1-4 Midsuǥù te Nengazen si Moises he ipetuman din heini te menge Israilihanen:

Uwiti niw te lunsey he lana te mibevayu he ulibu is menge sulù diyà te ǥawas te ruǥu he zutun is selevukà te Kavan te Kebpekid-uyun dutun te Tulda he Edtelevukaayan, su para kenà meengked is kedsiǥa kayi ziyà te etuvangan te Nengazen. Emun ebmerusirem en, edtemteman heini ni Aaron ne ibpesiǥa taman te egkepawà. Edsigureduwen din he pirmeninti is kedsiǥa te menge sulù diyà te impehitindeg he selevukà duen he lunsey he vulawan. Heini he sulunuzen, kinahanglan he tumana niw taman te huziyan he lapis te menge kevuwazan.

5 Baal kew te 12 he vuuk he supas, he is kada sevaha mibeelan puun te heepat he kilu he meupiya he kelasi te herina. 6 Isavuk niw heini ziyà te lemisahan he lunsey he vulawan he ziyà te etuvangan te Nengazen. Ilinya niw heini te zezuwa he linya he tig-enem he supas is diyà te kada linya. 7 Ne sevuki niw te lunsey he veyewà is avey te kada linya. Haazà is beyewà, iyan egkehimu he pemuhat he para te kedtentenuzi te Nengazen. Edtutungen heini he iyan pemuhat pinaaǥi te hapuy he ilis duen te menge supas. 8 Kinahanglan he layun idsavuk heini is menge supas diyà te etuvangan te Nengazen kada Andew te Kedhimeley. Ketengdanan niw heini te menge Israilihanen taman te taman. 9 Heini he menge supas, ne para ki Aaron wey te menge kevuwazan din. Egkeenen dan heini ziyà te segradu he lugar zutun te Tulda, tenged te utew heini segradu he vahin te menge pemuhat. Ne para heini kandan taman te taman.

10-11 Duen sevaha he etew he is amey zin Ehiptohanen ne is iney zin Israilihanen. (Is ngazan te iney zin iyan si Shelomit, he anak ni Dibri te ebpuun diyà te tribu ni Dan.) Nekidtebek heini he etew te sevaha he Israilihanen diyà te kampu, ne midsumpalit din is ngazan te Nengazen. Umbe mid-uwit dan haazà diyà te ki Moises, 12 ne mibpirisu zan haazà taman te egketuenan dan ke hengkey is egkesuatan te Nengazen mehitenged dutun he etew.

13 Ne migkaǥi is Nengazen diyà te ki Moises te, 14 “Uwita niw ziyà te ǥawas te kampu sikan is etew he midsumpalit kedì. Is langun he nekezineg te kedsumpalit din ne izampè dan is belad dan diyà te ulu zin he tuus te zuen din televaken, ne kegkepasad ne ebpenulengen sikandin te vatu te tivuuk he menge Israilihanen. 15-16 Ne keǥiyi nu is menge Israilihanen he minsan hentei kandan wey is kenà menge Israilihanen he mid-ubpà duma kandan he edsumpalit kediey wey ebpendezeisey te ngazan ku, ne zuen din televaken. Kinahanglan he ebpenulengen sikandin te vatu te tivuuk he kezekelan taman te ebpatey.”

17 “Is minsan hentei he ebpekepatey te etew, kinahanglan he edhimetayan daan. 18 Is etew he ebpekepatey te uyaǥen te zuma kinahanglan he ed-ilisan din haazà. Uuyag daan is iliwan din su uuyag man sikan is midhimetayan din. 19-20 Emun ebpekevaal te mezaat is sevaha he etew ziyà te iring din he etew ne ebeelan daan diyà te kandin is iring te mibeelan din: Emun midlepuan din is sengeeetew ne edlepuan daan sikandin, emun midluǥit din is mata te zuma ne edluǥiten daan is kandin he mata, emun midsepuan din te ngipen is duma ne edsepuan daan sikandin te ngipen. 21 Is minsan hentei he ebpekepatey te uyaǥen kinahanglan he ed-ilisan din heini, piru is ebpekepatey te etew ne kinahanglan he edhimetayan daan. 22 Heini he velaud ne para keniyu te langun, he tutuu he Israilihanen etawa kenà. Iyan a kes Nengazen he Megbevayè niw.”

23 Hein nepasad ni Moises heini te egkaǥi ziyà te menge Israilihanen ne mid-uwit dan sikan is etew he midsumpalit din is Megbevayà diyà te ǥawas te kampu ne mibpenuleng dan te vatu, sumalà te insuǥù te Nengazen ki Moises.