1 Iyan heini lalag te Nengazen he ebpekesuǥat diyà te ki Baasha he impekaǥi zin ki Jehu he anak ni Hanani: 2 “Migkuwa ku sikew puun te mevavà he kebpekesavuk, ne midhimu ku sikew he pengulu temenge etew ku he Israilihanen. Piru mid-iringan nu is ulaula ni Jeroboam ne iyan ka nehimu he hinungdan te kebpekesalà te menge etew ku, ne midhimu nu he mepauk a tenged te menge salè dan. 3 Umbe, edèdeetan ku sikew wey is pemilya nu, iring te mibeelan ku ziyà te pemilya ni Jeroboam he anak ni Nebat. 4 Is sakup te pemilya nu he ebpemematey ziyà te inged egkeenen te menge asu, ne is diyà ebpemematey te vevesukà egkeenen te menge tagbis.”

5 Is duma pa he ǥuǥud mehitenged te kedhadì ni Baasha, wey is nevantug he menge vaal zin, wey zuma pa he mibeelan din, ne ingkesurat diyà te Libru he Midsuratan te menge Keguǥuza te menge Hadì te Israel. 6 Ne hein minatey en si Baasha, inleveng sikandin diyà te Tirza. Ne iyan is anak din he si Elah nekeilis kandin te kedhadì.

7 Haazà is lalag te Nengazen he nekesuǥat diyà te ki Baasha wey te pemilya zin, migkaǥi te Nengazen pinaaǥi te ebpeneuven din he si Jehu he anak ni Hanani. Migkaǥi haazà te Nengazen tenged te langun he mezaat he menge vaal ni Baasha ziyà te etuvangan te Nengazen. Midhimu zin he mepauk is Nengazen tenged te menge vaal zin he iring te mibeelan te pemilya ni Jeroboam, wey tenged te kebpenhimetayi zin te tivuuk he pemilya ni Jeroboam.

8 Nehimu he hadì te Israel si Ela he anak ni Baasha hein ike-26 he tuig te kedhadì ni Asa ziyà te Juda. Diyà te Tirza med-ubpà si Ela, ne midhadì sikandin seled te zezuwa he tuig.

9 Dutun he timpu, si Zimri he sevaha te menge upisyal zin wey peremandar te ketengà te menge perekerwahi, duen din pelanu he mezaat diyà te ki Ela. Ne sevaha he andew, nelangut si Ela ziyà te Tirza, ziyà sikandin te valey ni Arza he iyan edumala te turuǥan diyà te Tirza. 10 Midseled dutun te valey si Zimri ne midhimetayan din si Ela. Neulaula heini hein ike-27 he tuig te kedhadì ni Asa ziyà te Juda. Ne iyan si Zimri nekeilis ki Elah te kedhadì.

11 Kebpuun kedhadì ni Zimri, mibpenhimetayan din is tivuuk he pemilya ni Baasha. Ne wazè din midsamà he maama minsan diyà te menge kezuzumahi wey menge emiǥu ni Baasha. 12 Mibpenhimetayan ni Zimri is tivuuk he pemilya ni Baasha he sungkad te migkaǥi te Nengazen pinaaǥi te ebpeneuven din he si Jehu. 13 Nehitavù heini su nepauk is Nengazen he Megbevayà te Israel ki Baasha wey te anak din he si Ela tenged te menge salà he mibeelan dan, he nehimu he hinungdan te kebpekesalà te menge tig-Israel, pinaaǥi te ked-azap dan te zuma he menge ed-ezapen.

14 Is duma pa he ǥuǥud mehitenged te kedhadì ni Ela, wey is langun he mibeelan din, ne ingkesurat diyà te Libru he Midsuratan te menge Keguǥuza te menge Hadì te Israel.

15 Nehimu he hadì diyà te Israel si Zimri hein ike-27 he tuig te kedhadì ni Asa ziyà te Juda. Diyà sikandin med-ubpà te Tirza, piru pitu zà he andew is kedhadì din. Su hein migkampu is menge sundaru te Israel ziyà te uvey te Gibeton he sevaha he inged te menge Filistihanen, 16 netudtulan haazà is menge sundaru he midhimetayan ni Zimri sikan is hadì. Umbe zutun mismu he andew te ziyà sikandan te kampu zan, midhimu zan he hadì te Israel si Omri. Heini si Omri iyan peremandar te menge sundaru te Israel.

17 Ne mid-awà dutun te Gibeton si Omri wey is menge zuma zin he menge tig-Israel, ne midsurung dan is Tirza. 18 Ne hein naahà ni Zimri he naaǥew en haazà is inged, midseled sikandin diyà te melig-en he vahin duen te turuǥan ne mibinsulan din haazà is turuǥan, umbe minatey sikandin. 19 Neulaula heini tenged te menge salà he mibeelan din. Mezaat is ulaula zin diyà te etuvangan te Nengazen, ne mid-iringan din is ulaula ni Jeroboam wey is salà he mibeelan din, he nehimu he hinungdan te kebpekesalà te menge tig-Israel.

20 Is duma pa he ǥuǥud mehitenged te kedhadì ni Zimri, wey is bahin te kedribildi zin, ne ingkesurat diyà te Libru he Midsuratan te menge Keguǥuza te menge Hadì te Israel.

21 Nevahin te zezuwa he grupu is menge etew ziyà te Israel. Is sevaha he grupu egkesuat he iyan edhimuwen he hadì si Tibni he anak ni Ginat, ne is sevaha pa he grupu si Omri is kandan he egkesuatan. 22 Piru edhuna he melig-en is lumelavan ki Omri te lumelavan ki Tibni te anak ni Ginat. Nepatey si Tibni, ne iyan nehimu he hadì si Omri.

23 Nehimu he hadì te Israel si Omri hein ike-31 he tuig te kedhadì ni Asa ziyà te Juda. Midhadì sikandin seled te 12 he tuig; is heenem he tuig dutun te kedhadì din ne ziyà sikandin te Tirza. 24 Ne mibpemasa zin diyà te ki Shemer is buvungan diyà te Samaria te 70 he kilu he pelata, ne mibangun sikandin dutun te inged. Ne migngezanan din haazà is inged he Samaria, he ebpuun te ngazan ni Shemer he iyan nehuna he teǥiǥaked dutun te vuvungan.

25 Mezaat is baal ni Omri ziyà te etuvangan te Nengazen. Lavew pa te nengehuna kandin he hadì is kandin he kebaal te salà. 26 Mid-iringan din is ulaula ni Jeroboam he anak ni Nebat wey is salà he mibeelan din, he nehimu he hinungdan te kebpekesalà te menge tig-Israel, he iyan is ked-azap te zuma he menge ed-ezapen. Pinaaǥi keniyan midhimu zan he mepauk is Nengazen he Megbevayà te Israel.

27 Is duma pa he ǥuǥud mehitenged te kedhadì ni Omri, wey nevantug he menge vaal zin wey zuma pa he mibeelan din, ne ingkesurat diyà te Libru he Midsuratan te menge Keguǥuza te menge Hadì te Israel. 28 Ne hein minatey en si Omri, inleveng sikandin diyà te Samaria. Ne si Ahab he anak din iyan nekeilis kandin te kedhadì.

29 Nehimu he hadì diyà te Israel si Ahab he anak ni Omri hein ike-38 he tuig te kedhadì ni Asa ziyà te Juda. Diyà med-ubpà te Samaria si Ahab ne midhadì sikandan seled te 22 he tuig. 30 Mezaat is ulaula zin diyà te etuvangan te Nengazen, lavew pa is kezaat din te mezaat he mibeelan te menge hadì he nehuna kandin. 31 Ne kurang pa ziyà te kandin is ked-iring te menge salà he mibeelan ni Jeroboam, kekenà, mid-esawa zin si Jezebel he anak ni Hadì Etbaal he tig-Sidon, ne nenilbi sikandin wey mid-azap te ed-ezapen he si Baal. 32 Mibangun sikandin te simbahan wey pemuhatà he para ki Baal ziyà te Samaria. 33 Mibpevaal zaan sikandin te tukud he simbulu te vahi he ed-ezapen he si Ashera. Midhimu zin iyan he mepauk is Nengazen he Megbevayà te Israel, lavew pa is kezaat kayi te mibeelan din te mibeelan te menge hadì he nehuna kandin.

34 Dutun te timpu te kedhadì ni Ahab, mid-umanan benguna ni Hiel he tig-Betel is Jerico. Hein ebengunen din en is menge pundasyun kayi, minatey is kinekekayan he anak din he si Abiram. Ne hein iyan din en ebpeveelan is menge pultahan kayi he inged, iyan en maan minatey is tinengkezan he anak din he si Segub. Neulaula heini is langun sumalà is lalag te Nengazen pinaaǥi ki Josue he anak ni Nun.