge lonsod aw kedepagan amon mayad dan te kànen.”

37 Meneng minikagi si Jesus, “Pemekàni niyo dan.”

Minikagi dan diyà kandin, “Eked day kebatog. Simpana mayad kay te pan botong te ipekaen day kandan, keilangan dakel se kwarta ibayad day kenyan, menge dowa gatos kwarta dinaryo.”

38 Minikagi si Jesus, “Tengtengi niyo aw pila se pan inibing niyo.”

Pegkità dan, limikò dan doton ki Jesus aw minikagi dan, “Lima olò se pan, aw didowa se ikan.”

39 Penga niyan, impeebong-ebong i Jesus se kedita te otaw aw impeonsad din dan kidoen te sagbet. 40 Peg-onsad dan, doen menge inebongan teg sebad gatos otaw, aw doen heman menge inebongan teg keliman otaw. 41 Penga niyan, inabat i Jesus se lima pan aw didowa ikan. Limengag sikandin doton te langit aw migpesiontong diyà te Timanem kenyan. Penga niyan, binelà-belà din se pan aw imbegay din diyà te menge tinoledaan din amon iteped dan diyà te menge otaw netipon. Impeteped din heman se didowa ikan diyà te kedita te otaw. 42 Kimaen se kedita dan aw nebesog dan. 43 Penga niyan, inimon dan se samà te pan aw ikan kinaen dan, aw sempolò teg dowa se buun nepenò. 44 Menge lima melalan se meama kimaen te pan, aw doen heman menge bayi aw mengisù.

45 Penga niyan, impeonà i Jesus se menge tinoledaan din simakay te belangay pesalo doton dipag te lanaw, doton te Bitsayda. Dalem niyan, impeolì din se kedita te otaw netipon. 46 Pegkesayo dan, timikedeg si Jesus doton te bontod amon megtawal-tawal. 47 Pegsallep te aldaw, mediyò den se belangay doton te lawod te lanaw. Meneng si Jesus kidoen pa te bontod olò din sebad. 48 Kinità din te ontò melima se pegbugsay dan, so simongsong dan te kelamag. Ontò mata-mata te iselem, dimoton si Jesus kandan aw minipanaw sikandin diyà te lanto te lanaw. Ibeg din mekesaeb kandan. 49 Meneng pegkità dan kandin, eden dan aw along sikandin, so minipanaw sikandin diyà te lanto te lanaw. Migpuypuy dan, 50 so kimità se kedita dan kandin, aw ontò dan nelemitan. Meneng pegketà timawal si Jesus, kagi din, “Peseligi niyo se pedowan niyo, so siaken ini. Ikà niyo egkelemitan.”

51 Penga niyan, eleg simakay si Jesus te belangay, aw timunung se kelamag. Ontò dan nepela, 52 so pengkey kinità dan se kepelahan ininang i Jesus diyà te pan aw ikan, meneng wedà dan pa ketegahi te doen tolos din, so magsen se olo dan.

53 Nayan, penga te pegbatas dan te lanaw, dimateng dan doton te Genesarit, aw migpondo dan kidoen. 54 Pegtenà dan, kimilala se menge otaw ki Jesus, 55 aw ayas dan inangay se kedita te otaw doen mesakit lekat te kedepagan niyan. Tiningga dan se otaw aw dimoton dan te pengkey kenan ekon si Jesus. 56 Pengkey doton te lonsod aw mediyò te lonsod, pengkey kenan pesalo si Jesus, inibing dan se otaw doen mesakit doton te pedyanan, aw nemoyò dan diyà ki Jesus aw mepakay dan olò memaed te toktok te saol din, aw negolian se kedita dan nemaed kenyan.