1 Ne zuen sevaha he ebpeneuven te Nengazen he iyan ngazan din si Elias. Meǥinged sikandin diyà te Tishbe, he sakup te Gilead. Migkeǥiyan din si Ahab te, “Kayi te etuvangan te uuyag he Nengazen he Megbevayà te Israel he iyan ed-zapen ku, egkeǥiyen ku kenikew he siguradu wazà dehemug etawa uzan he ebpekeuma seled te egkepipira he tuig emun kenà a egkaǥi he ebpekeuma heini.”

2 Dutun migkeǥiyan te Nengazen si Elias te, 3 “Awè ka kayi ne ziyè ka pevayà te zapit te edsilaan ne eles ka ziyà te zal-ug te Kerit he zapit te edsilaan te Wahig he Jordan. 4 Ne zutun ka inum te zal-ug, ne edsuǥuen ku is menge uwak te ked-uwit te egkekaan nu zutun.” 5 Ne midtuman ni Elias haazà is insuǥù kandin te Nengazen. Midhendiyà sikandin te zal-ug te Kerit he zapit te edsilaan te Wahig he Jordan ne zutun sikandin med-ubpàubpà. 6 Ne ed-uwitan sikandin te menge uwak te supas wey usa emun meselem wey mezukilem, ne zutun sikandin ed-inum te zal-ug.

7 Ne hein neuǥet nemezahan haazà is beuǥan su wazè en med-uzan. 8 Ne zutun migkeǥiyan te Nengazen si Elias te, 9 “Hendiyè ka te Zarefat diyà te Sidon, ne zutun ka ubpà su zuen balu he vahi he midsuǥù ku te kebpekaan kenikew.” 10 Umbe, midhendiyà si Elias te Zarefat. Ne hein nekeume en sikandin diyà te pultahan dutun te inged, neehè din is balu he vahi he ebpengayu. Ne migkeǥiyan din haazà is bahi te, “Betbetai a kenikew uwiti te zeisey zà he wahig su wey a mekeinum.” 11 Ne hein egkuwaan en dutun te valu haazà, ne mid-umanan sikandin keǥiyi ni Elias te, “Betbetai a zaan uwiti te zeisey he supas.”

12 Ne migkaǥi haazà is balu te, “Tutuu is egkeǥiyan ku ziyà te etuvangan te Nengazen he Megbevayè nu, he wazè ku en supas. Iyan dà nesamà is sengekemkem he herina ziyà te yehung wey is deisey he lana ziyà te umuy. Umbe ebpengamì a te pira he leǥas he kayu su ed-uwiten ku heini ziyà te valey su edhilutuen ku sikan is nesamà he herina para kedì wey para te anak ku, ne emun egkaamin dey en heini ne egkeumes key en.”

13 Ne migkaǥi si Elias diyà te kandin te, “Kenè ka meseeng. Ulì ka ne veeli nu is migkaǥi nu. Piru hunai a kenikew hilutui te zeisey zà he supas he ebpuun duen te nesamà he herina nu, ne segugunè nu uwita kayi te kediey. Ne emun igkahated nu en kayi te kediey ne hilutù ka zaan te para kenikew wey para te anak nu. 14 Su iyan heini lalag te Nengazen he Megbevayà te Israel, ‘Kenà egkaamin is herina ziyà te yehung nu wey kenà egkaamin is lana ziyà te umuy nu taman te andew he ibpeuzan ku en kayi te tanà.’ ” 15 Ne migenat haazà is bahi ne mibeelan din is nekaǥi ni Elias. Umbe zuen keenen kada andew he para ki Elias wey para zuen te valu wey te anak din. 16 Su layun duen herina zuen te yehung wey layun duen lana zuen te umuy, sumalà is nekaǥi te Nengazen pinaaǥi ki Elias.

17 Dutun te huziyan he timpu nezeruwan sikan is anak duen te vahi. Migerabi is daru zin taman te minatey sikandin. 18 Migkaǥi haazà is bahi ziyà te ki Elias te, “Sikew is suluǥuen te Megbevayà hengkey is ingkepeuki nu kediey? Iyan be inhendini nu su edhimetayan nu is anak ku su silut kedì tenged te menge salè ku?” 19 Midtavak si Elias te, “Ihengkayi nu heeyan is anak nu.” Migkuwa ni Elias haazà is batà puun te iney zin, ne mid-uwit din diyà te ruǥu he ziyà te zivavew, he iyan ubpeey ni Elias. Impehizeǥè din haazà is batà diyà te hizeǥaan din, 20 ne nengumew-umew sikandin te Nengazen, ke sikandin te, “He Nengazen he Megbevayè ku, maan is mibpeuwitan nu te kezeetan heini is balu he ed-ubpaan ku pinaaǥi te kedhimetayi nu te anak din?” 21 Ketetelu lengkevi ni Elias haazà is batà ne nengumew-umew sikandin te Nengazen he ke sikandin te, “He Nengazen he Megbevayè ku, uyaǥa nu heini is batà!” 22 Midtavak te Nengazen is ampù ni Elias, ne neuyaǥan haazà is batà. 23 Ne impenaug ni Elias haazà is batà ne imbeǥey zin diyà te iney zin. Ke si Elias te, “Ahaa nu man is anak nu, uuyag sikandin!” 24 Ne migkaǥi haazà is bahi ziyà te ki Elias te, “Guntaan netuenan ku en he tutuu iyan he suluǥuen ka te Megbevayà, wey tutuu he ebpekidlalag is Nengazen pinaaǥi kenikew.”