1 Hein diyè en si Moises te Buntud he Sinai, midsuǥù sikandin te Nengazen 2 he keǥiya zin heini ziyà te menge Israilihanen:

Emun ebpekeuma kew en duen te tanà he ibeǥey ku keniyu, kenè niw pemulai is tanà te kada ikepitu he tuig su wey a keniyu meveǥayi te zengeg. 3-4 Seled te heenem he tuig ne ebpekepemula kew wey ebpekeraǥun. Piru te ikepitu he tuig ne kinahanglan he ibpehimeley niw is tanà. Kenè niw pemulai is menge vevesukè niw ne kenè niw zaan penempezi te menge subpang is menge paras niw. 5 Ne kenè niw zaan reǥuna wey kenè niw ivelegyà is menge pungu etawa menge veǥas te menge pinemula he nenuvù dà. 6 Piru egkehimu heini he egkeenen niw zuma te menge suluǥuen niw, menge terebahanti niw, wey te kenà menge Israilihanen he mid-ubpà duma keniyu, 7 te menge uyaǥen niw, wey te leew he menge langgam he zutun te tanè niw.

8-9 Dutun te kada ike-49 he tuig, te ikesepulù he andew te ikepitu he vulan he iyan kes Andew te Kebelukas te menge etew tenged te menge salè dan, ipezaǥing niw is menge vudyung diyà te tivuuk he lugar niw. 10 Pekeveǥata niw is ike-50 he tuig, su timpu heini te kebeǥey te vayàbayà diyà te menge uripen su wey zan mekelikù en diyà te pemilya zan wey te ked-ulì diyà te teǥiǥaked te menge azen he ingkevelegyè din. 11-12 Kayi he Tuig te Kebeǥey te Bayàbayà wey Ked-ulì, kenè kew pemula wey kenè kew zaan raǥun; kenè kew penrupù te menge veǥas te ulì, piru egkehimu he ebpenguwa kew para te egkeenen niw. Segradu heini he tuig para keniyu.

13 Kayi he tuig is azen he imbelegyà diyà te keniyu iulì niw ziyà te mibelegyà duen. 14 Umbe, emun ebelegyè kew etawa ebpemasa kew te tanà te zuma niw he meǥinged, kenè kew pelimlimbungà. 15 Kinahanglan he is bali te tanà ibasi ziyà te nesamà he menge tuig he zutun ebpekeraǥun pa is nemasa su kenè pa egkeuma is Tuig te Kebeǥey te Bayàbayà wey Ked-ulì te menge azen. 16 Emun mahabet pa is menge tuig ne human egkeuma is Tuig te Kebeǥey te Bayàbayà wey Ked-ulì ne mahala niw is bali te tanà, iyan, emun hapit en egkeuma haazà ne veretuwa niw zà. Su is tutuu, kenà tanà is ebpemesahan, kekenà, iyan is kahabet te egkeraǥun puun dutun te tanà. 17 Kenè kew mebpelimlimbungà, kekenà, tehuza a keniyu, is Nengazen he Megbevayè niw. 18-19 Tumana niw is menge sulunuzen he ibpesunud ku wey menge suǥù su wey kew mekepengungubpaan he melinawen dutun te tanà he ed-ubpaan niw ne kenè kew egkeewaan te keenen tenged te kezekelà te menge abut niw puun te tanà. 20 Kenè kew meseeng ke hengkey is egkekaan niw zutun te ikepitu he tuig he kenè kew ebpekepemula wey ebpekeraǥun. 21 Su edtuvazan ku is tanè niw zutun te ikeenem he tuig para zekelà is egkeraǥun puun duen ne ebpekesustinir te tetelu he tuig. 22 Ne zutun te kebpemula niw te ikewalu he tuig, ne kemulu niw pa egkeena is neraǥun niw zutun te ikeenem he tuig, ne zekelè pa is keenen niw taman te tiraǥun te ikesiyam he tuig.

23 Kenè kew pekid-uyun he kenè niw en ibpahawì te minsan keenu is tanà he imbelegyà diyà te keniyu su heini he tanà kediey; ebpeubpaan ku zà wey ebpeseupan ku zà heini keniyu. 24 Umbe, ituǥut niw he mahawì te teǥiǥaked is tanè din puun keniyu. Beeli niw heini ziyà te langun he tanà he nepemasa niw.

25 Emun nepubri is duma niw he Israilihanen, he tenged dutun ingkevelegyè din is tanè din, is megeget he kezuzumahi zin iyan medlekat dutun. 26 Piru emun wazè din kezuzumahi he edlekat dutun para kandin, egkehimu ǥihapun he egkahawì din heini emun nekaamuy en sikandin te pelata he idlekat kayi. 27 Emun egkehitavù heini, ne veyazi zin is nekepemasa te tanè din te vali he ibasi te kahabet te kedraǥun puun dutun te tanà taman te egkeuma is Tuig te Kebeǥey te Bayàbayà wey Ked-ulì te azen, he egkehimu en he egkahawì din is tanè din. 28 Iyan, emun kenè pa ereg is idlekat din, ne kenè din pa haazà egkekuwa puun te nemasa taman te kegkeuma te Tuig te Kebeǥey te Bayàbayà wey Ked-ulì. Dutun he tuig egkahawì din en is tanè din he wazà bayad.

29 Emun is sevaha he etew ebelegyà te valey zin he ziyà te inged he neliǥuy te verengbeng, egkehimu pa ke edlekaten din heini seled te senge-tuig, puun te timpu te kebelegyè din. 30 Piru emun kenè din heini egkelekat seled te senge-tuig, ne haazà he valey egkehimu en he ǥaked te nekepemasa zuen wey te menge kevuwazan din taman te taman. Kenè en heini egkahawì te teǥiǥaked dutun te Tuig te Kebeǥey te Bayàbayà wey Ked-ulì. 31 Piru is menge valey ziyà te zezeisey he menge inged he wazè din berengbeng iring heini te vevesukà, he egkehimu he edlekaten wey egkahawì dutun te tuig te Kebeǥey te Bayàbayà wey Ked-ulì.

32 Is menge kevuwazan ni Levi egkehimu he edlekat minsan keenu te menge valey zan he ziyà te menge inged he ǥaked dan. 33 Emun kenè dan heini egkelekat, id-ulì heini ziyà te kandan dutun te Tuig te Kebeǥey te Bayàbayà wey Ked-ulì. Su is baley ziyà te menge inged dan kandan he vahin puun te zuma zan he menge Israilihanen. 34 Piru is menge penebtavà he uvey te menge inged dan kinahanglan he kenà ibelegyà, su kandan haazà he azen taman te taman.

35 Emun nepubri is duma niw he Israilihanen ne kenè en sikandin ebpekegaga he edsupurtar te keugelingen din, tevangi niw sikandin iring te kedtavang niw te langyew etawa meǥeliyug, su wey meuyag-uyag sikandin duma keniyu. 36-37 Ipesambey niw sikandin te selapì he kenà ibpetuvù, wey velegyai niw te keenen he kenè kew en egenansya, su wey sikandin meuyag-uyag. Beeli niw heeyan he paaǥi te kebpekilala te kedtehuza niw kedì te Megbevayè niw. 38 Iyan a kes Nengazen he Megbevayè niw he mibpeǥawas keniyu puun te Ehipto su wey ku ikeveǥey keniyu is tanà te Canaan ne wey a mehimu he Megbevayè niw.

39 Emun nepubri is duma niw he Israilihanen, he tenged dutun ingkevelegyè din diyà te keniyu is keugelingen din pinaaǥi te kebpeuripen, kenè niw sikandin ibpeterebahu he iring te uripen. 40 Isipa niw sikandin he sevaha he sinuhulan he terebahanti etawa meǥeliyug he mid-ubpè dà duma keniyu. Edterebahu sikandin diyà te keniyu taman te egkeuma is Tuig te Kebeǥey te Bayàbayà wey Ked-ulì. 41 Dutun he tuig ebpekevayèbayè en sikandin wey is menge anak din, ne ebpekelikù en sikandan diyà te menge kezuzumahi zan ne egkeuman dan en maan egkaangken is menge azen te menge kepuun dan. 42 Menge uripen ku sikiyu is menge Israilihanen he impeǥawas ku puun te Ehipto. Umbe kenè niw ivelegyà is keugelingen niw pinaaǥi te kebpeuripen. 43 Kenè niw dèdaaǥa is iring niw he Israilihanen he mibpeuripen keniyu. Beeli niw heeyan te kebpekilala he edtehuzen a keniyu is Megbevayè niw.

44 Emun egkesuat kew he zuen niw menge uripen, ne pemasa kew ziyà te menge nasyun diyà te peliǥuy niw. 45 Egkehimu zaan ke ziyè kew ebpemasa te emurè niw te inged he kenà menge Israilihanen he mid-ubpà duma keniyu etawa ziyà te sakup te pemilya zan he neetew ziyà te keniyu he lugar. Is menge uripen he egkepemasa niw ziyà te kandan egkehimu en he azen niw, 46 ne egkehimu ke ibpepengevilin niw te menge anak niw, ebpekepenilbi sikandan kandan seled te tivuuk he untung dan. Piru kenè niw dèdaaǥa is iring niw he Israilihanen he nehimu he uripen niw.

47 Emun imbelegyà te sevaha he pubri he Israilihanen is keugelingen din pinaaǥi te kebpeuripen te emurù niw te inged he sepian he kenà Israilihanen etawa kezuzumahi zutun te kenè Israilihanen, 48 ne heeyan he Israilihanen egkehimu pa he edlekaten. Egkehimu sikandin he edlekaten te suled din, 49 anggam din, id-aǥew zin, etawa minsan hentei he megeget he kezuzumahi zin. Egkehimu zaan ke iyan mismu sikandin edlekat te keugelingen din emun ebpekevaug sikandin. 50-52 Is ereg he ebeelan din, ne belensiya zin duma te nekepemasa kandin ke pira en he tuig is kebpenilbi zin wey pira is ereg he ibayad kayi emun ebeyazan sikandin te iring te edhimuwen diyà te sevaha he sinuhulan he terebahanti. Ne itarin din dutun te kentidad is imbayad kandin dutun te kebpemesaha kandin he uripen. (Haazà he kentidad ibasi ziyà te kahabet te menge tuig puun te kebpemesaha kandin taman te Tuig te Kebeǥey te Bayàbayà wey Ked-ulì.) Ne ke pira is egkesamà, ne iyan haazà ebeyazan din para mevelukasi sikandin. 53 Kinahanglan he ed-isipen sikandin te nemasa kandin he sevaha he sinuhulan he terebahanti ne kenè din dèdaaǥa. 54 Emun kenà sikandin egkelekat te iring kayi he paaǥi, egkelibri ǥihapun sikandin wey is menge anak din dutun te Tuig te Kebeǥey te Bayàbayà wey Ked-ulì. 55 Umbe, wazà keniyu egkeuripen taman te taman, su menge uripen ku sikiyu, sikiyu is imbpeǥawas ku puun te Ehipto. Iyan a kes Nengazen he Megbevayè niw.