1-2 Is menge meǥinged diyà te Zion neiring te lunsey he vulawan he midheva etawa mahalen he menge vatu he nekepeyapat diyà te menge zalan. Iring sikandan dengan te utew mahal he vulawan, piru ǥuntaan neiring dà sikandan te menge diniyun he mibeelan dà te mendiziyun. 3 Minsan is leew he menge asu ebpesusu te menge anak dan, piru is menge etew ku mulà, ne ebey-anan dan is menge anak dan iring te tagbis he ustrits he ebey-anan dan dà is menge impis dan diyà te meinit he pantad te disirtu. 4 Tenged te kegkemezahi te dezeisey pa he menge anak dan ebpekezeket en diyà te pelak dan is menge zilè dan. Mibuyù is menge mezekdekelè en he menge vatà te keenen, piru wazà mibeǥey kandan. 5 Is menge etew he metaam dengan is keenen dan, ne ǥuntaan ebuyù dà te keenen te menge etew ziyà te zalan. Sikan is iyan en indekelè din is kesesepian, ne ǥuntaan ebpengarkar te keenen diyà te besurahan. 6 Is insilut diyà te zuma ku he menge meǥinged, ne subra pa te insilut diyà te menge tig-Sodom he midtik-ew zèdeeti te Megbevayà he wazà neketevang kandan. 7 Dengan, is menge pengulu te Jerusalem, meupiya is kedlelawa zan, melig-en, metilak is kedlulundis dan iring te ayis, meputì iring te gatas, wey dungganen iring te mahalen he menge vatu. 8 Piru ǥuntaan edhuna pa sikandan he meitem te vurit, ne kenè en sikandan egkekilala. Henduen be sikandan te menge tulan dà he netenges te lundis, wey henduen be te neǥangu he kayu. 9 Meupiya pa is iyan ibpatey zan is tebek kenà duen te iyan ibpatey zan is kegkevitil. Ednaneynaney sikandan ebpematey te vitil su wazè dan egkekaan. 10 Kebpekeuma te kezeetan diyà te zuma ku he menge meǥinged, minsan sikan is meelima he menge iney edhilutuen dan is keugelingen dan he menge anak su egkeenen dan tenged te utew zan kegkevitil.

11 Impeǥezaman te Nengazen is tivuuk he pauk din diyà te Zion. Umbe mibinsulan din heini, minsan is menge pundasyun kayi. 12 Kunaan te menge hadì te tivuuk he kelibutan wey is menge etew zan ke kenà ebpekeseled is menge kuntada ziyà te menge pultahan te Jerusalem. 13 Piru nehitavù heini tenged te menge salà te menge ebpeneuven kandan wey te menge memumuhat dan, he ebpenhimatey te menge etew he kenà ereg he edhimetayan. 14 Ne ǥuntaan, iring sikandan te menge lakap he ebpemenamsam diyà te menge zalan. Nezekiyan te lengesa is menge visti zan, umbe wazè en egkeluvus he egawed kandan. 15 Ebensaǥan sikandan te menge etew te, “Pekeziyù kew, su meremerik kew! Kenè key keniyu semsama.” Umbe mibpekeziyù sikandan ne minsan hendei zà he nasyun is nepeveyaan dan; piru wazà midawat kandan. 16 Iyan mismu is Nengazen mibpeyapat kandan; wazè en sikandan seǥipaa te Nengazen. Wazè en tehuza is menge memumuhat wey menge perezumala.

17 Ebmerusirem en is ked-ehè dey te kedtaǥad te tavang te kezapig dey he menge nasyun, piru wazà sikandan medtavang kenami. Ebantey key ziyà te menge turi zey te kebpekeuma te ebpuun diyà te nasyun he kenà daan ebpekelibri kenami. 18 Mibentayan te menge kuntada zey is menge langkad dey. Kenè key ebpekehipanew ziyà te menge zalan. Hapit en egkeuma is ketepusan dey. Egkevilang dà is menge andew zey. 19 Meǥaan pa te menderaǥit is menge kuntada zey he edal-as kenami. Edel-asen key zan taman te menge vuvungan. Ne minsan diyè key te sibsivayan ne zutun daan sikandan is edtaǥad he ed-etaki kenami. 20 Nezekepan dan is hadì dey he mibpilì te Nengazen, he iyan pezem midseriǥan dey he ebpengalang kenami te kedezaat te kuntada zey he menge nasyun.

21 Sigi, lipey kew wey medlipeylipey, sikiyu is menge etew ziyà te Edom he ebpemen-ubpà diyà te tanà he Uz. Piru ibpeinum daan keniyu is tasa he midteǥuan te silut te Nengazen, ne egkelangut kew wey egkelevasan. 22 Sikiyu is menge meǥinged diyà te Zion, egketapus en is kedsiluti keniyu. Hapit kew en ibpeulì te Nengazen puun te kegkevihag. Piru sikiyu is menge etew ziyà te Edom edsilutan kew te Nengazen tenged te menge salè niw ne ibpahayag din is kelelalung niw.