1 Mibpenuiǥen si Hezekia te 25 he tuig hein nehimu sikandin he hadì. Diyà sikandin med-ubpà te Jerusalem, ne midhadì sikandin seled te 29 he tuig. Is iney zin iyan si Abia he anak ni Zacarias. 2 Meupiya is ulaula ni Hezekia ziyà te etuvangan te Nengazen, iring te mibeelan te kepuun din he si David. 3 Dutun te nehuna he vulan te nehuna he tuig te kedhadì ni Hadì Hezekia, ne mibpeumanan din pepuwasi is menge gemawan te valey te Nengazen ne mibpepurungan din. 4 Impetawag din is menge memumuhat wey menge Levihanen ne midtiǥum din diyà te lama he zapit te edsilaan dutun te valey te Nengazen. 5 Ne migkeǥiyan din sikandan te, “Pemineǥa a keniyu, sikiyu is menge kevuwazan ni Levi. Guntaan, ihalad niw is keugelingen niw wey lumpiyuwi niw zaan is baley te Nengazen, he Megbevayà te menge kepuun niw. Iawè niw keniyan te valey te Nengazen is langun he menge vutang he ed-isipen he meremerik. 6 Kenà metinumanen is menge kepuun tew. Kenà meupiya is ked-ahaa te Nengazen he Megbevayè tew te mibeelan dan. Ne mid-iniyuǥan dan sikandin. Mid-iniyuǥan dan is baley he ed-ubpaan te Nengazen ne mid-ewaan dan sikandin. 7 Midlekevan dan is menge gemawan duen te varkun te valey te Nengazen, ne mibpen-evukan dan is menge sulù. Wazè dan medtutung te veyewà wey wazè dan mebpemuhat diyà te valey te Nengazen te menge pemuhat he edtutungen he para te Megbevayà te Israel. 8 Umbe, utew nepeuki te Nengazen is menge tig-Juda wey menge tig-Jerusalem. Wey tenged te silut din kenitew, midhimu zin he igkelimezangi, ebpendemisan, wey ed-un-undahan kiw te menge etew iring te neehè niw ǥuntaan. 9 Nemematey is menge kepuun tew te tebek wey mibpemihag is menge esawa tew wey menge anak tew. 10 Piru ǥuntaan disididu a he ebpekid-uyun kew te Nengazen he Megbevayà te Israel, su wey maawà is utew zin kegkepeuki kenitew. 11 Umbe, sikiyu is menge minahal ku, ne kenè kew en mebpesagdan. Iyan kew mibpilì te Nengazen he ibpehitindeg diyà te etuvangan din, te kebpenilbi wey kebpemuhat,” ke si Hezekia.

12 Umbe, segugunà mibpuun medterebahu heini he menge Levihanen:

Diyà te pemilya ni Kohat: si Mahat he anak ni Amasai wey si Joel he anak ni Azaria.

Diyà te pemilya ni Merari: si Kish he anak ni Abdi wey si Azaria he anak ni Jehalelel.

Diyà te pemilya ni Gershon: si Joa he anak ni Zema wey si Eden he anak ni Joa.

13 Diyà te menge kevuwazan ni Elizafan: si Shimri wey si Jiel.

Diyà te menge kevuwazan ni Asaf: si Zacarias wey si Matania. 14 Diyà te menge kevuwazan ni Heman: si Jehiel wey si Shimei.

Diyà te menge kevuwazan ni Jedutun: si Shemaya wey si Uziel.

15 Midtiǥum dan is menge zuma zan he menge Levihanen ne mibpekelumpiyu sikandan. Ne midlumpiyuwan dan is baley te Nengazen su iyan inmandù te hadì. Midsunud dan is migkaǥi te Nengazen. 16 Midseled is menge memumuhat dutun te valey te Nengazen su edlumpiyuwan dan heini. Inggawas dan dutun te Baley te Nengazen is langun he menge gelemiten he mid-isip he meremerik. Ne mid-uwit heini te menge Levihanen diyà te zal-ug he Kidron.

17 Mibpuunan dan lumpiyuwi haazà is baley te Nengazen hein nehuna he andew te nehuna he vulan, ne hein ikewalu en he andew nekeuma zan en is ebpenlumpiyu ziyà te varkun dutun te Baley te Nengazen. Ne impedayun dan is kedlumpiyu zutun te Baley te Nengazen te walu pa he andew, ne nepasad dan heini te ike-16 he andew zutun he vulan. 18 Ne hein neipus haazà ne midhendiyè dan te ki Hadì Hezekia he ke sikandan te, “Nelumpiyuwan dey en is tivuuk he valey te Nengazen ragkes en is pemuhatà te menge pemuhat he edtutungen wey is langun he menge gelemiten kayi, ragkes en is lemisahan he selevukà te supas he ibpemuhat diyà te etuvangan te Megbevayà wey is langun he menge gelemiten kayi. 19 Ingkelikù dey zaan is langun he menge gelemiten he migkuwa ni Hadì Ahaz tenged te ked-iniyuǥi zin te Megbevayà. Midlumpiyuwan dey heini ne egkehimu en he egemiten. Diyè en heini ǥuntaan te etuvangan te pemuhatà he para te Nengazen.”

20 Ne meselem pa zutun te sunud he andew, midtiǥum ni Hadì Hezekia is menge upisyal ziyà te inged ne midhendiyè dan te valey te Nengazen. 21 Midtundan dan te pitu he tudu he vaka, pitu he meemahan he menge kerehidu he memeǥurang en, pitu he meemahan he menge kerehidu he menge nati pa, wey pitu he meemahan he kambing he pemuhat he para idlumpiyu te ginhedian dan, wey te Baley te Nengazen wey te menge etew ziyà te Juda. Midsuǥù ni Hadì Hezekia is menge memumuhat he menge kevuwazan ni Aaron te kebpemuhat keniyan he menge pemuhat diyà te pemuhatà he para te Nengazen. 22 Umbe, midlapà dutun te menge memumuhat sikan is tudu he menge vaka ne impirik dan is lengesa kayi ziyà te pemuhatà. Midlapè dan daan sikan is memegurang en menge kerehidu ne impirik dan daan is lengesa kayi zuen te pemuhatà, ne kegkepasad dutun iyan en maan sikan is menge nati he kerehidu ne impirik dan daan is lengesa kayi zuen te pemuhatà. 23 Sikan is menge kambing he pemuhat he para idlumpiyu, mid-uwit diyà te hadì wey ziyà te kezekelan, ne indampè dan is menge velad dan dutun te menge kambing. 24 Ne midlapà dutun te menge memumuhat haazà is menge kambing ne in-itis dan is lengesa ziyà te pemuhatà he pemuhat he para idlumpiyu su wey mepalis is salà te langun he menge Israilihanen. Su insuǥù te hadì is kebpemuhat te menge pemuhat he edtutungen wey menge pemuhat he para idlumpiyu he para te langun he menge Israilihanen.

25 Ne impepelastar ni Hezekia ziyà te valey te Nengazen is menge Levihanen he zuen dan menge simbal, menge alpa, wey menge lira. Ne kedtuman heini te insuǥù te Nengazen ki Hadì David pinaaǥi ki Gad he menenagnà ni David wey te ebpeneuven he si Natan. 26 Mibpelastar is menge Levihanen he zuen dan menge instrumintu he gaked dengan ni Hadì David, wey is menge memumuhat he zuen dan menge trumpita.

27 Ne mibmandù si Hezekia he ipemuhat en diyà te pemuhatà is menge pemuhat he edtutungen. Ne zutun te kebpemuhat, migkanta is menge etew te kedalig te Nengazen, he miduyuǥan te menge trumpita wey zuma pa he menge instrumintu he iring te mibpemeveelan dengan ni Hadì David he hadì te Israel. 28 Is langun he menge etew zutun, mid-azap dan is Nengazen dutun te egkanta is menge perekanta wey is menge perehiyup te trumpita taman te nepasad is kebpemuhat te menge pemuhat he edtutungen. 29 Ne hein nepasad is kebpemuhat, ne midluhud si Hadì Hezekia wey is langun he menge zuma zin ne mid-azap dan is Nengazen. 30 Midsuǥù ni Hadì Hezekia wey te menge upisyal zin is menge Levihanen te kedalig te Nengazen pinaaǥi te kegkentaha zan te menge kentahan he vineelan ni Hadì David wey ni Asaf he ebpeneuven. Ne melipayen sikandan he egkanta te menge kentahan he idalig dutun te midluhud sikandan is ed-azap te Megbevayà.

31 Ne migkaǥi si Hezekia te, “Ǥuntaan te ingkahalad niw en is keugelingen niw ziyà te Nengazen, uwit kew te menge pemuhat diyà te Baley te Nengazen, ragkes en is menge pemuhat he para te kebpeselamat.” Umbe mid-uwit is menge etew ziyà te valey te Nengazen te menge pemuhat he migkaǥi te hadì, ne is duma, keugelingen dan he suat is kebpemuhat dan te menge pemuhat he edtutungen. 32 Is kahabet te menge pemuhat he edtutungen he mid-uwit te menge etew 70 he tudu he menge vaka, 100 he meǥurang en he meemahan he menge kerehidu, wey 200 he nati he meemahan he menge kerehidu. 33 Mid-uwit dan daan te zuma pa he menge pemuhat he 600 he tudu he menge vaka wey 3,000 he menge kerehidu wey menge kambing. 34 Piru kurang is kezakel te menge memumuhat he edlapà kayi te langun he menge uyaǥen. Umbe mid-uǥup kandan is menge kezuzumahi zan he menge Levihanen, ne mibmezakel zaan is menge memumuhat he nenlumpiyu te keugelingen dan su wey zan mekeuǥup taman te kegkepasad dutun he terebahu. Su metinumanen pa is menge Levihanen te kebpenlumpiyu te keugelingen dan kenà te menge memumuhat. 35 Utew mezakel is menge pemuhat dan he edtutungen, mahabet daan is menge tavà te menge uyaǥen he pemuhat he para te meupiya he kedepità, wey pemuhat he inumen he idlapik duen te pemuhat he edtutungen. Pinaaǥi kayi nelikuan te ebaal is menge vuluhaten diyà te valey te Nengazen. 36 Midlipey si Hezekia wey is menge etew tenged te tavang te Megbevayà, su meǥaan dan dà nepasad is langun kayi.