1 Iyan heini migkaǥi te Nengazen he Mekeǥeǥehem, he Megbevayà te Israel, mehitenged te Moab:

“Mekehizuhizu is menge tig-Nebo su edezeetan heini. Egkepeel-elezan wey ebihaǥen is menge tig-Kiriataim, ne egkengetempag is menge eputà dan he metikang he lugar. 2 Kenè en edeliǥen is nasyun he Moab. Diyà te Heshbon, mibpelanu is menge kuntada te kedezaat te Moab. Ke sikandan te, ‘Agpas kew su edezeetan tew is Moab.’ Is inged he Madmen edsurungen te kuntada, ne egkehimu he mekevulungbulung. 3 Pemineǥa niw is kulehian diyà te Horonaim tenged te zekelà he tebek wey kezeetan. 4 Egkezeetan is Moab, ne ed-erang is menge vatà. 5 Is menge meǥinged diyà te Moab ebpemenlelendag is edtekezeg diyà te Luhit wey ebpemenupang diyà te Horonaim. Uya, egkezineg is erang dan tenged te kezeetan.

6 “Libriya niw is keugelingen niw! Pelaǥuy kew ziyà te sibsivayan. 7 Sikiyu is menge tig-Moab, midsarig kew te ebilidad niw wey ketiǥeyunan niw. Umbe ebihaǥen kew, ragkes en is ledawan he ed-ezapen niw he si Kemosh wey is menge memumuhat para kayi wey is menge upisyal.

8 “Ebpekeuma ziyà is ebpendezaat te kada inged, ne wazà inged he kenà egkezeetan. Egkezeetan daan is menge inged diyà te menge suǥud wey suǥud-suǥud diyà te vuvungan. Egkehitavù heini, su iyan a, is Nengazen, is migkaǥi kayi. 9 Angin pezem ke zuen pakpak te menge meǥinged te Moab ne ebpekelayang dan pezem pehendiyà te meziyù, su egkengezeetan is menge inged kayi ne kenè en egkeubpaan. 10 Edrewakan is etew he kenà edseǥipà te vuluhaten te Nengazen he kedezaat te Moab. Edrewakan is etew he kenà egamit te ispada te kedhimatey te menge tig-Moab. 11 Dezeyaan is ked-ubpà diyà te Moab puun pa te nehuna he timpu. Wazè keenu mevihag is menge etew kayi. Neiring heini te vinu he wazà welenga etawa wazà ihalin diyà te selakew en he teleǥuey. Umbe wazà mahalin is taam din wey ngazeg din.

12 “Piru egkeuma is timpu he edsuǥuen ku is kuntada te kedsurung te Moab. Ne zutun egkeiring is nasyun he Moab te vinu he mid-ulaan puun te midteǥuan duen ne edrunteken din daan heini. 13 Ne zutun igkeeled te menge tig-Moab is ed-ezapen dan he si Kemosh iring te ingkeeled te menge Israilihanen is kenà tutuu he megbevayà he mid-azap dan diyà te Betel. 14 Mibpahambug is menge tig-Moab he mevurut kun is menge sundaru zan he ebpekidtebek. 15 Piru egkezeetan utew is menge tig-Moab wey is menge inged kayi. Ebpenhimetayan is kinemevurutan he menge vetan-en dan. Iyan a, is Nengazen he Mekeǥeǥehem he Hadì, is migkaǥi kayi.

16 “Hapit en egkezeeti is Moab. 17 Keseeng kew is langun he nasyun he kezapig te Moab, sikiyu is langun he nesayud te kegkevantug te Moab! Keseeng kew ne ke sikiyu te, ‘Netapus en is Moab! Netamped en is tuked din, kes tuked he simbulu te kegkemekeǥeǥehem din wey kegkeventuǥan.’

18 “Sikiyu is menge meǥinged diyà te Dibon, pekevavè kew ne lumpeng kew ziyà te tanà. Su is edezaat te Moab edsurung daan diyà te keniyu; ebengkaǥen dan is menge inged niw he mibpeliǥuyan te verengbeng. 19 Sikiyu is menge meǥinged diyà te Aroer, hitindeg kew ziyà te kilid te zalan, ne taǥad kew. Insai niw is ebpemelaǥuy ke hengkey is nehitavù. 20 Ne edtavak dan te, ‘Nezeetan en is Moab, ne nepeel-elezan en is menge etew zuen. Umbe keseeng kew wey sineǥew kew. Kulehia niw is menge tig-Arnon he nezeetan en is Moab.’

21 “Edsilutan daan is menge inged diyà te suǥud-suǥud diyà te vuvungan: is Holon, Jaza, Mefaat, 22 Dibon, Nebo, Bet Diblataim, 23 Kiriataim, Bet Gamul, Bet Meon, 24 Keriot, wey Bozra. Egkeumahan en te silut is langun he ziyà te menge inged diyà te Moab, uvey man etawa meziyù. 25 Naawè en is kegkemekeǥeǥehem te Moab ne meluya en heini ǥuntaan. Iyan a, is Nengazen, is migkaǥi kayi.

26 “Lenguta is Moab, su nekidsukulà kediey. Egkelilid sikandin diyà te keugelingen din he utà ne egkehimu he egkeengitan. 27 Sikiyu is menge meǥinged diyà te Moab, kenè be midsudì niw is Israel? Maan, nezekepan be heini he nenakew? Ne maan is ebpenggemen-gemen kew zà te kedsudì kayi? 28 Awè kew en diyà te menge inged niw ne ziyè kew ubpà te vetuwen, he iring te menge merepatik he ed-impis diyà te pangpang. 29 Utew kew menge gelbuwen. Netuenan ku ke sengemenu ketikang is galbu niw wey kegkemepelevawen. 30 Siak is Nengazen, netuenan ku he utew kew menge hembugiru, piru wazè kayi pulus. 31 Umbe, edsineǥawan ku is Moab wey menge tig-Kir Hareset. 32 Edsineǥawan ku zaan is menge etew ziyà te Sibma, he lavew pa te kedsineǥawi ku te menge tig-Jazer. He Sibma, neiring ka te sengepuun he paras he nekeuma is menge subpang din diyà te Daǥat he Minatey ne taman en te Jazer. Piru ǥuntaan mid-amin penguwaa te ebpendezaat is menge veǥas nu. 33 Kenè en egkezineg diyà te tanà te Moab is kedlipey wey keguǥusà diyà te vevesukà wey menge pemuleey te paras. Wazè en edtudà he vinu ziyà te keresà. Wazè en egkeres te paras he ed-uruhuy tenged te kegkelipey zin. Duen hinuun kulehian piru kenà kulehian tenged te kegkelipey. 34 Is erang te menge tig-Heshbon taman en is kegkezineǥa zuen diyà te Eleale wey Jahaz. Is erang te menge tig-Zoar, taman en is kegkezineǥa zuen diyà te Horonaim wey Eglat Shelishiya. Su minsan is wahig he Nimrim nemezahan en. 35 Ebpenhimetayan ku is menge tig-Moab he ebpememuhat diyà te menge simbahan diyà te Moab he ziyà te metikang he menge lugar wey edtutung te veyewà he para te zuma he menge ed-ezapen. Iyan a, is Nengazen, is migkaǥi kayi.

36 “Umbe neseeng a tenged te Moab wey menge tig-Kir Hareset; neiring a te etew he ebpemulalà he ediyaga. Naawè en is ketiǥeyunan he naangken dan. 37 Is kada sevaha kandan mibpaahà te kegkeseeng din pinaaǥi te kebpevangul, kegkiskis te sumpà, kebpemelìi te velad, wey kebivisti te saku. 38 Nemen-erang is menge etew ziyà te atep te menge valey zan wey ziyà te menge pelasa, su midezeetan ku is Moab ne neiring heini te umuy he nerupet he wazè en seǥipaa. 39 Nezeetan en is Moab! Pemineǥa is erang te menge meǥinged kayi. Utew egkepeel-elezi is Moab, ne edsudien heini ne igkelimezangi heini te langun he menge nasyun he nekeelingkus kayi he nekaahà te nehitavù.”

40 Mibpedayun pa megkaǥi is Nengazen te, “Ehàa niw man! Is kuntada te menge tig-Moab neiring te kulaǥu he midlayang he edawi kandan. 41 Egkaaǥew zan is menge inged wey menge kampu te Moab. Dutun he timpu egkulbaan is menge sundaru te Moab ne egkeiring te vahi he ebeliliten. 42 Egkezeetan is nasyun he Moab tenged te mid-isip din is keugelingen din he lavew pa sikandin he gemhanan kenà is Nengazen. 43 Kegkeherati, budsi, wey litag is egkepeveyaan te menge tig-Moab. 44 Is minsan hentei kandan he ebpelaǥuy su egkahandek ne egkeulug diyà te vudsi. Ne is ebpekeǥawas puun te vudsi, ne egkelitag. Su edsilut a ziyà te Moab emun egkeume en is midtelaan ku he timpu. Iyan a, is Nengazen, is migkaǥi kayi. 45 Is mekehizuhizu he ebpemekepelaǥuy egkesuat dan he ed-eles diyà te Heshbon. Piru heini is Heshbon he midhedian dengan ni Hadì Sihon egkiràkirà is hapuy zuen. Egkevinsulan is menge vuvungan he mid-elesan te menge tig-Moab he zengan, utew susuaten te kebpekidtebek.

46 “Mekehizuhizu kew is menge tig-Moab! Nengezeetan kew is ed-azap te ed-ezapen he si Kemosh, ne mibihag is menge anak niw. 47 Piru ziyà te huziyan he timpu, idlikù ku zed is meupiya he kebpekesavuk diyà te Moab. Iyan a, is Nengazen, is migkaǥi kayi.” Iyan heini menge lalag mehitenged te Moab.