1 Sevaha a te nekesaǥad te kedsilut te Nengazen tenged te kegkepauk din. 2 Midsegseg e zin diyà te meziyù, ne impehipanew e zin diyà te merusirem ne kenà diyà te merayag. 3 Midsilutan e zin he wazè e zin en engkezi maandew wey mezukilem. 4 Impemeluya zin is tivuuk he lawa ku, ne mibadtì din is menge tulan ku. 5 Midsurung e zin ne utew subra is kegkeseeng ku wey kegkerasey ku. 6 Impeubpè e zin diyà te kerusireman iring duen te neuǥet en he minatey. 7 Impekedinahan e zin wey midliǥuy e zin te verengbeng su wey a kenà mekepelaǥuy. 8 Minsan ebuyù e pa te tavang ne kenè e zin ebpemineǥen. 9 Mid-elangan din te intambù he menge vatu is beyeey ku, ne impevulvulegkù din is ebeyaan ku. 10 Iring sikandin te bir etawa erimaung he mid-ayan su edawi kedì. 11 Miguyud e zin pehendiyà te meziyù te zalan, ne mibpengiitan e zin ne human e zin ewai. 12 Midhingat din is panè din ne impesinaru zin kayi te kedì. 13 Midpanè e zin ne midlembasan is pusung ku.

14 Nehimu a he egkeengitan te zuma ku he menge meǥinged. Edsudien e zan seled te tivuuk he andew pinaaǥi te kanta. 15 Pudu zà mepait he kemeresayan is imbeǥey zin kediey. 16 Nengesepù is menge ngipen ku su impesepèsepè din kedì is pantad, ne impevudseng e zin diyà te tanà. 17 In-awè din kayi te kedì is meupiya he kebpekesavuk, ne wazè ku en meseǥazi is keuswagan.

18 Naawè en is dengeg ku wey is langun he ebperetengen ku ziyà te Nengazen. 19 Emun ed-is-isipen ku is kemeresayan ku wey kegketazintazin ku ne utew heini maitpait he kebpekesavuk. 20 Emun layun ku heini ed-is-isipa ne egkaawà is kezasig ku. 21 Piru edlikù is perateng ku emun iyan ku egketenuzan 22 he is kebmahal wey hizu te Nengazen ne wazà pidtemanan. Umbe wazè kiw zed mepurung mezeeti. 23 Metinumanen iyan is Nengazen. Ibpeehè din is hizu zin kada andew. 24 Nekekaǥi a ziyà te ǥehinawa ku te, “Is Nengazen iyan utew zekelà kayi te kediey, umbe ebperateng a kandin.” 25 Ebpurungan te Nengazen is menge ebperateng wey edangep diyà te kandin. 26 Meupiya ke edtaǥad ki he mepelevayen te kedlibri te Nengazen kenita. 27 Meupiya para te sevaha he etew is kebpemansu zutun te vetan-en pa sikandin. 28 Emun ebmensuwen ki te Nengazen, kinahanglan he ebpinuu ki he sebsevaha ta ne ebpurung ki egngunùngunù. 29 Ibpekevavè ta is keugelingen ta ziyà te etuvangan te Nengazen ne kenè ta id-awà is perateng ta. 30 Emun duen edtabpi kenikew, ne itaan nu is enaping nu. Ne zewata nu is ked-insultuwi kenikew te menge kuntada nu. 31 Su is Nengazen ne kenà taman te taman is kedselikwaya zin kenitew. 32 Minsan ebeǥey sikandin te kelised, ibpeehè din gihapun is hizu zin tenged te kezekelà te kebmahal zin he wazà pidtemanan. 33 Su kenè din igkelipey is kebpaantus wey kedrasey kenitew.

34 Kenà egkesuat is Utew Lavew he Megbevayà emun edèdaaǥen is menge pirisu, 35 etawa kenà ebeliyen is ketenged te etew. 36 Kenà daan egkesuatan te Nengazen he edtuisen is hustu he kukuman diyà te hukmanan. Neehè din heini is langun.

37 Wazà minsan hengkey he egkehitavù he wazà ituǥut te Nengazen. 38 Kenè be is Utew Lavew he Megbevayà iyan ebayàbayà te kegkehitevua te mezaat etawa meupiya he hitavù? 39 Ne maan is edriklamu ki emun edsilutan ki tenged te menge salè ta? 40 Ereg he edsusiyen ta is betasan ta ne edlikù ki ziyà te Nengazen. 41 Ed-ebriyan ta is gehinawa ta ne ibayew ta is menge velad ta ziyà te Megbevayà diyà te langit he kesikita te, 42 “Nekesalà key wey nekidsukulà key kenikew, Nengazen, ne wazè key kenikew peseyluwa. 43 Nepauk ka ne midal-as key kenikew ne mibpenhimetayan key kenikew he wazè key en kenikew mehizuwi. 44 Midtambun ka te ǥapun, su wey nu kenà mezineg is pengemuyù dey. 45 Midhimu key kenikew he iring te vesura is ked-ahaa zuen te menge etew ziyà te zuma he menge nasyun. 46 Midsudì key te langun he menge kuntada zey. 47 Nekaantus key te kegkahandek, bangkit, kepirdiyan, wey kezeetan.”

48 Midtudà is menge luhè ku tenged te kegkezeeti te zuma ku he menge meǥinged. 49 Ebpedayun edtudà is luhè ku 50 taman te edseǥipaan kiw te Nengazen he ebpuun te langit. 51 Inmesakit te gehinawa ku is nehitavù te menge vahi ziyà te inged dey.

52 Neiring a te tagbis he midal-as te menge kuntada ku minsan wazè ku neveelan he salà diyà te kandan. 53 Tinguhè dan is kedhimatey kedì pinaaǥi te ked-uluǥa zan kedì diyà te vudsi wey kebpenulenga zan kedì te vatu. 54 Henduen be te egkelened a ziyà te wahig, ne kunaan ku ke ebpatey ad.

55 Puun te kinezizeleman te vudsi nengumew a kenikew, Nengazen. 56 Mibpemineg nu is kebpehizuhizu ku wey kebuyù ku te tavang. 57 Nekeuma ka hein mid-umew ku sikew, ne migkaǥi ka te kenà a mahandek. 58 Nengazen, midtevangan a kenikew te kasu ku ne midlibri nu is untung ku. 59 Neehè nu Nengazen, is mezaat he mibeelan te menge kuntada ku kayi te kediey, umbe beǥayi a te hustu he kukuman. 60 Netuenan nu ke sengemenu is kebelesi zan kedì wey is langun he pelanu zan he idezaat kedì. 61 He Nengazen, nezineg nu is ked-insultuwi zan kedì. Netuenan nu is langun he pelanu zan he idezaat kedì– 62 ebpelelaǥè dan wey ebpelanu zan te mezaat kayi te kedì seled te tivuuk he andew. 63 Ahàa nu sikandan! Edsudien e zan pinaaǥi te kanta, ebpinuu man sikandan etawa edhitindeg. 64 Siluti nu sikandan, Nengazen, sumalà te mibeelan dan. 65 Ipemezesen nu is gehinawa zan ne rewaki nu sikandan. 66 Del-asa nu sikandan wey dezeeti tenged te pauk nu su wey zan egkaawà kayi te kelibutan.