1 Mibpenuiǥen si Ahaz te 20 he tuig hein nehimu sikandin he hadì. Diyà sikandin med-ubpà te Jerusalem, ne midhadì sikandin seled te 16 he tuig. Mezaat is ulaula zin diyà te etuvangan te Nengazen, kenà iring te mibeelan te kepuun din he si David. 2 Iyan midsunud din is menge ulaula te menge hadì te Israel, ne mibaal te mital he ledawan ni Baal. 3 Midtutung sikandin te menge pemuhat diyà te Suǥud-suǥud te Ben Hinom, ne minsan is anak din impemuhat din diyà te hapuy. Mid-iringan din is utew mezaat he menge vaal te menge etew ziyà te menge nasyun he impesegseg te Nengazen te menge Israilihanen. 4 Nemuhat sikandin te menge pemuhat wey midtutung te menge veyewà diyà te menge simbahan diyà te metikang he menge lugar, diyà te puntur te menge vuvungan wey ziyà te sihung te kada merapung he kayu.

5 Umbe, imbeǥey sikandin te Nengazen he Megbevayè din diyà te hadì te Aram. Nezaag sikandin te menge Aramihanen wey mezakel is menge sakup din he nengevihag diyà te Damascus. Imbeǥey zaan sikandin diyà te hadì te Israel, he nenhimatey te mezakel he menge sakup din. 6 Senga andew zà ne 120,000 he menge sundaru te Juda is nengepatey ni Hadì Peka he hadì te Israel, he anak ni Remalia. Neulaula heini ziyà te Juda tenged te mid-iniyuǥan dan is Nengazen, he Megbevayà te menge kepuun dan. 7 Si Zicri is sevaha zuen te utew memevurut he menge sundaru te Israel, midhimetayan din si Maasea he anak ni Hadì Ahaz, si Azrikam he sineriǥan diyà te turuǥan, wey si Elkana he ikezuwa te hadì. 8 Mibihag te menge tig-Israel is menge kezuzumahi zan ded he menge tig-Juda he 200,000 he menge vahi wey menge vatà. Mibpenguwa zan is menge ketiǥeyunan te menge tig-Juda ne mid-uwit dan diyà te Samaria.

9 Piru hein ebpelingguma is menge sundaru ziyà te Samaria, ne midsinuǥung sikandan ni Oded he ebpeneuven te Nengazen, ne migkeǥiyan din te, “Imbeǥey keniyu te Nengazen he Megbevayè niw is menge tig-Juda tenged te nepeukan din sikandan. Piru kenè en ereg is mibeelan niw: mibpenhimetayan niw sikandan te wazà kegkehizu, netuenan heini te Nengazen he ziyà te langit. 10 Ne guntaan egkesuatan niw pa te ed-uripen heini is menge maama wey menge vahi he ebpuun te Juda wey Jerusalem. Wazè niw ve metueni he nekesalè kew zaan diyà te Nengazen he Megbevayè niw? 11 Pemineg kew kedì! Utew nepauk is Nengazen keniyu. Umbe, ipeulì niw heini is menge kezuzumahi niw he mibihag niw.”

12 Iyan daan heini migkaǥi te zuma he menge pengulu te Israel diyà te menge sundaru he nemekeuma he ebpuun te tebek. Heini he menge pengulu iyan ensi Azaria he anak ni Jehohanan, Berekia he anak ni Meshilemot, Jehizkia he anak ni Shalum, wey si Amasa he anak ni Hadlai. 13 Migkaǥi sikandan te, “Kenè niw heeyan pendumaha kayi is menge nevihag, su televaken tew heini ziyà te Nengazen. Kenè tew en ed-umanan is salè tew. Dekelè en is menge salè tew, ne egkepeukan kiw en te Nengazen is menge tig-Israel.” 14 Umbe, insarig te menge sundaru ziyà te menge pengulu wey ziyà te kezekelan is menge vihag wey menge azen he naaǥew zan pinaaǥi te tebek. 15 Ne zutun mid-uvey ziyà te menge vihag sikan is heepat he pengulu he nesempitan is menge ngazan dan, ne mid-atur zan haazà is menge vihag. Migkuwa zan te menge visti puun duen te menge azen he naaǥew te menge sundaru, ne impesul-ub dan heini zuen te menge vihag he wazà bisti. Mibeǥayan dan is menge vihag te menge visti, menge sandalyas, menge keenen, menge inumen wey menge vawì. Impeuntud dan te menge asnu is menge meluya, ne inlikù dan haazà is langun he menge vihag diyà te menge emurè dan te inged. Diyè dan itaǥak sikandan te Jerico, he Inged te menge Palma, ne kegkepasad dutun ne mid-ulì dan diyà te Samaria.

16 Dutun te haazà he timpu ne mibpetavang si Hadì Ahaz te hadì diyà te Asiria. 17 Su mid-umanan surunga te menge tig-Edom is Juda ne nezaag dan ne nevihag is duma he menge meǥinged kayi. 18 Ne gawas kayì, midsurung daan te menge Filistihanen is menge inged te Juda he ziyà te menge mibuntud-buntud diyà te edsenlepan wey te Negev. Ne naaǥew zan is Bet Shemesh, Ayalon, Gederot, Soco, Timnah, wey Gimzo, ragkes en is menge lugar he nekelingut kayi ne zutun en sikandan med-ubpà. 19 Midhimu te Nengazen he mezizalem is Juda tenged te mid-iniyat ni Hadì Ahaz is menge meǥinged dutun te kebaal te mezaat, ne wazà sikandin medsunud te Nengazen. 20 Umbe, hein nekeuma si Hadì Tiglat Piliser he hadì te Asiria, wazè din tevangi si Ahaz kekena, nasì din lisliseza. 21 Mibpenguwa si Ahaz te menge vutang duen te valey te Nengazen, duen te turuǥan, wey ziyà te menge valey te menge upisyal, ne imbeǥey zin heini te hadì te Asiria. Piru wazà heini meketavang ki Ahaz.

22 Emun duen kemereǥenan he ebpekeuma ziyà te ki Hadì Ahaz, ne ed-iseg pa is kedsupak din te Nengazen. 23 Nemuhat sikandin te menge pemuhat diyà te menge ed-ezapen te menge tig-Damascus he nekezaag kandin. Su ke sikandin te, “Is menge hadì te Aram ne midtevangan te menge ed-ezapen dan. Umbe ebpemuhaten ku zaan heini he menge ed-ezapen para tevangi e zan.” Piru iyan heini nekezezaat kandin wey te tivuuk he Israel.

24 Mibpenguwa ni Ahaz is menge gelemiten duen te valey te Megbevayà ne mibpendèdèetan din heini. Mibpenlekevan din is menge gemawan te valey te Nengazen ne midtukud sikandin te menge pemuhatà diyà te kada suyuk te Jerusalem. 25 Midtukud daan sikandin te menge simbahan diyà te metikang he menge lugar ziyà te langun he menge inged he sakup te Juda su wey zin mepemuhat is duma he menge ed-ezapen. Ne utew heini ingkepauk te Nengazen, he Megbevayà te menge kepuun din.

26 Is duma pa he ǥuǥud mehitenged te kedhadì ni Ahaz wey te ulaula zin, puun pa te puunà taman te ketepusan, ne ingkesurat diyà te Libru he Midsuratan te menge Keguǥuza te menge Hadì te Juda wey Israel. 27 Hein minatey en si Ahaz, inleveng sikandin diyà te inged he Jerusalem piru kenà duen te penlevengà te menge hadì te Israel. Ne si Hezekia is anak din iyan nekeilis kandin te kedhadì.