1 Iyan heini migkaǥi te Nengazen he mehitenged te menge Amunihanen:

“Sikiyu is menge etew he ed-azap te ed-ezapen he si Molec, maan is mid-ubpaan niw is menge inged diyà te tanà ni Gad? Wazè be menge kevuwazan ni Israel he nekepengevilin kayi he tanà? 2 Siak, is Nengazen, migkaǥi a te egkeuma is timpu he ibpesurung ku te menge kuntada niw is Raba. Ebengkaǥen dan heini is dekelà he inged niw ne ebinsulan dan is dezeisey he menge inged diyà te peliǥuy zin. Pinaaǥi kayi egkesegseg te menge Israilihanen is menge midsegseg kandan.

3 “Ebpekesineǥew kew taman te egkehimu niw, is menge etew ziyà te Heshbon, su egkezeetan is Ai. Ebpekesineǥew kew zaan is menge meǥinged diyà te Raba! Ebivisti kew te saku is edlikù-likù ebpelelaǥuy ziyà te kilid te verengbeng te kebpaahà he edlalew kew. Su ebihaǥen is ed-ezapen niw he si Molec duma te menge memumuhat wey te menge upisyal zin. 4 Sikiyu is menge meluiven, maan is impurung niw ipahambug is selebpeten he menge suǥud he tanè niw? Midsarig kew te ketiǥeyunan niw ne ke sikiyu te wazà ebpekehimu he edsurung keniyu. 5 Edsuǥù a te menge kuntada niw he ebpuun diyà te menge nasyun diyà te peliǥuy keniyu he ebpelihandek keniyu. Edsegseǥen kew zan puun te tanè niw, ne wazà edumala keniyu te ebpemelaǥuy. 6 Piru ziyà te huziyan he timpu, ne idlikù ku is meupiya he kebpekesavuk te menge Amunihanen. Iyan a, is Nengazen, is migkaǥi kayi.”

7 Iyan heini migkaǥi te Nengazen he Mekeǥeǥehem bahin te Edom:

“Hendei en is uluwanen diyà te Teman? Wazè en be nesamà he metau he edsambag? 8 Sikiyu is nemen-ubpà diyà te Dedan, ebpemelaǥuy kew ne ed-eles kew ziyà te mezalem he menge surung. Su ebpeeǥiyan ku te kezeetan is menge kevuwazan ni Esau dutun te timpu te kedsiluti ku kandan. 9 Kenè be is ebpenrupù te paras kenè din ed-eminen is menge veǥas kayi, kekenà, edsemaan din? Kenè be is tekawen kenè din ed-eminen te egkuwa is menge azen diyà te seled te valey, kekenà, iyan dà egkuwaan dan is kinahanglan he egkuwaan dan? 10 Piru ed-eminen mulà egkuwaa is menge azen te menge kevuwazan ni Esau. Edluwisan ku is elesè dan, su wey kenà sikandan mekeeles. Ebpematey is menge anak dan, menge kezuzumahi zan, wey is menge siringan dan. Ne wazà egkesamà kandan. 11 Piru itaǥak niw kayi te kediey is menge neilu keniyu su ed-eturen ku. Ne is nengevalu keniyu he menge vahi ne ebpekesarig kayi te kediey.”

12 Mibpedayun pa megkaǥi is Nengazen te, “Is wazà mekesalà ne egkerasey man ganì, ne iyan kew pe be? Edsilutan ku iyan sikiyu! 13 Nenangdù a ziyà te ǥehinawa ku he edezeetan ku is inged he Bozra. Egkehimu heini he mekeharatharat he ed-ahaan, edsudien heini, ne egemiten is ngazan din te kebpenrawak. Is langun he menge inged kayi kenè en egkepurungan te taman te taman.”

14 Nezineg ku is tudtul he ebpuun diyà te Nengazen, he midsuǥù kun sikandin te menge menunudtulà pehendiyà te menge nasyun su wey zan metudtuli he mebpengandam dan para te tebek, wey edhinggaten din sikandan he medsurung dan diyà te nasyun he Edom. 15 Su migkeǥiyan te Nengazen is menge tig-Edom te, “Pemineg kew! Edhimuwen ku sikiyu he edhuna pa he egkaayuayu te zuma he menge nasyun, ne utew mezaat is ked-isipa zan keniyu. 16 Midlimbungan kew te galbu niw wey te kedtuu niw he egkahandek keniyu is duma he menge nasyun. Mibpahambug kew he ziyè kew ed-ubpà te vetuwen he metikang he lugar. Piru minsan idrepeng niw pa is ketikang te ubpeey niw te ketikang te impisà te kulaǥu, edezeetan ku ǥihapun sikiyu.”

17 Migkaǥi pa is Nengazen te, “Igkahandek te menge etew is mezaat he kebpekesavuk te Edom. Is langun he edsaǥad kayi ne egkeinuinu ne henduen be te kenà ebpeketuu te egkehitavù kayi he nasyun. 18 Iring te nezeetan is Sodom wey Gomora wey is menge inged diyà te peliǥuy kayi, egkezeetan daan is Edom. Ne wazè en ed-ubpà dutun. Iyan a, is Nengazen, is migkaǥi kayi 19 Edtik-ew a edsurung diyà te Edom he iring a te erimaung he ebpuun te ketelunan diyà te Jordan he edhendiyà te menge kerehidu ziyà te penebtavà. Edsegseǥen ku sikandan ne iyan ku ibpezumala te Edom is etew he mibpilì ku. Hentei is iring kediey? Hentei is ebpeǥaruǥaru he edsukul kediey? Hentei is pengulu he ebpekigkuntada kedì? 20 Umbe, pemineǥa niw is mibpelenuwan ku te ebaal he idezaat te Edom, wey menge meǥinged diyà te Teman: Minsan is menge anak dan ne ebihaǥen, ne edezeetan daan is tanè dan tenged te mibeelan dan. 21 Tenged te utew subra he kegkezeeti te Edom egkeenluwag is tanà, ne is erang dan ebpekeuma is kegkezineǥa zuen diyà te Daǥat he Meriǥà. 22 Tengteng kew! Is kuntada henduen be te kulaǥu he edlayang su edawi te Bozra. Dutun he timpu egketeranta is menge sundaru te Edom he henduen be te vahi he ebeliliten.”

23 Iyan heini menge lalag mehitenged te Damascus: “Netingkemed is menge tig-Hamat wey menge tig-Arpad te mezaat he tudtul he nezineg dan. Neliveǥan sikandan wey kenà ebpekehulenà is ked-isip-isip dan; neiring dan te ebpemaǥel he zaǥat. 24 Midluyahan is menge tig-Damascus ne mibpelaǥuy zan tenged te kegkahandek dan. Migkulbaan dan wey neseeng dan, neiring dan te vahi he ebeliliten. 25 Is inged he Damascus he nevantug wey melipayen is menge meǥinged duen, inselikwey en! 26-27 Is menge vetan-en he menge maama kayi ebpematey ziyà te menge kersada ragkes en is menge sundaru kayi. Ebinsulan ku is berengbeng te Damascus wey is melig-en he menge vahin kayi he inged ni Hadì Ben Hadad. Iyan a, is Nengazen he Mekeǥeǥehem, is migkaǥi kayi.”

28 Iyan heini migkaǥi te Nengazen mehitenged te Kedar wey te menge ginhedian diyà te Hazor he midsurung ni Hadì Nebucadnezar he hadì te Babilonia:

“Pengandam kew ne surunga niw is Kedar! Dezeeti niw heini he menge etew is diyà te edsilaan. 29 Ne eǥawa is menge tulda wey menge ayam dan. Kuwaa is menge vutang dan wey menge kemilyu zan. Edhabet sikandan ebpemensag te, ‘Midliǥuyan kiw te mekahandek-handek he menge kuntada tew.’

30 “Sikiyu is menge tig-Hazor, gaanggaan kew pelaǥuy! Iyan is Nengazen, is migkaǥi he eles kew ziyà te menge surung. Mibpelanu te kedezaat keniyu si Hadì Nebucadnezar he hadì te Babilonia. 31 Iyan a, is Nengazen, midsuǥù kandan he surunga zan is menge etew he ebpeeyehey zà he wazà igkeipeng. Is pultahan te inged dan wazè din lekeb etawa terangka, ne nengungubpaan dan he iyan dan dà. 32 Is menge kemilyu zan wey is langun he menge uyaǥen dan ne egkehimu he keniyu. Ibpeyapat ku ziyà te minsan hendei heini is menge etew he mibpen-elutan is dapit te kendingen dan, ne ibpeseǥazan ku kandan is kezeetan he ebpuun diyà te minsan hendei. 33 Egkehimu he mekevulungbulung is Hazor taman te taman ne wazè en etew he ed-ubpà dutun, kekenà, iyan dà is leew he menge asu.”

34 Iyan heini migkaǥi te Nengazen diyà te ki Jeremias he ebpeneuven bahin te Elam, dutun te iyan pa kebpuun te kedhadì ni Zedekia ziyà te Juda. 35 Migkaǥi is Nengazen he Mekeǥeǥehem te, “Ebpenhimetayan ku is menge mememanà diyà te Elam he memetau he menge sundaru zan. 36 Edsurungen is Elam te menge kuntada he ebpemuun diyà te heepat he menge lugar kayi te kelibutan, ne ibpeyapat ku is menge meǥinged dutun diyà te minsan hendei. Ne ebihaǥen sikandan diyà te langun he menge nasyun kayi te kelibutan. 37 Edezeetan ku sikandan diyà te etuvangan te menge kuntada zan he egkesuat he edhimatey kandan. Uya, edezeetan ku sikandan tenged te utew ku kegkepauk. Ibpesurung ku sikandan te menge kuntada zan taman te egkaamin sikandan is langun. 38 Ibpelastar ku ziyà te Elam is pinuuwè ku te kedhadì, ne edhukuman ku sikandan ne edezeetan ku is hadì wey menge upisyal zutun. 39 Piru ziyà te huziyan he timpu idlikù ku zed is meupiya he kebpekesavuk diyà te Elam. Iyan a, is Nengazen, is migkaǥi kayi.”